Mateus 2 - BIBLIA - traduson antigu in Krioulo

Omis jiru di Orienti

¹ Oca Jesus padidu na Belen, na tera di Judeia, na tempu di Rei Erodis, utru omis ku ta studaba strelas e bin di ladu di saida di sol pa Jerusalen,

² e punta: “Nunde ki sta nel kil ku padidu rei di judeus? No oja si strela na saida di sol, no bin pa adoral.”

³ Oca Rei Erodis obi ki purgunta, i fika tarpajadu, ku tudu jinti di Jerusalen tambi.

⁴ I manda junta tudu ŝefis di saserdoti ku pursoris di lei, i punta elis: “Nunde ku Kristu na padidu nel?”

⁵ E ruspundil: “Na Belen di Judeia, pabia asin ku anunsiadur skirbi:

⁶ ‘Abo Belen na tera di Judá, bu ka na sedu prasa pikininu na metadi di utru prasas di Judá, pabia i na bo ki na bin sai nel un ŝef ku na bin gia ña pobu Israel.’ ”

⁷ Na ki ora Erodis coma ki omis jiru na sigridu, i punta elis na kal tempu ke oja ki strela.

⁸ Dipus i manda elis pa Belen, i fala elis: “Bo bai punta diritu nunde ku mininu sta nel; ora ku bo ojal, bo ta bin kontan, pa ami tambi N pudi bai adoral.”

⁹ Oca ki omis jiru kaba sukuta rei, e sai pa bai. Ki strela ke ojaba na saida di sol i kumsa bai se dianti, tok i ciga i para riba di kau ku mininu staba nel.

¹⁰ E oja ki strela, e sinti garandi kontentamentu.

¹¹ E yentra na kasa, e oja mininu ku Maria, si mame; e mpina, e adora Jesus. Dipus e pursenta kusas ke leba pa patil: uru, nsensu ku mira.

¹² Deus bin avisa elis na suñu pa ka e riba pa Erodis. Asin e bai pa se tera na utru kamiñu.

José ku Maria fusi pa Ejitu

¹³ Dipus de bai, un anju di Siñor bai pa José na suñu, i falal: “Lanta, bu toma mininu ku si mame, bu kuri pa Ejitu. Fika la te ora ku N torna falau, pabia Erodis na bin buska mininu pa mata.”

¹⁴ José lanta, i toma mininu ku si mame di noti, e bai pa Ejitu.

¹⁵ E fika la tok Erodis muri, pa pudi fasi kil ku Siñor falaba na boka di si anunsiadur: “N coma ña fiju na Ejitu.”

¹⁶ Oca ku Erodis bin sibi kuma ki omis jiru nganal, i paña raiba. I manda mata tudu mininus ku staba na Belen, ku kilis di roda di Belen, di dus anu pa bas, konformi tempu ki puntaba omis jiru.

¹⁷ De manera i bin sedu suma ku anunsiadur Jeremias falaba ja:

¹⁸ “Na Ramá i obidu gritu di cur ku dur garandi. I Rakel ku na cora pa si fijus, nin i ka misti pa algin konsolal, pabia e ka sta ja bibu.”

E riba di Ejitu

¹⁹ Oca Erodis bin muri, un anju di Siñor bai pa José na suñu, na Ejitu,

²⁰ i falal: “Lanta, bu toma mininu ku si mame, bu riba pa tera di Israel, pabia kilis ku na buskaba mininu pa mata e muri ja.”

²¹ José lanta, i toma mininu ku si mame, i riba pa tera di Israel.

²² Oca ki obi kuma Arkelau na rena na Judeia na lugar di si pape Erodis, i medi bai pa la. Deus torna avisal mas na suñu; i bai pa tera di Galileia.

²³ Oca ki ciga, i bai mora na un prasa ku comadu Nazaré. De manera i bin sedu suma ku anunsiaduris falaba ja: “I na comadu Nazarenu.”