Mateus 16 - BIBLIA - traduson antigu in Krioulo

Sinal di seu

¹ Fariseus ku saduseus bai pa Jesus pa e pudi spurmental. E pidil pa i mostra elis un sinal di seu.

² I ruspundi elis, i fala: “Di tardi bo ta fala: ‘No na tene bon tempu pabia seu i burmeju.’

³ Parmaña bo ta fala: ‘Aos no na tene turbada, pabia seu i burmeju kargadu.’ Bo sibi rapara parsensa di seu, ma bo ka pudi rapara sinalis di tempus.

⁴ E jinti di aos ku sedu mau, ku ka fiel pa Deus, e na buska un sinal, ma e ka na dadu utru sinal fora di kil di Jonas.” I disa elis, i bai si kamiñu.

Fermentu di fariseus

⁵ Oca disipulus na kamba pa utru banda, e diskisiba di ranja pon.

⁶ Jesus fala elis: “Bo toma sintidu, bo libra di fermentu di fariseus ku saduseus.”

⁷ Elis e na diskutiba entri elis, e fala: “I pabia no ka tisi pon.”

⁸ Jesus ntindi ke ke na fala, i punta elis: “Omis di puku fe, ke ku manda bo na diskuti entri bos pabia bo ka ranja pon?

⁹ Bo ka ntindi inda, nin bo ka lembra di ki sinku pon pa sinku mil omi, kantu kufu ku sobra?

¹⁰ Nin bo ka lembra di ki seti pon pa kuatru mil omi, kantu balai ku sobra?

¹¹ Kuma ku bo ka pudi ntindi kuma N ka na fala bos di pon, ma N na fala pa bo libra di fermentu di fariseus ku saduseus?”

¹² E kumsa ntindi kuma Jesus ka fala elis pa e libra di fermentu di pon, ma di nsinamentu di fariseus ku saduseus.

Pedru diklara kin ki Jesus

¹³ Oca Jesus ciga na reẑion di Sesareia di Filip, i punta si disipulus: “Kin ku jinti fala kuma Fiju di omi i sedu?”

¹⁴ E ruspundi: “Utrus fala i Jon Batista, utrus Elias, utrus Jeremias o un di anunsiaduris.”

¹⁵ I punta elis: “Ma abos, kin ku bo fala kuma N sedu?”

¹⁶ Simon Pedru ruspundi, i falal: “Abo i Mesias, Fiju di Deus bibu.”

¹⁷ Jesus ruspundi, i falal: “Simon, fiju di Jonas, abo i sortiadu, pabia i ka omi ku mostrau e kusa, ma i ña Pape ku sta na seu.

¹⁸ Tambi N na falau kuma abo i Pedru. Riba de pedra N na kumpu ña igreẑa. Forsa di nfernu ka na bin pudi ku el.

¹⁹ N na dau cabis di renu di seu. Tudu kil ku bu mara na tera i na maradu na seu. Tudu kil ku bu dismanca na tera i na dismancadu na seu.”

²⁰ Dipus Jesus da si disipulus ordi pa ka e konta ningin kuma el i Mesias.

Jesus fala di si mortu ku resureison

²¹ Disna di ki ora Jesus kumsa na mostra si disipulus kuma i pirsis pa i bai Jerusalen, i bai sufri ciu na mon di garandis, ku ŝefis di saserdoti ku pursoris di lei, pa i matadu, i lantandadu di mortu dipus di tris dia.

²² Pedru lebal na un ladu, elis dus, i kumsa na raprindil, i falal: “Siñor, ten pena di bu kabesa! Di nin un manera e kusa ka na ojau.”

²³ Jesus rabida i fala Pedru: “Sai ña dianti, Satanas! Bu na disvian di ña kamiñu, pabia bu pensamentu i ka bin di Deus, ma i di omi.”

Kada kin dibi di leba si krus

²⁴ Jesus fala si disipulus: “Si algin misti bin ku mi, i ten ku nega si kabesa, i lambu si krus, i sigin.

²⁵ Kin ku misti salba si vida, i na pirdil, ma kin ku pirdi si vida pa amor di mi, i ta ojal.

²⁶ Kal purbitu ku algin ta ten si i ngaña mundu ntidu, ma i pirdi si kabesa? O ke ku algin pudi da pa kumpra si alma?

²⁷ Fiju di omi na bin bin na gloria di si Pape, ku si anjus; i na paga kada kin konformi kusa ki fasi.

²⁸ Na bardadi N na konta bos kuma, utru di bos ku sta li ka na muri tok e oja Fiju di omi na bin na si renu.”