Mateus 24 - BIBLIA - traduson antigu in Krioulo

Jesus fala kuma kasa di Deus na batidu

¹ Oca Jesus na sai na kasa di Deus, si disipulus bai pa el pa e pudi mostral bonitasku di kasa.

² I fala elis: “Bo oja e kusas li tudu? Na bardadi N na konta bos kuma, pedra ka na bin fika riba di ŋutru ku ka na batidu.”

Sufrimentu ku pirsigison

³ Oca i sinta na monti di Olivera, si disipulus bai pa el aparti, e falal: “Kontanu kal tempu ku e kusas na kontisi. Kal sinal ku na mostra kuma bu na bin, kuma mundu na kaba?”

⁴ Jesus ruspundi elis: “Bo toma sintidu pa ka ningin ngana bos.

⁵ Manga delis na bin na ña nomi, e na fala kuma elis i Mesias. E na ngana manga di jinti.

⁶ Bo na obi baruju di gera pertu, ku noba di gera lunju, ma ka bo panta, pabia e kusas ten ku kontisi, ma inda i ka fin di mundu.

⁷ Nason na lanta kontra nason, renu kontra renu. I na ten fomi ku tirmidura di con na manga di kau,

⁸ ma tudu e kusas i suma purmeru dur di partu.

⁹ “Bo na ntregadu pa kastigu; e na mata bos. Tudu jinti na odia bos pabia di ña nomi.

¹⁰ Na ki tempu manga di jinti na disvia, e na falsia ŋutru, e na nfastia ŋutru.

¹¹ Manga di anunsiadur falsu na lanta, e na ngana manga di jinti.

¹² Manera ku pekadu na kirsi, amor di manga di jinti na fria,

¹³ ma kil ku fika fiel te na fin i ta salba.

¹⁴ E Bon Noba di renu i na kontadu na tudu mundu pa sedu tustumuñu pa tudu rasa. Dipus, fin na ciga.”

Garandi sufrimentu

¹⁵ (Kin ku na lei, pa i buska ntindi e kusa.) “Ora ku bo oja na lugar santu ki ‘nujentimenti meduñu’ ku anunsiadur Daniel fala del,

¹⁶ kilis ku sta na Judeia pa e kuri pa montis.

¹⁷ Kin ku sta riba di kankra pa ka i ria dentru di kasa pa toma un kusa di la.

¹⁸ Kin ku sta na matu, ka i riba tras pa toma si ropa.

¹⁹ Koitadi di preñadas, ku kilis ku na mamanta na ki dias!

²⁰ Bo ora pa ka bo kurida sedu na tempu di cuba, nin na dia di diskansu,

²¹ pabia na ki dia i na ten garandi foronta suma nunka i ka ten disna di kumsada di mundu te aos, nin nunka mas i ka na ten.

²² Si Deus ka menusa ki dias, nin un kriatura bibu ka ta salba, ma, pa amor di kilis ki kuji, i na menusa ki dias.

²³ “Asin, si algin fala bos: ‘Ali Kristu li!’ o ‘Alal la!’ ka bo fia,

²⁴ pabia i na lanta finjiduris ku na fala kuma elis i Kristu o elis i anunsiaduris. E na fasi manga di sinal ku milagri, pa ngana, si e pudi, te mesmu kilis ku Deus kujiba ja.

²⁵ Ali N jumna N konta bos.

²⁶ Asin, si e fala bos: ‘Ala Kristu la na lala,’ ka bo sai. O: ‘Alal la dentru di kasa,’ ka bo fia,

²⁷ pabia, suma ku relampagu ta numia seu na saida di sol te na si kaida, asin ki na sedu ora ku Fiju di omi na bin.

²⁸ Nunde ku kusa muri, la ku jugude ta junta.

Fiju di omi na bin

²⁹ “Dipus di ki dias di foronta, sol na bida sukuru, lua ka na da si lus, strelas na kai di seu, puderis di seu na bulbulidu.

³⁰ Ki ora i na ojadu na seu sinal di Fiju di omi. Tudu rasa na mundu na cora; e na oja Fiju di omi na bin riba di nuvens di seu, ku puder ku garandi gloria.

³¹ Ora ku korneta na toka ku forsa, i na manda si anjus pa kuatru kantu di mundu pa e junta jinti ki kuji, desdi un ladu di mundu te na utru.

Lison di figera

³² “Bo toma lison di pe di figu. Ora ku si ramus na bida moli, pa rebenta pajas, bo ta sibi kuma tempu di kalur pertu.

³³ Asin tambi, ora ku bo oja e kusas tudu na kontisi, bo pudi sibi kuma i sta pertu, mesmu na porta.

³⁴ Na bardadi N na konta bos kuma, e jorson ka na kaba tementi e kusas tudu ka kontisi.

³⁵ Seu ku tera na pasa, ma ña palabra ka na pasa.

Ningin ka sibi dia nin ora

³⁶ “Ningin ka sibi di ki dia ku ora, nin anjus di seu, nin Fiju di Deus; son ña Pape ku sibi.

³⁷ “Suma ki kontisi na tempu di Noe, asin tambi ki na sedu ora ku Fiju di omi na bin.

³⁸ Na tempu antis di diluviu, jinti na kumeba, e na bibi, e na kasa, e na da se fijus pa kasamenti, te na dia ku Noe yentra na barku.

³⁹ E ka toma sintidu tok diluviu bin, i kaba ku elis tudu. Asin tambi ki na sedu ora ku Fiju di omi na bin.

⁴⁰ I na sta dus omi na matu. Un son na lebadu, utru na fikadu.

⁴¹ I na sta dus minjer na pila. Un son na lebadu, utru na fikadu.

⁴² “Bo toma sintidu, pabia bo ka sibi kal ora ku bo Siñor na bin.

⁴³ Bo pensa, si dunu di kasa sibiba kal ora di noti ku ladron na bin, i na bisiaba; i ka ta disal pa i romba si kasa.

⁴⁴ Asin bo sta tambi pruntu, pabia Fiju di omi na bin na ora ku bo ka pensa.

Komparason di tarbajaduris

⁴⁵ “I tenba un servu jiru, di fiansa, ku si patron pui riba di utru servus di kasa, pa i pudi da elis se kumida na ora sertu.

⁴⁶ Sortiadu i ki servu ku si patron, ora ki bin, i ojal i na fasi asin.

⁴⁷ Na bardadi N na konta bos, i na nkargal di tudu kusas ki tene.

⁴⁸ Ma si ki servu i mau, i na pensa asin: ‘Ña patron na tarda pa ciga.’

⁴⁹ I na kumsa suta si kolegas, i na kume, i na bibi ku camiduris.

⁵⁰ Patron di ki servu na bin na un dia ki ka na peral, na un ora ki ka sibi.

⁵¹ I na kastigal risu, i na pul na kau di finjiduris, nunde ke na cora, e na ñeme dinti.