Mateus 28 - BIBLIA - traduson antigu in Krioulo

Jesus lanta di mortu

¹ Oca dia di diskansu pasa, sol na mansi ja pa purmeru dia di semana, Maria Madalena ku ki utru Maria e bai jubi koba.

² I tenba un garandi tirmidura di tera, pabia un anju di Siñor disi di seu, i bai, i rola ki pedra pa ladu, i sinta riba del.

³ Si parsensa i suma relampagu, si ropa branku fandan suma algadon.

⁴ Ki guardas panta dimas, tok e na tirmi, e fika suma mortu.

⁵ Anju fala minjeris: “Ka bo medi. N sibi kuma bo na buska Jesus ku krusifikadu.

⁶ I ka sta li, pabia i lanta di mortu, suma ki fala. Bo bin jubi lugar nunde ki ditandaduba nel.

⁷ Bo bai dipresa, bo fala si disipulus kuma i lanta ja di mortu, i na bai bo dianti pa Galileia; bo na ojal la. Ali N konta bos el.”

⁸ E disa koba dipresa, ku medu ma tambi ku garandi alegria, e kuri pa bai konta si disipulus.

⁹ Oca e na bai na kamiñu, Jesus bai kontra ku elis, i fala elis manteña. E bai pa el, e barsal na pe, e adoral.

¹⁰ Jesus fala elis: “Ka bo medi. Bo bai fala ña ermons pa e bai pa Galileia; la e na ojan.”

Mintida di judeus

¹¹ Oca minjeris na baiba, utru di ki guardas bai pa prasa, e konta ŝefis di saserdoti tudu ku pasa.

¹² Ki ŝefis junta ku garandis, e filanta entri elis, e da soldadus manga di diñeru, e fala elis:

¹³ “Bo fala kuma si disipulus bin di noti oca bo na durmi, e furta kurpu.

¹⁴ Si gubernadur ciga di obi e kusa, no ta papia ku el, no libra bos.”

¹⁵ Guardas toma diñeru, e fasi suma ke faladu. E storia laga na metadi di judeus te aos.

Jesus parsi pa si disipulus na Galileia

¹⁶ Si onzi disipulu bai pa Galileia, pa monti ku Jesus mostraba elis.

¹⁷ Oca ke ojal, e adoral, ma utrus tenba duvida.

¹⁸ Jesus ciga pertu, i fala elis: “N dadu tudu puder na seu ku tera.

¹⁹ Asin, bo bai pa jinti di tudu nasons, bo fasi elis ña disipulus. Bo batisa elis na nomi di Pape, di Fiju ku Spiritu Santu.

²⁰ Bo nsina elis pa e obdisi tudu kusas ku N manda bos. Ami N na sta ku bos tudu dia te na kabantada di tempu.’