Naun 3 - BIBLIA - traduson antigu in Krioulo

¹ Ai di prasa di sangi! I inci mintida, i inci kusas ku robadu! Nunka i ka ta lunjusi di furtu!

² Suti di ŝikoti ta obidu, ku baruju di rodas. Kabalus na kuri ku forsa, karus na jukuta.

³ Omis di kabalu yalsa se spadas ku kañakus ku na lampra suma fugu. Mortus manga del! Difuntus ciu ku ka pudi kontadu; Jinti na da tapada riba delis!

⁴ Es tudu i pabia di manga di pekadu di Ninive, ki minjer di mau vida ku atrai nasons ku si parsensa bonitu, i ngana jinti ku si futis.

⁵ SIÑOR ku ten tudu puder fala: “N sta kontra bo; N na mostra nasons bu disnun; jinti di utru renus na oja bu borgoña.

⁶ N na bota kusas nujenti riba di bo; N na pou na borgoña, N fasiu suma spetakulu.

⁷ Tudu jinti ku ojau na kuri di bo; e na fala: ‘Ninive danadu! Kin ku na sinti pena del? Nunde ku N na buska jinti pa konsolau?’ ”

⁸ Nta abo i minjor di ki No-Amon, lungu di riu Nilu, tajadu ku yagu? I teneba riu suma difesa, ku yagu suma mura.

⁹ Etiopia ku Ejitu seduba si forsa sin limiti; Put ku Libia e seduba si sakur,

¹⁰ ma si jinti lebadu pa katiberasku; se mininus sapa-sapadu na kantu di tudu rua. E bota sorti pa si ŝefis ku omis importanti; e maradu ku korentis.

¹¹ Abo tambi, Ninive, bu na cami, bu na buska kau forti pa sukundi di inimigu.

¹² Bu kaus forti na sedu suma pe di figu maduru; si i sakudidu, figus na kai na boka di kil ku na kume elis.

¹³ Bu tropas sedu suma minjeris! Portons di bu tera sta abertu pa bu inimigus. Fugu na kaba ku bu trinkus.

¹⁴ Kata yagu pa tempu di taja prasa, bu fortifika bu kuartel. Buska lama, bu masal, bu purpara furnu pa tiẑolus.

¹⁵ Fugu ku spada na kaba ku bo la; bu na kabadu ku el suma ku gamfañotis ta kaba ku paja. Buri suma grilus! Buri suma gamfañotis!

¹⁶ Bu tene mas nogosiantis di ki strelas na seu, ma, suma gamfañotis, e na kume kusas, e bai.

¹⁷ Bu reis ku ŝefis na sedu suma gamfañotis garandi ku ta sinta na sibis na tempu di friu. Ora ku sol na yardi, e ta bua e bai; ningin ka ta sibi nunde ke sta nel.

¹⁸ Rei di Asiria, bu ŝefis na durmi; bu jinti importanti na diskansa. Bu pobu pajiga na montis; i ka ten kin ku na rukuji elis.

¹⁹ I ka ten mesiñu pa bu molostu; bu caga ka pudi kuradu. Tudu kilis ku obi noba di bo e na toka palmu pabia di bu kaida, pabia kin delis ku kapli bu maldadi?