Mateus 14 - BIBLIA - traduson antigu in Krioulo

Mortu di Jon Batista

¹ Na ki tempu rei Erodis obi fama di Jesus,

² i fala si konsijaduris: “Es omi i Jon Batista ku lanta di mortu. E ku manda i ten puder pa fasi e milagris.”

³ Erodis prindiba Jon, i maral ku korentis, i fical na kalabus pabia di Erodias, minjer di Filip, ermon di Erodis,

⁴ pabia Jon falalba: “Bu ka ten diritu di sinta ku e minjer.”

⁵ Erodis mistiba mata Jon, ma i mediba jinti, pabia e teneba Jon suma anunsiadur.

⁶ Na dia di festa di anus di Erodis, fiju femia di Erodias i baja dianti di kumbidadus. Erodis fika kontenti ku el.

⁷ Asin i jurmenta kuma i na dal tudu kil ki pidi.

⁸ Oca si mame kontal ke ki na pidi, bajuda bai fala: “Dan kabesa di Jon Batista na un pratu.”

⁹ Rei fika ku kasabi, ma, pabia di si juramentu, tambi pabia di kumbidadus, i da ordi pa i dadu el.

¹⁰ I manda dogola Jon na kalabus.

¹¹ E tisi kabesa na un pratu, e da bajuda. El i lebal pa si mame.

¹² Disipulus di Jon ciga, e leba kurpu, e nteral; e bai konta Jesus.

Jesus da kumida pa 5.000 omi

¹³ Jesus obi ki noba, i sai di la na un barku pa un lugar dingidu. Oca jinti sibi, e sigil ku pe, desdi prasas.

¹⁴ Oca Jesus na disimbarka, i oja manga di jinti, i sinti garandi pena delis, i kura duentis na se metadi.

¹⁵ Na parti di tardi si disipulus bai pa el, e falal: “E kau li i dingi; ora na pasa. Dispidi jinti pa e bai pa tabankas pa e pudi bai kumpra kusa di kume.”

¹⁶ Jesus fala elis: “I ka pirsis pa e bai. Bo da elis di kume.”

¹⁷ E falal: “No ka tene li si i ka son sinku pon ku dus pis.”

¹⁸ I fala elis: “Bo tisin elis li.”

¹⁹ I manda jinti sinta na paja, i toma ki sinku pon ku dus pis, i yalsa uju pa seu, i fala Deus obrigadu, i kebra pon, i da si disipulus; kilas da jinti.

²⁰ Tudu kume, e farta. E kuji ki restus ku sobra, e inci dozi kufu.

²¹ Numeru di omis ku kumel i kuas sinku mil, fora di minjeris ku mininus.

Jesus yanda riba di mar

²² Na ki ora Jesus fala si disipulus pa e kamba na barku, pa e ba ta bai dianti pa utru banda; el i fika pa dispidi jinti.

²³ I kaba dispidi elis, i subi na un monti pa ora dingidu. Te di noti i staba la inda, el son.

²⁴ Barku staba ja na metadi di mar. Maron na sutalba pabia bentu na binba kontra elis.

²⁵ Mandrugada Jesus kumsa na yanda riba di yagu pa bai pa elis.

²⁶ Disipulus ojal i na yanda riba di mar, e panta, e fala: “I kasisa!” E grita ku medu.

²⁷ Na ki ora Jesus fala elis: “Bo ten koraẑen, i ami. Ka bo medi.”

²⁸ Pedru ruspundi i falal: “Siñor, si i abo, mandan pa N bai riba di yagu pa N kontra ku bo.”

²⁹ I falal: “Bin.” Pedru ria na barku, i kumsa na yanda riba di yagu pa kontra ku Jesus,

³⁰ ma i sinti bentu forti, i panta, i kumsa na bai pa fundu, i grita, i fala: “Siñor, salban!”

³¹ Ki ora Jesus distindi mon, i pegal, i falal: “Omi di puku fe, pabia di ke ku bu duvida?”

³² Oca ke kamba na barku, bentu para.

³³ Kilis ku staba na barku finka juju si dianti, e fala: “Na bardadi abo i Fiju di Deus.”

³⁴ Oca ke kaba kamba mar, e ciga na tera di Jenesaré.

³⁵ Jinti di ki lugar raparal, e manda rekadu pa tudu teras na ki ladu. E tisil tudu kilis ku staba duenti,

³⁶ e pidil pa i disa elis, nin ki son pa e toka na beiña di si ropa. Tudu kilis ku tokaba nel e fika kuradu.