Miskiñu di Jeremias 5 - BIBLIA - traduson antigu in Krioulo

Orason pa miserikordia

¹ SIÑOR, lembra ke ku pasa ku nos. Pensa, bu jubi pa no borgoña.

² No yardansa pasa pa ospris; stranjerus mora na no kasas.

³ No sedu orfans, sin pape; no mames sedu viuvas.

⁴ No ta paga diñeru pa yagu di bibi; no ta kumpra tambi no leña.

⁵ Jinti ku na serkanu e pertu pañanu. No sta kansadu, ma no ka ten diskansu.

⁶ No pidi simola na mon di ejipsius ku asirius pa e pudi fartandanu ku kumida.

⁷ No papes peka; gosi e ka sta ja. Anos no na sufri pa se pekadu.

⁸ Katibus na manda riba di nos; i ka ten ningin ku na libranu na se mon.

⁹ Ku pirigu di no vida no ta buska no kumida na lala, pabia jinti sta la ku spada.

¹⁰ Fomi pui pa no kema ku febri, tok no peli kinti suma furnu.

¹¹ E abusa na minjeris na Sion, ku bajudas na prasas di Judá.

¹² E nforka ŝefis; garandis ka mostradu rispitu.

¹³ Jovens obrigadu pa e pila; mininus na da tapada bas di maradura di leña.

¹⁴ Garandis ka ta sinta ja na porton; jovens para ja kanta.

¹⁵ Kontentamentu di no korson para; no baju konverti na miskiñu.

¹⁶ Koroa sai na no kabesa, i kai. Ai di nos pabia no peka!

¹⁷ Pabia di kila, no fika duenti na no korson, no uju fika sukuru.

¹⁸ Kacuris brabu na yanda-yanda na monti di Sion, ku sta suma lala.

¹⁹ Abo, SIÑOR, bu na rena pa sempri; bu tronu na fika firmi te na kabantada di tempu.

²⁰ Ke ku manda bu diskisi di nos pa sempri? Pabia di ke ku bu bandonanu pa manga di tempu?

²¹ Ribantanu pa bo, SIÑOR; asin no na riba. Arnoba no dias suma ki staba.

²² Nta bu na neganu pa sempri? Kuma ku bu pudi ten raiba de manera kontra nos?