Mateus 20 - BIBLIA - traduson antigu in Krioulo

Komparason di tarbajaduris ku se pagamentu

¹ “Renu di seu i asin. Un omi ku teneba ortas i sai mandrugada pa bai buska tarbajaduris pa si orta di uva.

² I ruma pa paga elis un mueda di prata pa un dia di tarbaju, i manda elis pa si orta.

³ Banda di novi ora di parmaña i sai, i oja utrus na prasa ku ka na fasiba nada.

⁴ I fala elis: ‘Abos tambi bo bai tarbaja na orta; N na paga bos kil ki justu.’ Elis e bai.

⁵ Pertu di me-dia i torna sai; tris ora di tardi i sai mas, i fasi mesmu.

⁶ Pertu di sinku ora di tardi i sai, i oja utrus ku ka na fasiba nada tambi. I punta elis: ‘Ke ku manda bo sta li, bo ka na fasi nada disna di parmaña?’

⁷ E falal: ‘Pabia ningin ka danu tarbaju.’ I fala elis: ‘Bo bai tambi pa ña orta.’

⁸ “Oca sol na noti, dunu di orta fala si nkargadu: ‘Coma tarbajaduris, bu paga elis se diñeru. Kumsa na ultimu, bu kabanta na purmeru.’

⁹ Kilis ku pegaba tarbaju pertu di sinku ora e ciga; kada un risibi un mueda di prata.

¹⁰ Kilis ku pegaba purmeru e bin, e kuda kuma e na risibi mas ciu, ma kada un delis risibi un mueda di prata suma ki utrus.

¹¹ Oca e risibil, e na ŋuniŋuni kontra dunu di orta,

¹² e na fala: ‘E ultimus e tarbaja son un ora; bu paga elis suma nos ku nguenta fadiga di dia tudu, ku kalur.’

¹³ Dunu di orta ruspundi, i fala un delis: ‘Amigu, N ka na fasiu injustisa. Nta bu ka filanta ku mi pa un mueda di prata?

¹⁴ Toma kil ki di bo, bu bai. N misti da es ultimu suma ku N dau.

¹⁵ Nta N ka ten diritu di fasi ke ku N misti ku kil ki di mi? Pabia di ke ku bu na oja mal na bon kusa ku N fasi?’

¹⁶ “Asin, kilis di tras e na pasa dianti; kilis di dianti e na fika tras.”

Jesus fala di si mortu

¹⁷ Oca Jesus na bai pa Jerusalen, na kamiñu i coma si dozi disipulu aparti, i fala elis:

¹⁸ “Bo sukuta, no na bai pa Jerusalen nunde ku Fiju di omi na bai ntregadu pa ŝefis di saserdoti ku pursoris di lei. E na kondenal pa mortu.

¹⁹ E na ntregal na mon di jinti ki ka judeu. E na fasil trosa, e na sutal, e pregal na krus, ma dipus di tris dia i na lantandadu di mortu.”

Pididu di fijus di Zebedeu

²⁰ Minjer di Zebedeu, kumpañadu ku si dus fiju, i bai pa Jesus, i finka juju si dianti pa fasil un pididu.

²¹ Jesus puntal: “Ke ku bu misti?” Minjer ruspundi: “N misti pa bu da ordi pa e ña dus fiju pudi sinta, un na bu direita, utru na bu skerda, na bu renu.”

²² Jesus ruspundi, i fala elis: “Bo ka sibi ke ku bo na pidi. Nta bo pudi bibi na kopu ku N na bibi nel?” E falal: “No pudi.”

²³ I fala elis: “Na bardadi bo na bibi na ña kopu, ma pa sinta na ña direita o ña skerda, i ka ami ku na da ki diritu, ma i pa kilis ku ña Pape purparal pa elis.”

²⁴ Oca ku ki des obi e kombersa, e paña raiba kontra ki dus ermon.

²⁵ Jesus coma elis pa e pertu el, i fala: “Bo sibi kuma gubernaduris di utru nasons e ten forsa nelis; se garandis e ten otridadi forti riba delis,

²⁶ ma na bo metadi i ka asin ki na sedu. Kil ku misti sedu garandi na bos, el i na sedu bo sirbidur.

²⁷ Kualker na bo metadi ku misti sedu purmeru, i na sedu bo katibu,

²⁸ suma Fiju di omi, ku ka bin pa i sirbidu, ma pa sirbi, i pa da si vida pa libra manga di jinti.”

Dus segu di Jerikó

²⁹ Oca e na sai na Jerikó, multidon di jinti fika tras di Jesus.

³⁰ Dus segu sintaba lungu di kamiñu. E obi kuma i Jesus ku na pasa, e grita e fala: “Siñor, Fiju di Davi, ten pena di nos!”

³¹ Jinti na raprindiba elis pa e kala, ma elis, kada bias e mas na grita, e na fala: “Siñor, Fiju di Davi, ten pena di nos!”

³² Jesus para, i coma elis, i punta: “Ke ku bo misti pa N fasi bos?”

³³ E falal: “Siñor, pa bu yabrinu uju.”

³⁴ Jesus sinti garandi pena delis, i toka elis na uju. Ki ora uju yabri ku elis. E pega tras di Jesus.