Mikeias 1 - BIBLIA - traduson antigu in Krioulo

¹ Na tempu ku Jotan, Akaz ku Ezekias seduba rei di Judá, SIÑOR da e palabra pa Mikeias, di prasa di Moreset. SIÑOR mostra Mikeias e kusas aserka di Samaria ku Jerusalen.

Ameasas kontra Israel ku Judá

² O mundu ku tudu ku sta nel, bo presta atenson; bo obi, abos, tudu nasons. SIÑOR Deus na sedu tustumuña kontra bos. Bo sukuta! SIÑOR na papia na si templu sagradu.

³ Jubi, SIÑOR na sai na si lugar, i na ria, i yanda riba di kaus altu di mundu.

⁴ Montis bas del na ribi, suma sera dianti di fugu; kobons na findi; yagu na ria ku forsa pa kau fundu.

⁵ Tudu es na sedu pabia di krimis di Jakó ku pekadus di pobu di Israel. Kin ki kulpadu pa krimis di Jakó? Nta i ka Samaria? Kin ki kulpadu pa kaus altu di Judá? I ka Jerusalen?

⁶ SIÑOR fala: “Pabia di kila, N na fasi Samaria un monton di pedra, un kau pa paranta ortas di uva. N na rianta si pedras na kobon, N diskubri si alisersus.

⁷ Tudu si imaẑens labradu na kebra-kebradu; N na kaba ku tudu si idulus. Tudu ku dadu na vida di mau fama na kemadu. Manga di si rikesa ku ngañadu na sirmonias di mau vida i na torna usadu pa mesmu koldadi sirmonias na utru tera.”

Palabras di Mikeias

⁸ Pabia di kila, N na miskiña, N cora; N na yanda nun, sin sapatu. N na pupa suma kacur brabu, tambi suma avestruz.

⁹ Caga di Samaria ka ten kura, i ciga ja na Judá, i laga te na porton di ña pobu, te na Jerusalen.

¹⁰ Ka bo konta noba pa filisteus na Gat, nin ka bo cora. Na Bet-Ofra, bo rola na con.

¹¹ Moradur di Safir, pasa, bu pega kamiñu, nun, ku borgoña. Moradur di Zaanan ka sai. Ora ku jinti na Bet-Ezel na cora, i ka na sedu mas kau di suguransa pa bos.

¹² Moradur di Marot na jimi ku dur, i na pera libramentu, pabia SIÑOR manda mal te na portons di Jerusalen.

¹³ O moradur di Lakís, purpara karu ku kabalus. I abo ku sedu kumsada di pekadu di pobu di Sion, pabia bu sigi krimis di Israel.

¹⁴ Asin, bo na da prasa di Moreset-Gat pursenti di dispidida. Kasas di Akzib na sedu nganu pa reis di Israel.

¹⁵ O moradur di Maresa, N na manda un algin ku na toma bu prasa pa yardal. Bo ŝefis, ku sedu gloria di Israel, na bai sukundi na Adulan.

¹⁶ Pela kabesa suma jugude pabia di fijus ku bu ama, pabia e na tiradu di bo, e lebadu pa katiberasku.