Mateus 6 - BIBLIA - traduson antigu in Krioulo

Simola

¹ “Bo libra di fasi bon kusas dianti di jinti pa e oja bos. Si bo fasi asin, bo Pape ku sta na seu ka na paga bos.

² “Asin, ora ku bu na pati simola, ka bu toka tambur bu dianti suma ku finjiduris kustuma ta fasi na kasas di juntamentu ku na rua, pa jinti pudi ngaba elis. Na bardadi N na konta bos kuma e risibi ja se pagamentu.

³ Ora ku bu na da simola, ka bu mon skerda sibi ke ku bu direita na fasi,

⁴ pa bu simola pudi dadu sukundidu na sigridu, pa bu Pape ku ta oja kusa ku ta fasidu na sigridu pudi bin pagau.

Orason

⁵ “Tambi, ora ku bu na ora, ka bu sedu suma finjiduris, pabia e ta misti ora firmadu na kasas di juntamentu, tambi na skina di ruas, pa jinti pudi oja elis. Na bardadi N na konta bos kuma e risibi ja se pagamentu.

⁶ Ma ora ku bu na ora, yentra dentru di bu kuartu, bu fica porta, bu papia ku bu Pape ku ka ta ojadu. Bu Pape ku ta oja kil ku ta fasidu na sigridu i ta bin pagau.

⁷ “Si bo na ora, ka bo ripiti palabra ciu suma kilis ku ka kunsi Deus, ku ta pensa kuma, si e papia ciu, Deus ta kumsa obi elis.

⁸ Ka bo parsi ku elis, pabia bo Pape sibi tudu ke ku bo pirsisa del antis di bo pidil.

⁹ E ku manda bo dibi di ora asin: ‘No Pape ku sta na seu, no misti pa bu nomi rispitadu,

¹⁰ pa bu renu bin, pa bu vontadi fasidu na tera suma na seu.

¹¹ Patinu aos kumida ku no pirsisa del.

¹² Purdanu mal ku no fasi, suma ku no purda kilis ku fasinu mal.

¹³ Ka bu lebanu pa tentason, ma libranu di ki algin malvadu. [Pabia renu i di bo, ku puder ku gloria pa sempri. Amen.]’

¹⁴ “Si bo purda kilis ku yara bos, asin tambi ku bo Pape ku sta na seu na purda bos,

¹⁵ ma si bo ka purda jinti ku yara bos, asin tambi ku bo Pape ka na bin purda bos ki mal ku bo fasi.

Junjun

¹⁶ “Ora ku bo junjuŋa, ka bo mostra tristesa na bo rostu suma finjiduris, pabia e ta mostra tristesa na se rostu pa jinti pudi sibi kuma e na junjuŋa. Na bardadi N na konta bos kuma e risibi ja se pagamentu.

¹⁷ Ma abo, ora ku bu junjuŋa, laba bu rostu, bu pintia kabelu.

¹⁸ De manera, ningin ka ta sibi kuma bu junjuŋa, si i ka son bu Pape ku ka ta ojadu. El, ku ta oja tudu ku fasidu na sigridu, i na pagau.

Rikesa na seu

¹⁹ “Ka bo junta bo rikesa ne mundu li, nunde ki ten nel bagabaga ku ferúz ku ta dana tudu, nunde ku ladrons ta koba e furta,

²⁰ ma bo junta bo rikesa na seu, nunde ku bagabaga ku ferús ka ta dana kusa, nunde ku ladrons ka ta koba, e ka ta furta.

²¹ Kau ku bo rikesa sta nel, la ku bo korson na sta tambi.

Lus di kurpu

²² “Lus di kurpu i uju. E ku manda, si bu uju sedu bon, bu kurpu tudu ta tene lus,

²³ ma si bu uju ka bali, bu kurpu tudu ta fika na sukuru. Asin, si lus ku sta na bo ka pudi numia, i ta sedu garandi sukuru.

Deus ku rikesa

²⁴ “Ningin ka pudi tarbaja pa dus patron, pabia i na bin gosta di un, i ka na gosta di ki utru, o i sta pruntu pa tarbaja pa un, i ta njuti ki utru. Bo ka pudi tarbaja pa Deus, bo tarbaja pa rikesa tambi.

²⁵ “E ku manda N fala bos: Ka bo fadiga ku kusa di bo vida, ku kil ku bo na kume o bibi, nin ku ropa ku bo na bisti. Nta vida ka bali mas di ki kumida? Kurpu ka bali mas di ki ropa?

²⁶ Bo jubi pa kacus di seu; e ka ta sumia, e ka ta kebra, e ka ta junta na bemba, ma bo Pape ku sta na seu i ta alimenta elis. Nta abos bo ka mas bali di ki kacus?

²⁷ Kal di bos ku pudi kuda tok i buri un palmu na si altura?

²⁸ Ke ku manda bo ta fadiga pa kusa di ropa? Bo nota kuma ku floris ta kirsi na matu. E ka ta tarbaja nin e ka ta tisi panu,

²⁹ ma N na konta bos kuma, nin Salomon, ku tudu si ronku, i ka bisti bonitu suma un de floris.

³⁰ Si Deus bisti de manera paja di matu ku ta nasi aos, amaña i ta kemadu, ku fadi abos, jinti di puku fe.

³¹ “Asin, ka bo fika fadigadu na punta: ‘Ke ku no na kume?’ o: ‘Ke ku no na bibi?’ ku fadi: ‘Ke ku no na bisti?’

³² Tudu e kusa li, jinti ku ka kunsi Deus, asin ke ta buska, ma bo Pape ku sta na seu i sibi diritu kuma bo pirsisa de kusas tudu.

³³ Purmeru kusa, bo buska renu di Deus, bo yanda diritu si dianti; asin, tudu e utru kusas, bo ta bin dadu el.

³⁴ Ka bo fadiga ku dia di amaña, pabia dia di amaña i ta toma konta di si kabesa. Kada dia ta justa ku si propi mal.