Mateus 22 - BIBLIA - traduson antigu in Krioulo

Komparason di kasamenti

¹ Mas un bias Jesus da un komparason, i fala:

² “Renu di seu i asin: Un rei fasi festa di kasamenti di si fiju.

³ I manda si kriadus pa e coma jinti ki kumbidaba ja pa festa, ma e ka misti bin.

⁴ I torna manda utru kriadus ku ordi di bai fala kumbidadus: ‘N tene ja ña sia purparadu, ña turus ku utru limarias ku N kria pa e festa e matadu ja. Tudu sta ja pruntu. Bo bin pa festa di kasamenti.’

⁵ Ma elis e ka intresa. Utru bai pa si lugar, utru pa si nogos.

⁶ Utrus paña kriadus, e maltrata elis, e mata elis.

⁷ Rei obi e noba, i paña raiba; i manda si tropas pa e kaba ku ki mataduris, pa kema se prasa.

⁸ Dipus i fala si kriadus: ‘Na bardadi festa di kasamenti sta purparadu, ma kumbidadus e ka mersi toma parti.

⁹ Bo bai pa tudu kamiñu, bo kumbida tudu kilis ku bo oja pa festa.’

¹⁰ Kriadus sai pa kamiñus, e junta tudu kilis ke pudiba oja, jinti mau ku bon, tok sala di festa inci kumbidadus.

¹¹ “Oca rei yentra pa jubi kumbidadus, i oja un omi ku ka bisti ropa di kasamenti.

¹² I puntal: ‘Amigu, kuma ku bu yentra li sin bu ka bisti ropa di kasamenti?’ Omi kala boka.

¹³ Rei fala si kriadus: ‘Bo maral pe ku mon, bo lebal, bo botal fora na sukuru, nunde ku utru jinti na cora, e na ñeme dinti.’

¹⁴ Manga delis comadu, ma pukus ku kujidu.”

Mpustu

¹⁵ Utru fariseus fasi un runion, e ruma entri elis kuma ke pudi paña Jesus na si propi palabra.

¹⁶ E manda se disipulus juntu ku utrus di partidu di Erodis. E bai fala Jesus: “Mestre, no sibi kuma bu ta konta bardadi, bu ta nsina kamiñu di Deus konformi bardadi. Bu ka ta bari ningin paja, nin bu ka ta jubi pa rostu di ningin.

¹⁷ Danu bu opinion. Konformi no lei, no dibi di paga mpustu pa rei garandi o nau?”

¹⁸ Jesus ntindi se finjimentu, i fala elis: “Finjidus! Pa ke ku bo na buska pañan?

¹⁹ Bo mostran un mueda di mpustu.” E dal un mueda.

²⁰ I punta elis: “E rostu ku letra i di kin?”

²¹ E falal: “I di rei garandi.” I fala elis: “Bo da rei kil ki di rei; bo da Deus kil ki di Deus.”

²² Oca ke obi ki palabra, e fika dimiradu, e disal, e bai.

Saduseus ku resureison di mortu

²³ Na mesmu dia un grupu di saduseus bai pa Jesus, kilis ku ta fala kuma lanta di mortu ka ten. E fasil un purgunta,

²⁴ e falal: “Mestre, Moisés fala kuma, si algin kasa minjer, i muri sin i tene fiju ku el, si ermon ta kasa ku ki viuva, pa e padi fiju ku na kontadu suma fiju di kil ku muri.

²⁵ Agora i tenba na no metadi seti ermon. Purmeru kasa, i muri, i ka teneba nin un fiju, i disa minjer pa si ermon.

²⁶ Mesmu manera ku sugundu ermon, ku terseru; e bai te di seti.

²⁷ Dipus ke muri tudu, minjer tambi muri.

²⁸ Na dia di resureison gora, ki minjer, kal di ki seti ermon ku na sedu si omi, suma elis tudu e kasal?”

²⁹ Jesus ruspundi elis: “Bo sta nganadu. Bo ka kunsi Skritura nin puder di Deus.

³⁰ Ora ke lanta di mortu, omi ku minjer ka na kasa, ma e na sedu suma anjus di Deus na seu.

³¹ Kusa di resureison di mortus, bo ka lei kil ku Deus fala bos kuma:

³² ‘Ami i Deus di Abraon, Deus di Isak, Deus di Jakó’? Ma Deus i ka Deus di mortus, i Deus di bibus.”

³³ Jinti obi ki palabra, e fika dimiradu ku si nsinamentu.

Mandamentu mas garandi

³⁴ Fariseus obi manera ki disa saduseus sin rasposta. E junta, e fasi runion.

³⁵ Un delis, dutur di lei, i spurmenta Jesus ku e purgunta:

³⁶ “Mestre, kal ki mandamentu mas garandi di lei?”

³⁷ Jesus falal: “‘Ama Siñor bu Deus ku tudu bu korson, tudu bu alma, ku tudu bu ntindimentu.’

³⁸ Es ki garandi mandamentu, el ki purmeru di tudu.

³⁹ Sugundu i parsil; i es: ‘Ama bu kumpañer suma bo propi.’

⁴⁰ E dus mandamentus, tudu lei ku nsinamentu di anunsiaduris pindra nelis.”

Kristu, Fiju di Davi

⁴¹ Manera ku fariseus staba juntu, Jesus punta elis:

⁴² “Ke ku bo pensa di Kristu? I fiju di kin?” E falal: “Di Davi.”

⁴³ Jesus punta elis: “Nta kuma ku Davi, na puder di Spiritu di Deus, i comal ‘Siñor’? Pabia i fala:

⁴⁴ ‘Siñor fala ña Siñor: Sinta na ña direita tok N pui bu inimigus suma tapeti pa bu diskansa pe nel.’

⁴⁵ Si Davi comal ‘Siñor’, kuma ki pudi sedu si fiju?”

⁴⁶ Ningin ka pudi ruspundil nin un palabra. Disna di ki dia pa dianti ningin ka osa puntal mas nada.