Mateus 12 - BIBLIA - traduson antigu in Krioulo

Lei di dia di diskansu

¹ Na un dia di diskansu Jesus na pasaba na bulaña. Si disipulus teneba fomi, e kumsa na rinka garan di arus, e na kume.

² Fariseus oja ke ke na fasi, e fala Jesus: “Jubi, bu disipulus na fasi kil ku lei tuji na dia di diskansu.”

³ I punta elis: “Nta bo ka lei ke ku Davi fasi, oca el ku si kumpañeris e teneba fomi?

⁴ I yentra na kasa di Deus, i kume pon sagradu, ma konformi lei i ka tenba diritu di kumel, nin si kumpañeris, ma son saserdotis.

⁵ Bo ka lei tambi na lei kuma na dia di diskansu saserdotis na kasa di Deus e ta kebra lei di diskansu, e ta fika sin kulpa?

⁶ N na konta bos kuma, i sta li un algin ku mas ten balur di ki kasa di Deus.

⁷ Si bo ntindiba ke ki signifika ki palabra ku Deus fala na Skritura: ‘Ke ku N misti i miserikordia, i ka sakrifisiu,’ bo ka ta kondena jinti ku ka ten kulpa.

⁸ Fiju di omi ta manda, te riba di dia di diskansu.”

Kura di un omi ku si mon muri

⁹ Jesus pasa pa utru lugar, i yentra na se kasa di juntamentu.

¹⁰ I staba la un omi ku tene un mon ku muri. Utru jinti ku staba la e misti ranja manera di keŝa di Jesus. E puntal: “No lei ta seta pa algin kura na dia di diskansu?”

¹¹ I punta elis: “Si un di bos tene karnel ku kai na koba na dia di diskansu, i ka ta bai tiral?

¹² Nta omi ka ten mas balur di ki un karnel? E ku manda, lei seta pa no fasi ben na dia di diskansu.”

¹³ I rabida i fala ki omi: “Distindi mon.” I distindil; i torna san suma ki utru.

¹⁴ Fariseus sai na kasa di juntamentu, e bai ruma pa jubi kuma ke pudi mata Jesus.

¹⁵ I bin sibi de kusa, i sai la. Manga di jinti bai ku el. I kura tudu duentis.

¹⁶ I da elis ordi forti pa ka e konta nada del,

¹⁷ pa i pudi sedu suma ku Deus fala na boka di anunsiadur Isaias:

¹⁸ “Ali ña servu ku N kuji, ku N kiri ciu, ku ta kontenta ña korson. N na pui ña Spiritu nel. I na bin avisa jinti di utru nasons aserka di julgamentu.

¹⁹ I ka na jusia nin i ka na bin grita; ningin ka na obi si fála na rua.

²⁰ I ka na kabanta kebra kana ku kumsa na kebra, nin i ka na paga paviu ku na fuma, te tempu ki na pui justisa ngaña vitoria.

²¹ Nasons na pui se speransa nel.”

Jesus ku Beelzebu

²² Jinti leba un omi ku teneba dimoniu pa Jesus; i segu, i mudu. Jesus kural; omi torna na oja, i na papia.

²³ Tudu jinti ku staba la e fika dimiradu, e punta: “Nta es i ka Fiju di Davi?”

²⁴ Fariseus obi ki kusa, e fala: “I ta tira dimoniu son pa puder di Beelzebu, ku sedu ŝef di dimonius.”

²⁵ Jesus ntindi se pensamentus, i fala elis: “Tudu renu ku dividi kontra si kabesa, i ta danadu. Tudu prasa, o familia, ku dividi kontra si kabesa, i ka ta nguenta.

²⁶ Si Satanas serka Satanas, i sta divididu kontra si kabesa. Kuma gora ku si renu pudi nguenta?

²⁷ Si N ta serka dimonius pa puder di Beelzebu, bo fijus ta serka elis pa puder di kin? E ku manda, elis propi ku na bin sedu bo juisis.

²⁸ Ma si N na serka dimonius ku Spiritu di Deus, i proba kuma renu di Deus ciga na bo metadi.

²⁹ “Kuma ku algin pudi yentra na kasa di un omi forti pa furta tudu ki tene si i ka maral purmeru? Son ora ki maral ki pudi furta tudu na si kasa.

³⁰ Kil ku ka sta ku mi i kontra mi. Kil ku ka na judan junta kusas, i na pajigal.

³¹ “E ku manda N na konta bos: kualker pekadu o palabra mau ku omi papia kontra Deus i pudi purdadu, ma palabra mau ku omi papia kontra Spiritu Santu i ka na purdadu.

³² Si algin fala un palabra kontra Fiju di omi, i ta purdadu, ma si algin papia kontra Spiritu Santu, i ka na purdadu, ne mundu nin na utru mundu.

Po ku si fruta

³³ “Bo ta fala po bon pabia si fruta i bon; o bo ta fala po ka bali pabia si fruta ka bali. I klaru kuma kada po ta kunsidu pa si fruta.

³⁴ Jorson di kobras! Suma bo sedu mau, kuma ku bo pudi papia bon kusa? Boka ta papia kusa ku inci korson tok i na darma.

³⁵ Omi bon ta tira kusas bon na bon rikesa ku sta nel. Omi mau ta tira kusas mau di maldadi ku sta nel.

³⁶ N na konta bos kuma, tudu palabra ku jinti papia amonton, e na da konta del na dia di julgamentu.

³⁷ I pabia di bu palabra ku Deus na justifikau; i pabia di bu palabra tambi ki na kondenau.”

Milagri di Jonas

³⁸ Utru pursoris di lei ku fariseus e papia ku Jesus, e falal: “Mestre, no misti pa bu mostranu un sinal.”

³⁹ I ruspundi elis, i fala: “E jinti di aos ku sedu mau, ki ka fiel pa Deus, e ta pidi sinal, ma e ka na dadu utru sinal fora di kil di anunsiadur Jonas.

⁴⁰ Suma ku Jonas staba tris dia ku tris noti na bariga di pis garandi, asin tambi ku Fiju di omi na bin sta tris dia ku tris noti bas di con.

⁴¹ Na dia di julgamentu jinti di Ninive na bin lanta kontra jinti di aos pa kondena elis, pabia, oca e obi anunsiu di Jonas, e ripindi. Ali un algin li ku sedu mas di ki Jonas.

⁴² Tambi raiña di sul na bin lanta na dia di julgamentu kontra jinti di aos pa kondena elis, pabia i sai la lunju na si tera pa bin obi jiresa di Salomon. Ali un algin li ki mas Salomon.

Spiritu mau ta riba pa si kasa

⁴³ “Ora ku spiritu mau sai na un algin, i ta fika i na yanda na lugar seku, i na buska kau di sinta. Si i ka ojal,

⁴⁴ i ta fala: ‘N na riba pa ña kau ku N saiba nel.’ Ora ki ciga, i ojal vaziu, baridu, ben rumadu,

⁴⁵ i ta bai, i bai buska mas seti spiritu pior di ki el; e ta yentra e mora la. Na kabantada, vida di ki algin i ta sedu pior di ki na kumsada. Asin ki na bin sedu ku jinti mau de tempu.”

Familia di Jesus

⁴⁶ Oca Jesus na papiaba inda ku jinti, si mame ku si ermons ciga, e sikidu fora, e misti papia ku el.

⁴⁷ Algin falal: “Ala bu mame ku bu ermons la fora, e misti papia ku bo.”

⁴⁸ Jesus ruspundi, i punta ki algin ku tisil rekadu: “Kin ki ña mame? Kin ki ña ermons?”

⁴⁹ I culi dedu pa si disipulus, i fala: “Esis ki ña mame ku ña ermons,

⁵⁰ pabia kil ku ta fasi vontadi di ña Pape ku sta na seu, el ki ña ermon macu, ña ermon femia ku ña mame.”