Mateus 27 - BIBLIA - traduson antigu in Krioulo

Judas mata kabesa

¹ Parmaña sedu, tudu ŝefis di saserdoti ku garandis di pobu e ruma entri elis pa mata Jesus.

² E maral ku korenti, e lebal, e bai ntrega gubernadur Pilatus.

³ Oca Judas ku falsialba oja kuma Jesus kondenadu, i sinti ripindidu, i bai ribanta ki trinta mueda di prata pa ŝefis di saserdoti ku garandis,

⁴ i fala elis: “N peka; N ntrega algin inosenti pa i muri.” E puntal: “Ke ku mportanu la? Kila i ku bo!”

⁵ Judas ferca ki muedas di prata na kasa di Deus, i sai, i bai nforka si kabesa.

⁶ Ŝefis di saserdoti kuji ki muedas di prata, e fala: “I kontra lei pa no pui e diñeru na kaŝa di oferta, pabia i pres di sangi.”

⁷ E filanta entri elis, e usa ki diñeru pa kumpra un terenu na mon di un kumpudur di puti, pa sirbi di simiteriu pa stranjerus.

⁸ E ku manda, te aos, ki terenu ta comadu kampu di sangi.

⁹ Asin ku kusa ku anunsiadur Jeremias falaba bin sedu, kuma: “E toma ki trinta mueda di prata, pres ku pobu di Israel filanta pa el,

¹⁰ e kumpra kampu di kumpudur di puti, suma ku Siñor mandan.”

Jesus dianti di Pilatus

¹¹ Jesus sikidu dianti di gubernadur. Kila fasil purguntas, i puntal: “Abo i Rei di judeus?” Jesus ruspundi: “I suma ku Ñu fala.”

¹² Ŝefis di saserdoti ku garandis e akusal, ma i ka ruspundi nada.

¹³ Pilatus puntal: “Bu ka obi e kusas tudu ke na fala kontra bo?”

¹⁴ Jesus ka ruspundi nin un palabra, di manera ku gubernadur fika dimiradu dimas.

¹⁵ Na tempu di festival di Paskua, gubernadur kustumaba sempri larga un prezu; pobu ta kuji kin ke misti.

¹⁶ Na ki tempu i tenba un prezu kunsidu ku comadu Barabás.

¹⁷ Asin, oca ku pobu junta, Pilatus punta elis: “Kal ku bo misti pa N larga bos, Barabás o Jesus comadu Kristu?”

¹⁸ I sibiba kuma e ntregalba pabia di nveẑa.

¹⁹ Oca Pilatus sinta na tribunal, si minjer manda falal: “Ka bu yentra na palabra di ki omi justu, pabia e di noti N sufri dimas na suñu pabia del.”

²⁰ Ma ŝefis di saserdoti ku garandis e cuci pobu pa e pidi Pilatus pa i larga Barabás, i mata Jesus.

²¹ Gubernadur punta elis: “Kal de dus ku bo misti pa N larga?” E falal: “Barabás.”

²² Pilatus punta elis: “Nta ke ku N na fasi ku Jesus ku comadu Kristu?” E fala tudu: “Krusifikal.”

²³ Pilatus punta: “Ma kal mal ki fasi?” E grita ku mas forsa: “Krusifikal!”

²⁴ Pilatus oja kuma i ka na pudi fasi nada, ma baruju mas na buri nan. I pidi yagu, i laba mon dianti di pobu, i fala: “N ka ten kulpa na mortu de omi justu. Kulpa i di bos.”

²⁵ Tudu pobu ruspundi, e falal: “Kastigu di si mortu pudi kai riba di nos, ku no fijus!”

²⁶ Asin Pilatus larga Barabás pa elis. Dipus di manda suta Jesus, i ntregal pa i krusifikadu.

Soldadus fasi Jesus trosa

²⁷ Na ki ora soldadus di gubernadur leba Jesus pa sedi; tudu kompañia di tropas junta na si roda.

²⁸ E dispil, e bistil suma rei ku un kapa burmeju,

²⁹ e kumpu un koroa di fidida, e pul na kabesa; e pui un kana na mon direita, e finka juju si dianti, e fasil trosa, e fala: “Viva, Rei di judeus!”

³⁰ E kuspil, e tomal kana, e na dal ku el na kabesa.

³¹ Dipus de kaba fasil trosa, e dispil ki kapa, e tornal si ropa, e lebal pa i krusifikadu.

Krusifikason

³² Oca e na sai di ki lugar, e kontra ku un omi ku comadu Simon, di prasa di Sireni. E obrigal pa i leba krus di Jesus.

³³ Oca ke ciga na un lugar comadu Gólgota, ku signifika Lugar di Kaku di Kabesa,

³⁴ e da Jesus biñu jagasidu ku fel pa i bibi, ma dipus di purbal, i nega bibil.

³⁵ Dipus de krusifikal, e juga sorti pa rapati si ropa, [pa i pudi sedu suma ku anunsiadur fala: “E rapati ña ropa entri elis; e juga sorti riba di ña kamisoti.”]

³⁶ E sinta la pa guardal.

³⁷ E pui un kusa skritu riba di si kabesa pa mostra si akusason, ku fala: “ES I JESUS, REI DI JUDEUS.”

³⁸ Dus ladron krusifikadu juntu ku el, un na direita, utru na skerda.

³⁹ Kilis ku na pasaba e fika e na kobal mal, e na balansa kabesa,

⁴⁰ e na fala: “Abo ku fala bu na bati kasa di Deus, bu na torna kumpul na tris dia, salba bu kabesa! Si abo i Fiju di Deus, ria na krus!”

⁴¹ Di mesmu manera tambi ŝefis di saserdoti ku pursoris di lei ku garandis e fasil trosa, e fala:

⁴² “I salba utru jinti, ma i ka pudi salba si kabesa! Si el i Rei di Israel, pa i ria gosi na krus; no ta fia nel.

⁴³ I fiansa na Deus; pa kila libral gosi, si i ten amor pa el, pabia i fala kuma el i Fiju di Deus.”

⁴⁴ Ki ladrons ku krusifikadu ku el e na kobalba tambi di mesmu manera.

Mortu di Jesus

⁴⁵ Disna di me-dia tudu tera bida sukuru te tris ora.

⁴⁶ Pertu di tris ora di tardi, Jesus grita ku vos altu, i fala: “Eli, Eli, lamá sabaktani?” ku sedu: “Ña Deus, ña Deus, pabia di ke ku bu bandonan?”

⁴⁷ Utru di kilis ku staba la e obil, e fala: “I na coma Elias.”

⁴⁸ Ki ora un delis kuri, i toma sponja, i pul na vinagri tok i moja yop, i pul na un kana, i tenta dal el pa i bibi.

⁴⁹ Ki utrus fala: “Disal; no jubi si Elias na bin salbal!”

⁵⁰ Jesus torna grita utru bias, i para da folgu.

⁵¹ Kurtina di kasa di Deus findi na dus padas, di riba pa bas. Tera tirmi, pedras rebenta.

⁵² Kobas di nteru yabri, manga di kurpu di pobu di Deus ku muriba ja e lanta,

⁵³ e sai na kobas. Dipus di Jesus lanta di mortu, e yentra na prasa sagradu; manga di jinti oja elis.

⁵⁴ Kapiton ku utru soldadus ku na guardaba Jesus, oca ke oja con tirmi, ku kusas ku kontisi, e sinti garandi medu, e fala: “Na bardadi, e omi seduba Fiju di Deus!”

⁵⁵ Manga di minjer staba la, e na jubi di lunju. E binba ku Jesus desdi Galileia pa judal.

⁵⁶ Na se metadi i staba Maria Madalena, Maria, mame di Tiagu, ku José, ku mame di fijus di Zebedeu.

Nteru di Jesus

⁵⁷ Oca ku sol na kai, i bin un omi riku di Arimateia ku ta comadu José; i seduba tambi disipulu di Jesus.

⁵⁸ I bai pa Pilatus, i pidil kurpu di Jesus. Pilatus manda pa e dal el.

⁵⁹ José toma kurpu, i mbuljal na un panu limpu, finu,

⁶⁰ i pul na si koba nobu ki kobaba na roca, i rola un pedra garandi pa entrada di koba; dipus i bai.

⁶¹ I staba la Maria Madalena ku ki utru Maria sintadu dianti di koba.

⁶² Na utru dia, ku sedu dia dipus di Purparason, ŝefis di saserdoti ku fariseus e junta, e bai pa Pilatus,

⁶³ e falal: “Siñor, no lembra kuma ki nganadur, ocalba inda bibu, i fala kuma, dipus di tris dia i na lanta di mortu.

⁶⁴ Asin, manda pa koba guardadu suguru tok tris dia pasa, pa ka si disipulus bin bai furta kurpu, e bin fala pobu kuma i lanta di mortu. Asin, ultimu mintida i ta sedu pior di ki purmeru.”

⁶⁵ Pilatus fala elis: “Bo toma guarda, bo bai guarda koba suguru suma ku bo ntindi.”

⁶⁶ E bai, e lakria ki pedra. E pui guarda la pa koba fika suguru.