Mateus 18 - BIBLIA - traduson antigu in Krioulo

Kin ku na sedu ŝef

¹ Na ki ora disipulus bai pa Jesus, e puntal: “Kin ki ŝef na renu di seu?”

² Jesus coma un mininu, i pul na se metadi,

³ i fala: “Na bardadi, N na konta bos kuma, si bo ka konverti, bo ka bida suma mininu, di nin un manera bo ka na yentra na renu di seu.

⁴ Kin ku baŝa si kabesa suma e mininu, es ki ŝef na renu di seu.

⁵ Kualker ku risibi un mininu suma es na ña nomi, i ami ki risibi,

⁶ ma kualker ku pui un de pikininus ku fia na mi pa i kai na pekadu, i minjor i maradu na garganti un pedra di muiñu, i botadu na metadi di mar, pa i bai pa fundu.

⁷ “Koitadi di mundu, pabia kusas di pui algin kai ten ku bin, i ka ta maina, ma koitadi di algin ku ta pui utru jinti pa e kai na pekadu.

⁸ E ku manda, si bu mon o bu pe na pou pa bu peka, kortal, bu fercal lunju. I minjor pa bu yentra na vida ku falta di un mon o un pe, te pa bu tene dus mon ku dus pe, bu botadu na fugu ku ka ta paga.

⁹ Si i bu uju ku na fasiu peka, rinkal, bu fercal lunju. I minjor pa bu yentra na vida ku un uju, te pa bu tene dus uju, bu botadu na fugu di nfernu.

¹⁰ Bo toma sintidu, ka bo njuti nin un de pikininus, pabia N na konta bos kuma se anjus na seu e ta oja sempri rostu di ña Pape ku sta na seu. [

¹¹ Ami, Fiju di omi, N bin pa salba kil ku pirdiba.]

Karnel ku pirdi

¹² “Ke ku bo oja? Si un omi tene sen karnel, si un delis bin pirdi, i ka na disa ki noventa i novi na montis pa bai buska kil ku pirdi?

¹³ Si i ojal, na bardadi N na konta bos, i na mas kontenti pa ki un son di ki pa ki noventa i novi ku ka pirdi.

¹⁴ Asin tambi bo Pape ku sta na seu i ka misti pa un de pikininus pirdi.

Manera di trata pekadu di bu ermon

¹⁵ “Si bu ermon peka [kontra bo], bai raprindil, abo son ku el. Si i obiu, i ta oja bu ngañal.

¹⁶ Si i ka obiu, leba mas un o dus ku bo, pa ‘tudu palabra pudi konfirmadu pa dus o tris tustumuña’.

¹⁷ Si i nega obi elis, konta asuntu na igreẑa. Tambi si i nega obi igreẑa, tratal suma algin ku ka kunsi Deus, suma kobradur di mpustu.

¹⁸ “Na bardadi N na konta bos kuma, tudu kil ku bo mara na tera i na maradu na seu. Tudu ku bo dismanca na tera i na dismancadu na seu.

¹⁹ Inda N na konta bos, si dus di bos na tera konkorda na un kusa ku bo na pidi, ña Pape ku sta na seu i na fasi bos ki kusa,

²⁰ pabia, nunde ku dus o tris junta na ña nomi, N na sta na se metadi.”

Omi ku ka sibi purda

²¹ Pedru bai pa Jesus, i puntal: “Siñor, kantu bias ku N dibi di purda ña ermon si i na peka sempri kontra mi? Te seti bias?”

²² Jesus falal: “I ka te seti bias, ma seti te setenta bias.

²³ “E ku manda renu di seu i pudi komparadu de manera: I tenba un rei ku misti fasi konta ku si tarbajaduris.

²⁴ Oca i kumsa na fasi konta, e tisil un omi ku dibil milyons di diñeru.

²⁵ Suma kila ka teneba nada pa paga, si patron da ordi pa i bindidu, el ku si minjer ku si fijus, ku tudu kusa ki tene, pa i pudi paga dibida.

²⁶ Ki omi kai i mborka dianti di si patron, i falal: ‘Siñor, ten pasensa ku mi; N na pagau tudu.’

²⁷ Si patron sinti garandi pena del, i disal, i purdal tudu ki dibida.

²⁸ “Ki tarbajadur kaba sai son, i kontra ku un si kolega ku dibil sen mueda di prata. I pegal, i kumsa na forkal, i na falal: ‘Pagan kil ku bu dibin!’

²⁹ Si kumpañer mborka bas di si pe, i falal: ‘Ten pasensa ku mi; N na pagau.’

³⁰ Ma el i ka misti; i lebal pa bai fical na kalabus te ora ki pagal dibida.

³¹ Utru di se kolegas e oja ke ku pasa, e fika tristi dimas, e bai konta se patron tudu ku pasa.

³² Se patron coma ki omi, i falal: ‘Tarbajadur malvadu! N purdau tudu ki dibida pabia bu pidin.

³³ Nta abo tambi bu ka dibi di tenba pena di bu kumpañer suma ku N tenba pena di bo?’

³⁴ Si patron, ku raiba ki ten, i ntregal na mon di kastigaduris te ora ki paga tudu ki dibi.

³⁵ Asin tambi ku ña Pape ku sta na seu na bin fasi bos si kada un di bos ka purda di korson si ermon.”