Mateus 3 - BIBLIA - traduson antigu in Krioulo

Jon Batista

¹ Na ki tempu Jon Batista bai pa lala di Judeia, i na kontaba palabra di Deus, i na fala:

² “Bo ripindi di bo pekadu, pabia renu di seu sta pertu.”

³ I di Jon ku anunsiadur Isaias falaba asin: “Algin na grita na lala, i na fala: ‘Bo kumpu kamiñu di Siñor; bo filantal strada.’ ”

⁴ Jon ta bistiba ropa di kabelu di kamelu tisidu, i ta mara sintu di kuru na rabada; si kumida seduba gamfañotis ku mel.

⁵ Jinti di prasa di Jerusalen, di tudu Judeia ku tera lungu di riu Jordon, e ta bai pa Jon.

⁶ E ta konfesaba se pekadus; Jon ta batisa elis na riu Jordon.

⁷ Jon bin oja manga di jinti di partidus di fariseus ku saduseus na binba pa kau nunde ki na batisa. I fala elis: “Jorson di kobras, kin ku nsina bos kuri di kastigu ku na bin?

⁸ Bo mostra na bo manera di yanda kuma na bardadi bo ripindi.

⁹ Ka bo ba ta njata kuma Abraon i bo pape, pabia N na fala bos kuma, te de pedras propi, Deus pudi lantanda fijus pa Abraon.

¹⁰ Mancadu sta ja pruntu pa korta arvuris pa rais. Tudu arvuri ku ka ta padi bon fruta i ta kortadu, i botadu na fugu.

¹¹ “Na bardadi ami N na batisa bos ku yagu, suma bo ripindi, ma kil ku na bin ña tras i mas mi puder; nin N ka mersi leba si sapatu. El ku na bin batisa bos ku Spiritu Santu ku fugu.

¹² I ten kabas na si mon pa buanta paja na arus na kau di masa. Dipus i ta bin rukuji si arus na bemba; i na bin kema paja ku fugu ku nunka ka ta paga.”

Jesus batisadu

¹³ Jesus bin sai di Galileia, i bai pa riu Jordon pa Jon pudi batisal.

¹⁴ Jon ka muitu mistiba, i falal: “I abo ku dibi di batisan; bu na bin gora pa N batisau?”

¹⁵ Jesus ruspundi i falal: “Disa kila, pabia de manera no ta fasi kil ku Deus misti.” Asin Jon seta.

¹⁶ Oca Jesus batisadu, i sai na yagu. Na ki ora seu yabridu; i oja Spiritu di Deus na ria riba del suma pumba.

¹⁷ Un vos di seu fala: “Es i ña Fiju ku N kiri ciu. N ten garandi kontentamentu nel.”