Neemias 1 - BIBLIA - traduson antigu in Krioulo

Orason di Neemias

¹ Es i palabra di Neemias, fiju di Akalias. Na mis di Kisleu, na anu vinti di renansa di Artaserksis, ami, Neemias, N staba na palasiu na Susan.

² Anani, un di ña ermons, i bin di Judá ku utru omis. N punta elis aserka di Jerusalen, tambi di judeus ku kapli e riba di katiberasku.

³ E falan: “Kilis ku sobra di katiberasku ku sta la na pruvinsia di Judá e sta na garandi kasabi; jinti ta njuti elis. Mura di Jerusalen kai; si portons kemadu ku fugu.”

⁴ Oca ku N obi ki kusas, N sinta, N cora. Duranti dias N miskiña, N junjuŋa, N ora dianti di Deus di seu.

⁵ N fala: “SIÑOR, Deus di seu, Deus garandi, meduñu, ku sedu bon i fiel na guarda kontratu ku kilis ku amau, ku ta obdisi bu mandamentus,

⁶ jubi pa mi, bu yabri oreja, bu obi orason di bu servu ku N na fasi bu dianti aos, di dia ku di noti, pa fijus di Israel, bu servus. N konfesa pekadus ku anos fijus di Israel no fasi kontra bo; ami tambi ku familia di ña pape no peka.

⁷ Na bardadi no yara ciu kontra bo; no ka obdisi mandamentus nin leis nin ordis ku bu da bu servu Moisés.

⁸ “Lembra ke ku bu konta bu servu Moisés, bu falal: ‘Si bo kebra ña lei, N na pajiga bos na metadi di utru nasons,

⁹ ma si bo riba pa mi, bo fasi kil ku N manda bos, nin si bo fijus pajigadu te na utru ladu di mundu, N na tira elis di la, N junta elis, N tisi pa lugar ku N kuji pa ña nomi fika nel.’

¹⁰ “Esis i bu servus, bu pobu ku bu liberta ku bu garandi puder ku bu mon forti.

¹¹ SIÑOR, yabri bu oreja pa orason di bu servu, tambi pa orason di utru bu servus ku misti rispita bu nomi. Judan aos, bu pui na korson de omi pa i mostran fabur.” Ña tarbaju seduba ntrega rei kopu.