Mateus 26 - BIBLIA - traduson antigu in Krioulo

Planu pa mata Jesus

¹ Oca Jesus kaba nsina tudu ki kusas, i fala si disipulus:

² “Bo sibi, li pa dus dia i festival di Paskua. Fiju di omi na bin ntregadu pa i krusifikadu.”

³ Dipus, ŝefis di saserdoti ku garandis di pobu e junta na sala di kasa di ŝef di saserdotis, ku comadu Kaifás.

⁴ E fasi planu pa prindi Jesus sukundidu di pobu, pa matal,

⁵ ma e fala: “I ka pudi sedu na festival, pa ka pui pobu lanta ku baruju.”

Purfumadu pa nteru

⁶ Jesus staba na Betânia na kasa di Simon ku teneba mpincu.

⁷ Oca i staba na mesa, i bin pa el un minjer ku tisi jaru kumpudu di un pedra lebi ku ta comadu alabastru, ku teneba dentru un purfumu di garandi balur. I darma ki purfumu riba di kabesa di Jesus.

⁸ Si disipulus oja ki kusa, e ka fika kontenti, e punta: “Ke ku manda i dana e purfumu?

⁹ I pudiba bindidu pa pres altu; diñeru ta dadu pa koitadis.”

¹⁰ Jesus rapara ke ku na pasa, i punta elis: “Ke ku bo na kansa e minjer pa el? I fasi un kusa bon pa mi.

¹¹ Sempri bo tene koitadis ku bos, ma ami, bo ka na tenen sempri.

¹² Manera ki darma e purfumu riba di ña kurpu, i fasil pa i pudi purparan pa ña nteru.

¹³ Na bardadi N na konta bos kuma, na tudu parti di mundu ku e Bon Noba na kontadu, kusa ku e minjer fasi i na kontadu tambi pa si lembransa.”

Falsiamentu di Judas

¹⁴ Judas Iskariotis, un di ki dozi disipulu, i bai pa ŝefis di saserdoti,

¹⁵ i punta elis: “Ke ku bo na dan pa N pudi ntrega bos el?” Elis e pesal trinta mueda di prata.

¹⁶ Disna di ki ora i kumsa na montia tempu pa ntrega elis Jesus.

Ultimu sia di Jesus

¹⁷ Na purmeru dia di pon sin fermentu, disipulus di Jesus bai pa el, e puntal: “Nunde ku bu misti pa no bai fasi purparason pa bu kume sia di Paskua?”

¹⁸ I ruspundi elis: “Bo bai pa prasa, pa kasa di tal fulanu, bo ta falal: ‘Mestre manda falau kuma si tempu pertu. Na bu kasa ki misti guarda festival di Paskua ku si disipulus.’ ”

¹⁹ Ki disipulus fasi suma ku Jesus manda elis; e purpara sia di Paskua.

²⁰ Oca sol na kai, i toma si lugar na mesa ku ki dozi.

²¹ Oca e na kume, i fala: “Na bardadi N na konta bos kuma un di bos na bin falsian.”

²² E fika ku garandi tristesa; kada kin kumsa na puntal: “Siñor, nta i ami?”

²³ I ruspundi: “Kil ku na miti mon ku mi na pratu, el ku na falsian.

²⁴ Na bardadi, Fiju di omi na bai suma ku Skritura fala del, ma koitadi di ki omi ku na falsial. I ta minjor pa ki algin, si i ka padiduba.”

²⁵ Judas tambi, ku na falsialba, i punta: “Mestre, nta i ami?” Jesus falal: “I abo ku fala.”

²⁶ Oca e na kume, Jesus toma pon, i ora riba del, i kebral, i da si disipulus, i fala: “Bo toma, bo kume; es i ña kurpu.”

²⁷ Dipus, i toma kopu, i fala Deus obrigadu, i da elis, i fala: “Abos tudu, bo bibi nel,

²⁸ pabia es i ña sangi, sangi di [nobu] kontratu, ku darmadu pa manga di jinti, pa purdon di pekadus.

²⁹ N na konta bos, disna di gosi, N ka na bibi mas e biñu di uva te na ki dia ku N na bibi biñu nobu ku bos na renu di ña Pape.”

³⁰ E kaba kanta un kantiga, e sai pa monti di Olivera.

Jesus avisa Pedru

³¹ Jesus fala elis: “E di noti abos tudu bo na disan, pabia i sta skritu kuma Deus fala i na mata bakiadur; karnelis di koral na pajiga,

³² ma dipus di N lanta di mortu, N na bai bo dianti pa Galileia.”

³³ Pedru ruspundi i falal: “Nin ku tudu disau, ma ami, nunka N ka na disau.”

³⁴ Jesus falal: “N na kontau bardadi, e di noti li, antis di galu kanta, bu na fala tris bias kuma bu ka kunsin.”

³⁵ Pedru falal: “Nin ki pirsis pa N muri ku bo, N ka na negau.” Tudu si disipulus fala mesmu kusa.

Jesus ora na Jetsemane

³⁶ Jesus bai ku si disipulus pa un lugar comadu Jetsemane, i fala elis: “Bo sinta li nkuantu N na bai ora la.”

³⁷ I leba Pedru ku ki dus fiju di Zebedeu; i kumsa na sinti tristesa meduñu.

³⁸ I rabida i fala elis: “Tristesa na ña korson i garandi, kuas pa matan. Bo fika li, bo bisia ku mi.”

³⁹ I bai dianti un bokadu, i mborka ku rostu na con, i ora, i fala: “Ña Pape, si i pudi sedu, lunjusi di mi e kopu di sufrimentu, ma i ka na manera ku N misti, ma suma ku bu misti.”

⁴⁰ I riba pa si disipulus, i oja e na durmi, i punta Pedru: “Bo ka pudi nguenta ku mi nin un ora?

⁴¹ Bo toma sintidu, bo ora, pa ka bo kai na tentason. Bardadi, vontadi sta pruntu, ma kurpu i fraku.”

⁴² I bai sugundu bias pa ora, i fala: “Ña Pape, si e kopu ka pudi lunjusi di mi sin N bibil, fasi ke ku bu misti.”

⁴³ I riba, i oja e na durmi utru bias, pabia se uju staba pisadu di sonu.

⁴⁴ I torna disa elis, i bai terseru bias pa ora, i ripiti mesmu palabra.

⁴⁵ I riba mas pa si disipulus, i punta elis: “Bo na durmi inda, bo na diskansa? Bo jubi, ora ciga ja; Fiju di omi na ntregadu na mon di omis mau.

⁴⁶ Bo lanta, no bai. Ali kil ku na falsian ciga ja.”

Jesus prindidu

⁴⁷ Oca ki na papia inda, Judas ciga, ku sedu un di ki dozi disipulu. I bin ku manga di jinti ku teneba spadas ku mandukus; i ŝefis di saserdoti ku garandis di pobu ku manda elis.

⁴⁸ Falsiadur daba elis un sinal, i fala: “Kil ku N da beẑu, bo ta sibi i el; bo prindil.”

⁴⁹ I ciga, i bai diritu pa Jesus, i falal: “Mestre, pas ta sta ku bo.” I dal beẑu.

⁵⁰ Jesus puntal: “Amigu, pa ke ku bu bin?” Na ki ora jinti ciga, e pega Jesus, e prindil.

⁵¹ Un di kilis ku staba juntu ku el i pui mon, i busi spada, i da kriadu di ŝef di saserdoti ku el, i sapal oreja.

⁵² Jesus falal: “Miti spada na si lugar, pabia tudu kil ku pega na spada, ku spada ki na muri.

⁵³ O bo ka sibi kuma N pudi pidi ña Pape gosi, i ta mandan mas di sinkuenta mil anju?

⁵⁴ Ma de manera kuma ku Skritura pudi pudu na pratika ku fala kuma asin ki ten ku sedu?”

⁵⁵ Na ki ora Jesus punta ki jinti: “Bo bin ku spada ku manduku pa bin prindin, suma un ladron? Tudu dia N ta sinta na kasa di Deus, N na nsina; bo ka prindin,

⁵⁶ ma tudu es kontisi pa i sedu suma ku anunsiaduris skirbi na palabra di Deus.” Tudu si disipulus disal, e kuri.

Jesus dianti di Konseliu di judeus

⁵⁷ Kilis ku prindiba Jesus e lebal pa kasa di ŝef di saserdotis ku comadu Kaifás, nunde ku pursoris di lei ku garandis juntaba nel.

⁵⁸ Pedru, ku na sigilba di lunju te na baranda di tras di ŝef di saserdotis, i yentra, i sinta na metadi di guardas pa i jubi kuma ku kusa na bai.

⁵⁹ Ŝefis di saserdoti ku tudu membrus di Konseliu e na buskaba tustumuñu falsu kontra Jesus, pa e pudi ntregal pa i matadu,

⁶⁰ ma e ka oja, kontudu i parsi manga di jinti ku konta mintida. Na fin i parsi dus

⁶¹ ku fala: “Es fala kuma i pudi bati templu di Deus, i ta torna lantandal na tris dia.”

⁶² Ŝef di saserdotis lanta, i punta Jesus: “Bu ka tene nada di ruspundi aserka de kusas ke na testifika kontra bo?”

⁶³ Jesus fika kaladu. Ŝef di saserdotis torna falal: “Bu ten ku jurmenta pa Deus bibu, bu kontanu si abo i Kristu, Fiju di Deus.”

⁶⁴ Jesus ruspundil: “I suma ku bu fala, ma N na konta bos kuma, i ka na tarda, bo na oja Fiju di omi sintadu na direita di kil ku ten puder; i na bin riba di nuvens di seu.”

⁶⁵ Na ki ora ŝef di saserdotis rumpi si ropa, i fala: “Es i lebsimenti! Kal tustumuña ku no misti mas? Gosi bo kaba ja obi manera ki lebsi Deus!

⁶⁶ Ke ku bo oja?” E ruspundil: “I mersi mortu.”

⁶⁷ Ki ora e kuspil na rostu, e dal suku; utrus dal bofotada,

⁶⁸ e falal: “Abo i Kristu; anunsia pa nos! Diviña kin ku dau!”

Pedru nega Jesus

⁶⁹ Pedru staba sintadu fora na baranda di tras. Un bajuda di kasa bai pa el, i falal: “Abo tambi bu staba ku Jesus di Galileia.”

⁷⁰ Pedru nega dianti di tudu jinti, i fala: “N ka sibi ke ku bu na fala.”

⁷¹ I sai pa kintal. Utru bajuda ojal, i fala kilis ku staba la: “Es tambi i staba ku Jesus di Nazaré.”

⁷² I torna nega utru bias ku juramentu, i fala: “N ka kunsi ki omi.”

⁷³ Mas un bokadu, jinti ku staba la e bai pa Pedru, e falal: “Bardadi, abo i un delis tambi; bu purnunsia propi na mostra.”

⁷⁴ I kumsa na jurmenta ku palabras forti, i fala: “N ka kunsi ki omi.” Ki ora galu kanta.

⁷⁵ Pedru lembra ke ku Jesus falalba: “Antis di galu kanta bu na fala tris bias kuma bu ka kunsin.” I sai fora, i cora ku garandi tristesa.