Mateus 7 - BIBLIA - traduson antigu in Krioulo

Ka bo julga jinti

¹ “Ka bo julga ningin pa ka bo julgadu,

² pabia manera ku bo julga utrus, asin tambi ku bo na julgadu. Midida ku bo midi ku el, i el ku bo na mididu ku el tambi.

³ Pabia di ke ku bu rapara puera na uju di bu ermon, bu ka rapara padas di po ku sta na bu uju?

⁴ Kuma ku bu ta fala bu ermon: ‘Pera N tirau puera na bu uju,’ nkuantu bu tene padas di po na di bo?

⁵ Finjidur, tira purmeru po ku sta na bu uju; dipus bu ta pudi oja diritu pa tira puera na uju di bu ermon.

⁶ “Ka bo da kusa sagradu pa kacur! Nin ka bo pui bo pérolas dianti di purkus. Talves e ta masal, e rabida e ataka bos.

Orason

⁷ “Bo pidi, bo ta dadu; bo buska, bo ta oja; bo bati porta, i ta yabridu pa bos.

⁸ Kil ku pidi i ta risibi; kil ku buska i ta oja; kil ku bati porta, i ta yabridu el.

⁹ Kal omi na bo metadi ku si fiju ta pidil pon, i ta dal pedra?

¹⁰ Si i pidil pis, i ta dal kobra?

¹¹ Si abos, ku sedu mau, bo sibi da bo fijus bon kusas, ku fadi bo Pape ku sta na seu ta da bon kusas pa kilis ku pidil!

¹² Asin, bo fasi utru jinti suma ku bo misti pa e fasi bos, pabia i asin ku lei di Moisés ku anunsiaduris manda.

Porton pikininu

¹³ “Bo yentra pa porton pikininu, pabia porton i largu, kamiñu i garandi ku ta bai pa pirdison; manga di jinti ta yentra nel,

¹⁴ ma porton i pikininu, kamiñu i pertadu ku ta bai pa vida; i puku jinti ku ta ojal.

Anunsiaduris falsu

¹⁵ “Bo toma sintidu ku anunsiaduris falsu ku bin nunde bos bistidu suma karnel, ma dentru e sedu lubus ku ta mata.

¹⁶ Bo na rapara elis pa se frutu. Nta bo pudi kuji uvas na pe di fidida, o figus na pe di spiñu pretu?

¹⁷ Tudu arvuri bon ta da bon fruta; tudu arvuri ku ka bali ta da fruta ku ka bali.

¹⁸ Arvuri bon ka pudi da fruta ku ka bali, nin arvuri ku ka bali ka pudi da bon fruta.

¹⁹ Tudu arvuri ku ka na da bon fruta i na kortadu, i botadu na fugu.

²⁰ Asin bo ta rapara elis pa se frutu.

²¹ “I ka tudu jinti ku ta falan: ‘Siñor, Siñor,’ ku na yentra na renu di seu, ma son kil ku ta fasi vontadi di ña Pape ku sta na seu.

²² Manga delis na puntan na ki dia: ‘Siñor, Siñor, no ka anunsia na bu nomi? No ka serka dimonius na bu nomi? No ka fasi manga di milagri na bu nomi?’

²³ Na ki ora N na fala elis klaru: ‘Nunka N ka kunsi bos. Bo lunjusi di mi, abos ku ta fasi mal.’

Dus omi ku kumpu kasa

²⁴ “Tudu kin ku ta sukuta e ña palabra, i fasi suma ku N fala, i parsi suma un omi jiru ku kumpu si kasa riba di pedra.

²⁵ Cuba kai, rius kuri, bentu supra kontra ki kasa; i ka kai pabia i staba kumpudu riba di pedra.

²⁶ Kin ku obi e ña palabra, i ka fasi suma ku N fala, N ta parsintil ku un omi tulu ku kumpu si kasa riba di reia.

²⁷ Cuba kai, rius kuri, bentu supra kontra ki kasa. I kai, i dana tudu.”

²⁸ Oca Jesus kaba fala e kusas, manga di jinti fika dimiradu ku si nsinamentu,

²⁹ pabia i na nsinaba si palabra ku tudu sertesa; i ka ta nsina suma pursoris di lei.