Mateus 11 - BIBLIA - traduson antigu in Krioulo

Jon Batista manda dus disipulu pa Jesus

¹ Oca Jesus kaba da nsinamentu pa si dozi disipulu, i sai di la, i na nsina, i na konta palabra di Deus na prasas di Galileia.

² Jon Batista staba na kalabus, i obi e na fala di kusas ku Kristu fasi. I manda dus di si disipulus ku e purgunta:

³ “Abo i kil ku na binba, o no na pera inda utru?”

⁴ Jesus ruspundi, i fala elis: “Bo bai konta Jon ke ku bo obi, ku ke ku bo oja.

⁵ Kilis ku segu e na oja; mankus na yanda; kilis ku tene mpincu na kuradu; kilis ku surdu na obi; kilis ku muri na lanta; koitadis na kontadu Bon Noba.

⁶ Sortiadu i kil ku ka pirdi fe na mi.”

⁷ Dipus di disipulus di Jon bai, Jesus kumsa na fala pobu aserka di Jon, i punta: “Ke ku bo bai jubi na lala? Un kana ku bentu na balansa?

⁸ Ke ku bo bai jubi? Un omi ku bisti ropa finu? Kilis ku ta bisti ropa finu, na kasa di reis ke ta sta nel.

⁹ Ke ku bo sai pa bai jubi? Un anunsiadur? Sin, N na konta bos kuma i mas di ki anunsiadur,

¹⁰ pabia es i kil ku Skritura fala del: ‘N na manda ña servu bu dianti ku na kumpu kamiñu pa bo.’

¹¹ Na bardadi N na konta bos kuma, na metadi di omis i ka ten algin ku mas Jon Batista, ma kil ku mas pikininu na renu di seu i mas el garandi.

¹² Disna di tempu di Jon Batista te gosi, renu di seu na tomadu pa forsa; kilis ku na fasi forsa e ta toma konta del.

¹³ Lei ku tudu anunsiaduris e anunsia te na tempu di Jon.

¹⁴ Si bo misti fia, i es ki Elias ku na binba.

¹⁵ Kin ku tene oreja pa obi, pa i sukuta.

¹⁶ “Kal algin ku N na kompara jinti di gosi ku el? E parsi ku mininus ku sinta na rua di prasa, e na fala ŋutru:

¹⁷ ‘No toka bos flauta, bo ka baja! No kanta bos kantiga tristi, bo ka cora!’

¹⁸ Pabia Jon bin, i ka kume, i ka bibi biñu; e fala kuma i tene dimoniu.

¹⁹ Fiju di omi bin, i ta kume, i bibi; e fala: ‘Es i ta kume dimas, kaba i bibidur, amigu di kobraduris di mpustu ku jinti di mau nomi.’ Ma jiresa di Deus ta mostradu kuma i sertu pabia di si rusultadu.”

Prasas di jinti ku ka ripindi

²⁰ Jesus kumsa na raprindi prasas nunde ki fasiba milagris mas ciu, pabia jinti la e ka ripindi. I fala elis:

²¹ “Ai di bo, Korasin! Ai di bo, Betsaida! Si milagris ku fasidu na bo metadi fasiduba na prasas di Tiru ku Sidon, se moraduris ta ripindiba ja disna, tok e bisti saku, e sinta na sinsa.

²² E ku manda N na fala bos kuma, Tiru ku Sidon na oja mas miserikordia na dia di julgamentu di ki bos.

²³ Abo Kafarnaun ku mistiba subi te na seu, bu na baŝadu te na nfernu, pabia milagris ku fasidu na bo, si e fasiduba na Sodoma, i ta kontinuaba te aos.

²⁴ N na fala bos kuma, kastigu di Sodoma na bin sedu mas pikininu di ki di bos na dia di julgamentu.”

Diskansu pa jinti kansadu

²⁵ Na ki ora Jesus fala: “Obrigadu, ña Pape, Siñor di seu ku tera, pabia bu sukundi e kusas di jinti jiru i ntindidu, bu mostra mininus el.

²⁶ I bardadi, ña Pape, pabia asin ku bu misti fasi.

²⁷ Ña Pape ntregan tudu kusa. Ningin ka kunsi Fiju si i ka si Pape; ningin ka kunsi Pape si i ka si Fiju, ku kil ku Fiju misti mostral el.

²⁸ Bo bin pa mi, abos tudu ku kansa ku kargu pisadu; N na diskansa bos.

²⁹ Bo toma ña kanga pa bos, bo nsina di mi, pabia ami i mansu, umildi di korson; bo ta bin oja diskansu pa bo alma,

³⁰ pabia ña kanga i sabi, ña kargu i lebi.”