Miskiñu di Jeremias 3 - BIBLIA - traduson antigu in Krioulo

Kastigu, ripindimentu, speransa

¹ Ami i algin ku oja kastigu, pabia di mantampa di raiba di Deus.

² I tiran, i pun pa N yanda na sukuru, nunde ku klaridadi ka sta.

³ I vira si mon kontra mi tudu ora, disna di parmaña te di tardi.

⁴ I bidanta ña kurpu pa i beju, i nornori ña peli, i kebra-kebra ña os.

⁵ I tajan ku mura di kastigu malgos.

⁶ I sintandan na kaus sukuru, suma kilis ku tarda muri.

⁷ I tajan ku mura tok N ka pudi sai; i kansan ku korenti ku na pesa riba di mi.

⁸ Nin si N yalsa fála, N comal, i ka ta obi ña orason.

⁹ I taja ña kamiñu ku mura di pedra, i pun pa N yanda na kamiñu tortu.

¹⁰ I na peran suma ursu ku na montia, suma lion na si kau di sukundi.

¹¹ I rastan na kamiñu, i fasin padas, i disan bandonadu.

¹² I pruntia si mansasa, i fasin alvu pa si fleŝa.

¹³ I furan ña korson ku fleŝas ki tira na si saku.

¹⁴ Tudu ña pobu ta fasin trosa, e ta gozan ku kantiga tudu ora.

¹⁵ I fartandan ku paja malgos, i camintin ku bibida malgos.

¹⁶ I kebra ña dintis ku pedrasiñus, i kubrin ku sinsa.

¹⁷ I tira pas na ña korson. N diskisi ja di tempu ku kusas ta kurinba diritu.

¹⁸ Asin N fala kuma N pirdi ña forsa, suma tambi ña speransa na SIÑOR.

¹⁹ Lembra di ña kastigu ku ña yanda-yanda, ku ña venenu malgos.

²⁰ Ami N ta lembra del sempri, N fika batidu dentru di mi.

²¹ Ma N ten speransa ora ku N lembra kuma,

²² i pabia di miserikordia di SIÑOR ku no ka kabadu ku el; pabia si garandi amor ka ta kaba.

²³ I ta nobu kada parmaña. Abo i fiel dimas!

²⁴ N ta fala ku ña kabesa kuma, SIÑOR i kil ku N tene; i nel ku N na spera.

²⁵ SIÑOR i bon pa kilis ku spera nel, pa ki algin ku na buskal.

²⁶ I bon pa pera ku kalmu ku speransa pa SIÑOR bin salbanu.

²⁷ I bon pa un omi sta bas di ordi na si nobresa.

²⁸ I bon pa i sinta dingidu, i fika ketu, pabia i SIÑOR ku pui ki disiplina riba del.

²⁹ I bon pa i pui si boka na reia; talves i ta tene inda speransa.

³⁰ I dibi di da si rostu pa algin ku na dal bofotada; pa i nguenta tudu maltratu.

³¹ SIÑOR ka na nega jinti ntidu.

³² Mesmu ki pui pa algin fika tristi, i ta mostra si amor konformi si garandi miserikordia.

³³ I ka di si vontadi pa i kastiga, nin pa pui fiju di omi fika tristi.

³⁴ Si algin masa tudu katibus na tera bas di si pe,

³⁵ i nega diritu di omi dianti di Deus ku sta riba di tudu,

³⁶ i nega julga omi diritu na tribunal, SIÑOR ka na ojal?

³⁷ Kin ku pudi fala un kusa, i bin sedu, si SIÑOR ka manda pa i sedu?

³⁸ Nta kusa mau ku bon ka ta bin na boka di Deus ku sta riba di tudu?

³⁹ Ke ku manda un omi na keŝa si i kastigadu pabia di si pekadu?

⁴⁰ No jubi no manera di yanda, no probal; no riba pa SIÑOR.

⁴¹ No lantanda no korson ku no mon pa Deus te na seu, no fala:

⁴² “No peka, no seduba disobdienti; abo bu ka purdanu.

⁴³ “Bu sukundi tras di bu raiba; bu serkanu, bu mata sin sinti pena.

⁴⁴ Bu sukundi tras di nuvens, pa ka no orason ciga bu dianti.

⁴⁵ Bu fasinu suma liŝu ku botadu na metadi di nasons.

⁴⁶ “Tudu no inimigus yabri se boka kontra nos.

⁴⁷ Koba ku medu ku kastigu ku mal sta no dianti.”

⁴⁸ Ña uju darma korenti di yagu pabia ña pobu kabadu ku el.

⁴⁹ Ña uju na cora, sin para, sin diskansu,

⁵⁰ tok SIÑOR la na seu i obinu, i jubi pa nos.

⁵¹ Ña korson ta fika tristi ora ku N oja ke ku pasa ku minjeris di ña prasa.

⁵² Kilis ku sedu ña inimigus sin roson e montian suma kacu.

⁵³ E botan na koba, e tapan la ku pedra.

⁵⁴ Yagu bin kubri ña kabesa; N fala: “Gosi N pirdi.”

⁵⁵ Na ki koba fundu, SIÑOR, N coma bu nomi.

⁵⁶ Bu obi ña vos oca ku N falau pa ka bu nega obin, manera ku N na comau pa bu judan.

⁵⁷ Bu ciga pertu na ki dia ku N comau; bu falan pa ka N medi.

⁵⁸ Bu difindi ña kasu, SIÑOR, bu salba ña vida.

⁵⁹ Bu oja kusas injustu ke fasin. SIÑOR, julga ña kasu!

⁶⁰ Bu oja tudu se vingansa, tudu se planus kontra mi.

⁶¹ SIÑOR, bu obi manera ke koban, bu kunsi tudu se planus kontra mi.

⁶² Ña inimigus na ŋuniŋuni tudu ora, e na fasi se planus kontra mi.

⁶³ Jubi elis! Ora ke sinta o e firma, e na kantan kantiga di trosa.

⁶⁴ SIÑOR, paga elis konformi kusas ke fasi ku se mon.

⁶⁵ Pui bu maldison riba delis, bu tira speransa na se korson.

⁶⁶ Serka elis ku bu raiba, bu kaba ku elis tudu ne mundu ku bu kumpu.