Mikeias 5 - BIBLIA - traduson antigu in Krioulo

Ŝef ku na sai di Belen

¹ Prasa di Jerusalen, junta bu tropas, pabia e tajanu; e na bin suta ŝef di Israel na kara ku manduku.

² SIÑOR fala: “Abo, Belen Efrata, nin ku bu sedu pikininu na metadi di milyaris di Judá, na bo ki na bin sai pa mi kil ku na sedu ŝef na Israel, ku si kumsada sedu disna di tempus mas antigu ku pasa.”

³ Israel na bandonadu te na tempu ku kil ku sta di partu na padi si fiju. Dipus, restu di si ermons na riba pa junta mas ku fijus di Israel.

⁴ I na manti firmi, i na bakia pobu na forsa di SIÑOR, na puder di nomi di SIÑOR si Deus. E na mora suguru, pabia i na bin garandisidu te na partis mas lunju di mundu.

⁵ El i na tisi pas. Ora ku Asiria bin pa no tera, i romba no palasius, i pasa, no na lantanda na metadi di pobu seti o oitu ŝefis forti pa e bai kontra elis.

Libramentu ku kastigu

⁶ E na bai ku spada, e kaba ku tera di Asiria, ku sedu tera di Ninrod, na si porton di entrada. Asin e na libranu di Asiria, ora ki bin pa no tera, i masa no fronteras.

⁷ Kilis ku sobra di Jakó na sta na metadi di manga di nason suma serenu di SIÑOR, suma cuba riba di paja, ku ka ta pera ordi di omi.

⁸ Kilis ku sobra di Jakó na sta na metadi di manga di nason, suma lion na metadi di limarias di matu, suma lion nobu na metadi di koral di karnel. Ora ki pasa i ta masa elis, i sapa-sapa elis sin algin pa libra elis.

⁹ Bu mon na yalsadu riba di kilis ku sta kontra bo; tudu bu inimigus na kabadu ku el.

¹⁰ SIÑOR fala: “Na ki dia N na kaba ku bu kabalus ku karus na bu tera.

¹¹ N na kaba ku prasas di bu tera, N na bati tudu bu kaus forti na con.

¹² N na tira futis na bu mon; bu ka na tene mas pauterus.

¹³ N na rinka na bu tera imaẑens labradu ku bu kulunas sagradu; nunka mas bu ka na mpina dianti di tarbaju di bu mon.

¹⁴ N na rinka bu idulus di Aserá, N na kaba ku bu prasas.

¹⁵ Ku raiba ku na yardi, N na torna vingansa riba di nasons ku ka ta obdisi.”