Neemias 12 - BIBLIA - traduson antigu in Krioulo

Saserdotis ku levitas

¹ Es i lista di saserdotis ku levitas ku riba ku Zorobabel, fiju di Sealtiel, tambi ku Jesua: Seraias, Jeremias, Esdras,

² Amarias, Maluk, Atus,

³ Sekanias, Reun, Meremot,

⁴ Idu, Jineton, Abias,

⁵ Miamin, Maadias, Bilga,

⁶ Semaias, Joiarib, Jedaias,

⁷ Salu, Amok, Ilkias ku Jedaias. E omis seduba ŝefis di saserdoti ku se ermons na tempu di Jesua.

⁸ Levitas seduba Jesua, Binui, Kadmiel, Serebias, Judá ku Matanias ku ta diriẑiba lovoris, juntu ku si ermons.

⁹ Se ermons Bakebukias ku Uni e ta firmaba dianti delis na kultus.

¹⁰ Jesua padi Joiakin, Joiakin padi Eliasib, Eliasib padi Joiada,

¹¹ Joiada padi Jonatas, Jonatas padi Jadua.

^12-21 Na tempu di Joiakin, ŝefis di familia di saserdotis e seduba: Di familia: di Seraias, Meraias; di Jeremias, Ananias; di Esdras, Mesulan; di Amarias, Joanan; di Meliku, Jonatas; di Sekanias, José; di Arin, Adna; di Meraiot, Elkai; di Idu, Zakarias; di Jineton, Mesulan; di Abias, Zikri; di Miniamin ku di Moadias, Piltal; di Bilga, Samua; di Semaias, Jonatas; di Joiarib, Matenai; di Jedaias, Uzi; di Salai, Kalai; di Amok, Eber; di Ilkias, Asabias; di Jedaias, Netanel.

²² Nomis di ŝefis di familia di levitas ku di saserdotis na tempu di Eliasib, Joiada, Joanan ku Jadua e reẑistaduba, te na tempu ku Dariu di Persia na renaba.

²³ Nomis di ŝefis di familia di levitas te na tempu di Joanan, fiju di Eliasib, e reẑistaduba na libru di storia di renu.

²⁴ Ŝefis di levitas seduba Asabias, Serebias, ku Jesua, fiju di Kadmiel. Utru levitas ta firmaba se dianti, pa ngaba Deus, tambi pa falal obrigadu; un grupu ta ruspundi ki utru grupu na kantigas, konformi ordi di omi di Deus, Davi.

²⁵ Matanias, Bakebukias, Obadias, Mesulan, Talmon ku Akub e seduba porterus ku ta guardaba armazens di porton di templu.

²⁶ E omis sirbiba na tempu di Joiakin, fiju di Jesua, fiju di Jozadak, suma tambi na tempu di gubernadur Neemias ku saserdoti Esdras, pursor di lei.

Dedikason di mura

²⁷ Pa dedikason di mura di Jerusalen jinti bai buska levitas na tudu kau ke ta moraba, e tisi elis pa e bin juda na dedikason ku kontentamentu, pa e ngaba Deus ku kantigas, salterius, simbalus ku arpas.

^28-29 Kantaduris junta di tabankas ke kumpu pa mora nelis, na roda di Jerusalen; e bin tambi di tabankas di netofatitas, di Bet-Jilgal, di area di Jeba ku Azmavet.

³⁰ Saserdotis ku levitas e fasi sirmonia di purifikason pa se kabesa, dipus pa pobu, pa portons ku mura.

³¹ Dipus N pui ŝefis di Judá pa e subi na mura; N ranja dus koral garandi pa e gardisi Deus. Un marŝa pa direita riba di mura, pa ladu di porton di muntudu.

³² Osaias ku metadi di ŝefis di Judá e bai tras di koral,

³³ ku Azarias, Esdras, Mesulan,

³⁴ Judá, Benjamin, Semaias ku Jeremias.

³⁵ Utru saserdotis bai tambi ku kornetas, ku sedu Zakarias, fiju di Jonatas, fiju di Semaias, fiju di Matanias, fiju di Mikaias, fiju di Zakur, fiju di Asaf,

³⁶ ku si parentis Semaias, Azarel, Milalai, Jilalai, Maai, Netanel, Judá ku Anani, ku instrumentus di musika suma di Davi, omi di Deus. Ki pursor di lei, Esdras, bai se dianti.

³⁷ Oca ke ciga na porton di fonti, e bai dianti, e subi skada di prasa di Davi na subida di mura, e pasa riba di kasa di Davi te na porton di yagu, na ladu di saida di sol.

³⁸ Sugundu koral bai pa skerda; N bai se tras, riba di mura, ku metadi di pobu, desdi tori di furnus te na mura largu;

³⁹ no pasa porton di Efrain, porton beju, porton di pis, tori di Ananeel, tori di Meá ku porton di limarias; no bai para na porton di guarda.

⁴⁰ Asin, ki dus koral di gardisimentu bai toma se lugar na kasa di Deus, ku ami tambi, ku metadi di ŝefis,

⁴¹ ku saserdotis Eliakin, Maaseias, Miniamin, Mikaias, Elioenai, Zakarias ku Ananias, ku teneba se kornetas,

⁴² suma tambi Maaseias, Semaias, Eleazar, Uzi, Joanan, Malkias, Elan ku Ezer. Jezraias diriẑi koral, ku kanta ku forsa.

⁴³ Na ki dia e sakrifika manga di limaria, e fika kontenti, pabia Deus da elis garandi alegria; te minjeris ku mininus e fika kontenti, tok fála di kontentamentu na Jerusalen i obidu lunju.

Sirvis di templu

⁴⁴ Na ki mesmu dia utru omis e nkargadu di armazens nunde ku ofertas ta pudu, ku purmeru prudutus, ku dizimus. E tenba ku rukuji la ki ofertas ku bin di pontas na roda di prasas, ku lei manda pa da saserdotis ku levitas, pabia pobu di Judá staba kontenti ku saserdotis ku levitas ku na sirbi la.

⁴⁵ E ta fasi sirvis di Deus, ku sirmonia di purifikason. Kantaduris ku porterus tambi e fasi se sirvis konformi ordis ku Davi ku si fiju Salomon daba,

⁴⁶ pabia na tempu antigu, di Davi ku Asaf, i tenba ja kin ku na diriẑi kantaduris oca ke na kanta pa ngaba Deus, tambi pa gardisil.

⁴⁷ Asin, na tempu di Zorobabel ku di Neemias, tudu Israel ta daba ofertas, pa kantaduris ku porterus pudi tene kil ke pirsisa kada dia; tambi e ta da ki oferta sagradu pa levitas; levitas ta da se oferta pa fijus di Aron.