Mateus 21 - BIBLIA - traduson antigu in Krioulo

Jesus yentra na Jerusalen

¹ Oca e na pertu Jerusalen, e ciga na Betfajé, tabanka na monti di Olivera. Jesus manda dus disipulu, i fala elis:

² “Bo bai pa ki tabanka ku sta bo dianti. Bo na yentra son, bo na oja un buru maradu, ku si fiju lungu del. Bo ta dismancal, bo tisi elis.

³ Si algin fala bos kualker kusa, bo ta fala kuma Siñor pirsisa delis. I ka na tarda i na manda elis.”

⁴ E kusa tudu kontisi pa i pudi sedu suma ku palabra di anunsiadur fala:

⁵ “Bo fala prasa di Sion: ‘Ali bu Rei na bin pa bo, mansu, montadu na un buru, montadu na fijusiñu di buru, animal di kargu.’ ”

⁶ Disipulus bai, e fasi suma ku Jesus manda elis.

⁷ E tisi buru ku si fiju, e pui se ropa riba delis, e pui Jesus monta.

⁸ Manga di jinti na distindi se ropa na kamiñu; utrus na korta ramus di po, e na distindi na kamiñu.

⁹ Multidon di jinti ku na baiba dianti, ku kilis ku fika tras, e na grita, e na fala: “Osana pa Fiju di Davi! Kil ku bin na nomi di Siñor i mersi ngabadu. Osana pa Deus na seu!”

¹⁰ Oca i na yentra na Jerusalen, jinti tudu na somna na prasa, e na punta: “Es i kin?”

¹¹ Multidon di jinti ruspundi elis: “Es i Jesus, anunsiadur di Nazaré di Galileia.”

Jesus na kasa di Deus

¹² Jesus yentra na kasa di Deus, i serka tudu kilis ku na bindiba la, e na kumpra; i bati mesas di torkiaduris di diñeru, ku asentus di kilis ku na bindiba pumba.

¹³ I fala elis: “I sta skritu kuma Deus fala: ‘Ña kasa na comadu kasa di orason,’ ma abos bo fasil kau ku ladron ta sukundi nel.”

¹⁴ Segus ku mankus bai pa el na kasa di Deus; i kura elis.

¹⁵ Ŝefis di saserdoti ku pursoris di lei oja ki milagris ku Jesus fasi, e obi mininus na grita na kasa di Deus, e na fala: “Osana pa Fiju di Davi!” E paña raiba,

¹⁶ e punta Jesus: “Bu obi ke ku e mininus na fala?” Jesus fala elis: “Sin, N obi. Nunka bo ka lei na palabra di Deus: ‘Bu pui pikininus ku mininus di mama pa e yalsa se fala pa ngabau’?”

¹⁷ I disa elis, i sai na prasa, i bai Betânia, i pasa noti la.

Figera ku ka padi

¹⁸ Di parmaña sedu, oca i na riba pa prasa, Jesus teneba fomi.

¹⁹ I oja un figera pertu di kamiñu, i bai pa el, i ka oja nada la di kume, son pajas. I falal: “Nunka mas bu ka na padi fruta!” Na ki ora figera seku janan.

²⁰ Oca disipulus oja e kusa e punta dimiradu: “Kuma ku e figera seku asin dipresa?”

²¹ Jesus fala elis: “Na bardadi, N na konta bos, si bo ten fe, bo ka duvida, bo ka na fasi son kil ku fasidu na figera, ma te e monti, si bo falal pa i lanta, i bai dentru di mar, asin ki na sedu.

²² Tudu kil ku bo pidi na orason, si bo fia, bo na risibil.”

Batismu di Jon

²³ Oca Jesus yentra na kasa di Deus, i na nsina, ŝefis di saserdoti ku garandis di pobu e bai pa el, e puntal: “Kal diritu ku bu ten pa fasi e kusas? Kin ku dau e otridadi?”

²⁴ Jesus fala elis: “Ami tambi N na punta bos un kusa. Si bo kontan el, ami tambi N na konta bos kal diritu ku N ten pa fasi e kusas.

²⁵ Batismu di Jon i seduba di nunde? I di Deus o i di omis?” E kumsa na diskuti entri elis, e na fala: “Si no fala kuma i di Deus, i na puntanu ke ku manda no ka fia nel,

²⁶ ma si no fala kuma i di omis, no ten medu di pobu, pabia tudu jinti e tene Jon suma anunsiadur.”

²⁷ E ruspundi Jesus, e falal: “No ka sibi.” I fala elis: “Nin ami tambi N ka na konta bos ku kal otridadi ku N ta fasi e kusas.

Komparason di dus fiju

²⁸ “Ke ku bo oja? Un omi teneba dus fiju. I bai pa purmeru fiju, i falal: ‘Fiju, bai tarbaja aos na ña orta.’

²⁹ Kila ruspundil: ‘N ka na bai.’ Ma dipus, i ripindi, i bai.

³⁰ Omi bai pa sugundu fiju, i falal mesmu kusa. Kila falal: ‘Sin Siñor, N na bai.’ Ma i ka bai.

³¹ Kal de dus ku fasi ke ku se pape misti?” E falal: “Ki purmeru.” Jesus fala elis: “Na bardadi N na konta bos kuma, kobraduris di mpustu ku minjeris ku ta bindi se kurpu e na jumna bos yentra na renu di Deus.

³² Jon bin pa nsina bos kamiñu retu, ma abos bo ka fial. Kobraduris di mpustu ku minjeris ku ta bindi se kurpu e fia nel, ma abos, mesmu ku bo oja ki kusa, bo ka ripindi pa bo fia nel.

Komparason di labraduris mau

³³ “Bo sukuta utru komparason. Un omi ku teneba un orta i paranta pes di uva, i pui tapada di volta, i koba koba pa masa uva, i kumpu kasa altu pa bisiadur, i luga labraduris ki orta, i bai bias na utru tera.

³⁴ “I ciga tempu di fruta; i manda si kriadus pa labraduris pa e dal si parti di fruta.

³⁵ Labraduris pega na kriadus, e da un pankada, e mata utru, e da utru ku pedras.

³⁶ Dunu di orta manda utru kriadus mas ciu di ki purmeru. Labraduris fasi elis mesmu kusa ke fasi ki purmerus.

³⁷ Na kabantada i manda si fiju pa elis, i fala: ‘E na rispita ña fiju.’

³⁸ Ma labraduris kaba oja fiju son, e fala entri elis: ‘Es ku na yarda. Bo bin no matal, no ta toma konta di si yardansa.’

³⁹ E pegal, e tiral fora di orta, e matal.

⁴⁰ Ora ku dunu di orta bin, ke ki na fasi ki labraduris?”

⁴¹ E fala: “I na kaba ku ki labraduris mau na un manera meduñu; i na luga orta pa utru labraduris ku ta dal si parti di fruta na si tempu.”

⁴² Jesus punta elis: “Nunka bo ka lei na Skritura kuma: ‘Pedra ku pedrerus nega i bin sedu purmeru pedra di kantu; es i kusa ku Siñor fasi, ku no oja, no dimira’?

⁴³ “E ku manda N na konta bos, bo na tiradu renu di Deus; i na bin dadu pa utru nason ku ta da si frutu. [

⁴⁴ Kin ku kai riba de pedra i na bida padas. Si i kai riba di algin, si dunu na fika suma foriña.]”

⁴⁵ Ŝefis di saserdoti ku fariseus e obi e palabra, e ntindi kuma i na papiaba pa elis.

⁴⁶ E na buskaba manera pa prindil, ma e medi pobu, pabia e teneba Jesus suma anunsiadur.