Mateus 10 - BIBLIA - traduson antigu in Krioulo

Jesus manda si dozi disipulu

¹ Jesus coma si dozi disipulu, i da elis puder pa serka spiritu mau, pa kura tudu koldadi duensa ku frakesa.

² Nomi di ki dozi apostolu i es: Purmeru, Simon ku comadu Pedru, ku André si ermon; Tiagu, fiju di Zebedeu, ku Jon si ermon;

³ Filip ku Bartolomeu; Tome ku Mateus, kobradur di mpustu; Tiagu, fiju di Alfeu, ku Tadeu;

⁴ Simon di partidu ku mistiba indipendensia, ku Judas Iskariotis, kil ku falsia Jesus.

⁵ Jesus manda ki dozi ku e ordi: “Ka bo bai pa tera di jinti ki ka judeus, nin ka bo yentra na prasas di samaritanus,

⁶ ma bo bai pa jinti di Israel ku pirdi suma karnel.

⁷ Na kamiñu bo kumsa na konta: ‘Renu di seu ciga.’

⁸ Bo kura duentis, bo lantanda mortus, bo kura kilis ku tene mpincu, bo serka dimonius na jinti. Di grasa ku bo risibi; di grasa ku bo na da.

⁹ Ka bo leba uru, prata o kobri na bo bolsu.

¹⁰ Ka bo leba pasta, nin dus kamisa, nin sapatu, nin manduku, pabia tarbajaduris ten diritu di se sustentu.

¹¹ Ora ku bo ciga na un prasa o tabanka, bo buska algin di fiansa; bo ta gasija na si kasa te ora ku bo na sai la.

¹² Ora ku bo na yentra na un kasa, bo fala manteña di pas pa kilis ku sta la.

¹³ Si e seta, bo pas ta fika ku elis, ma si e ka seta, bo ta leba bo pas.

¹⁴ Si na un lugar ningin ka risibi bos, nin e ka obi bo palabra, ora ku bo na sai na ki kasa o prasa, bo sakudi puera di bo pe.

¹⁵ Na bardadi N na konta bos kuma, na dia di juisu, i na bin ten menus kastigu pa jinti di Sodoma ku Gomora di ki jinti di ki prasa.

¹⁶ Ali N na manda bos suma karnel na metadi di lubu; gosi bo dibi di jiru suma kobra, mansu suma pumba.

¹⁷ Bo toma sintidu ku jinti, pabia e na bin leba bos na Konseliu, e na bin suta bos na se kasas di juntamentu.

¹⁸ Pabia di mi bo na lebadu dianti di gubernaduris ku reis, pa bo pudi sedu tustumuñas pa elis ku kilis ku ka sedu judeu,

¹⁹ ma, ora ku bo ntregadu, ka bo kuda kuma ku bo na papia, o ke ku bo na fala, pabia na ki ora bo na dadu palabras ku bo na fala.

²⁰ I ka abos ku na papia, ma Spiritu di bo Pape, el ku na papia na bos.

²¹ “Un ermon na bin ntrega si propi ermon pa i matadu; papes na ntrega se propi fijus; fijus na lanta kontra papes, e na pui pa e matadu.

²² Tudu jinti na nfastia bos pabia di ña nomi, ma kil ku fika firmi te na fin i na salba.

²³ Ora ke na pirsigi bos na un prasa, bo kuri pa utru, pabia na bardadi N na konta bos kuma, antis di bo kaba kurkuri prasas di Israel, Fiju di omi na ciga.

²⁴ Disipulu i ka mas si mestre, nin kriadu i ka mas si patron.

²⁵ Basta pa disipulu sta suma si mestre, pa kriadu sta suma si patron. Si e coma dunu di kasa Beelzebu, ku fadi restu di familia!

²⁶ “Asin, ka bo ten medu delis, pabia i ka ten nada kubridu ku ka na bin diskubridu, nin sukundidu ku ka na bin sibidu.

²⁷ Ke ku N konta na sigridu, bo papial di dia; kil ku kontadu na oreja, bo kontal riba di kankra.

²⁸ Ka bo medi kilis ku ta mata kurpu, e ka pudi mata alma, ma bo medi Deus ku pudi mata kurpu ku alma na nfernu.

²⁹ Nta e ka ta bindi dus jamba pa mil pes? Ma nin un delis ka ta kai na con sin bo Pape ka seta.

³⁰ Te kabelu di bo kabesa i kontadu tudu.

³¹ Ka bo ten medu, pabia bo ten mas balur di ki manga di kacu.

³² Asin, tudu kil ku konta dianti di jinti kuma el i di mi, N na konfirma dianti di ña Pape ku sta na seu kuma el i di mi,

³³ ma kil ku negan dianti di jinti, tambi N na negal dianti di ña Pape ku sta na seu.

³⁴ “Ka bo pensa kuma N bin pa tisi pas na tera. N ka bin tisi pas, ma N tisi spada.

³⁵ N bin pa dividi omi kontra si pape, fiju femia kontra mame, minjer kontra mame di si omi.

³⁶ Asin inimigu di algin i ta sedu si propi familia.

³⁷ Kin ku gosta di si pape o mame mas di ki mi, i ka mersi sedu di mi; kin ku gosta di si fiju macu o femia mas di ki mi i ka mersi sedu di mi.

³⁸ Kin ku ka toma si krus pa bin ña tras, i ka mersi sedu di mi.

³⁹ Kin ku pega si vida i na pirdil, ma kin ku pirdi si vida pabia di mi, i na ojal.

⁴⁰ “Kin ku risibi bos, i ami ki risibi; kin ku risibin, i risibi kil ku mandan.

⁴¹ Kin ku risibi un anunsiadur pabia el i anunsiadur, i na risibi pagamentu suma anunsiadur; kin ku risibi un justu pabia i un justu, i na risibi pagamentu suma un justu.

⁴² Kualker algin ku ciga di da, nin si i un kopu di yagu fresku pa un de mas puku, pabia el i ña disipulu, na bardadi N na konta bos kuma, di nin un manera i ka na pirdi si pagamentu.”