Markus 9 - BIBLIA - traduson antigu in Krioulo

¹ I fala elis mas: “Na bardadi N na konta bos kuma, di kilis ku sta li, utrus ka na muri tok e oja Deus kumsa rena ku puder.”

Jesus torkia parsensa di si gloria

² Dipus di seis dia Jesus toma Pedru, Tiagu ku Jon, i leba elis aparti pa un monti altu. I bai torkia parsensa la se dianti.

³ Si ropa bida branku fandan, i na lampra, suma ku nin un labandera na mundu ka pudi brankisil.

⁴ Logu e oja Elias ku Moisés na papia ku Jesus.

⁵ Pedru rabida i fala Jesus: “Mestre, i bon manera ku no sta li. No ta fasi tris baraka, un pa bo, utru pa Moisés, utru pa Elias.”

⁶ Na bardadi, i ka sibiba ke ki dibi di fala, pabia elis e staba ku garandi medu.

⁷ Na ki ora i bin un nuven ku kubri elis ku si sombra. E obi un fála ku sai del, i fala: “Es i ña Fiju ku N kiri ciu. Bo sukutal.”

⁸ E jubi-jubi na roda, e ka oja mas ningin; Jesus son ku staba ku elis.

⁹ Oca ke na riaba na monti, i da elis ordi pa ka e konta ningin ke ke oja, tok Fiju di omi lanta di mortu.

¹⁰ E obdisil, ma e na punta ŋutru ke ku sedu “lanta di mortu”.

¹¹ E bai punta Jesus: “Pabia di ke ku pursoris di lei fala kuma Elias ten ku bin purmeru?”

¹² Jesus ruspundi, i fala elis: “Na bardadi, Elias na bin purmeru, pa pui tudu na ordi. Nta pabia di ke ku Skritura fala di Fiju di omi kuma i na sufri ciu, i na njutidu?

¹³ N na konta bos kuma Elias bin ja. E fasil tudu ke ke misti, suma ku Skritura fala del.”

Kura di rapas ku tene spiritu mau

¹⁴ Oca ke ciga nunde ku ki utru disipulus staba, e oja manga di jinti na se roda, ku utru pursoris di lei ku na diskutiba ku elis.

¹⁵ Ki jinti kaba oja Jesus son, e fika spantadu, e kuri pa el, e falal manteña.

¹⁶ I punta elis: “Ke ku bo na diskuti ku elis?”

¹⁷ Un omi na metadi di ki jinti ruspundi, i falal: “Mestre, N tisiu ña fiju ku tene un spiritu mau ku pul i mudu.

¹⁸ Ora ki pañal, i ta batil na con tok boka ta sukuma, i ta ñeme dinti; kurpu ta tesu ku el. N pidi bu disipulus pa e tiral ki spiritu, ma e ka pudi.”

¹⁹ Jesus fala elis: “Abos i jinti sin fe! Te kal dia ku N na sta ku bos? Te kal tempu ku N ten ku nguenta bos? Bo tisin el.”

²⁰ E lebal el. Spiritu kaba oja Jesus son, i sakudi rapas ku forsa. I kai na con, i fika i na rola; sukuma na sai na boka.

²¹ Jesus punta pape di rapas: “Kantu tempu ki sta asin?” Pape ruspundil: “Disna di pikininu.

²² Manga di bias spiritu ta batil na fugu o na yagu, pa matal, ma si bu pudi fasi kualker kusa pa el, ten pena di nos, bu judanu.”

²³ Jesus falal: “Si bu fia. Tudu pudi sedu pa kil ku ten fe.”

²⁴ Logu pape di mininu grita ku larmas, i fala: “N fia. Burin fe ku na faltan!”

²⁵ Jesus oja kuma manga di jinti na junta riba delis. I raprindi spiritu mau, i fala: “Spiritu surdu-mudu, i ami ku mandau, sai nel! Ka bu riba mas pa el.”

²⁶ Spiritu grita, i sakudi rapas ku forsa, i sai. Rapas fika suma kin ku muri, tok manga di jinti fala kuma i muri.

²⁷ Jesus pegal na mon, i lantandal; i sikidu.

²⁸ Oca ku Jesus yentra na kasa, si disipulus puntal aparti: “Ke ku manda no ka pudiba tiral?”

²⁹ Jesus ruspundi elis: “E koldadi spiritu ka ta sai di nin un manera, son ku orason [ku junjun].”

Jesus torna fala di si mortu

³⁰ Jesus ku si disipulus sai di la, e kortela na Galileia. I ka mistiba pa ningin sibi,

³¹ pabia i na nsinaba si disipulus, i fala elis: “Fiju di omi na bin ntregadu na mon di omis. E na matal. Tris dia dipus di muri, i na bin lanta di mortu.”

³² Elis e ka ntindiba ki palabras; e medi puntal.

Kin ku na sedu ŝef?

³³ I ciga na prasa di Kafarnaun. Oca ki yentra na kasa i punta elis: “Ke ku bo na diskutiba na kamiñu?”

³⁴ E kala tudu, pabia na kamiñu e na diskutiba kal delis ku na sedu ŝef.

³⁵ El i sinta, i coma ki dozi disipulu, i fala elis: “Si algin misti tene purmeru lugar, i dibi di toma ultimu lugar, i sedu kriadu di tudu jinti.”

³⁶ I toma mininu, i pul na se metadi, i barsal, i fala elis:

³⁷ “Kil ku risibi un de mininus na ña nomi, i ami ki risibi. Kil ku risibin, i ka ami ki risibi, ma i kil ku mandan.”

Kin ku ka sta kontra nos i sta ku nos

³⁸ Jon falal: “Mestre, no oja un omi ku na serka dimonius na jinti na bu nomi. No falal pa ka i fasil, suma i ka di no grupu.”

³⁹ Jesus ruspundi: “Ka bo tujil, pabia ningin ka pudi fasi milagri na ña nomi, dipus i torna fala mal di mi.

⁴⁰ Kin ku ka sta kontra nos i sta ku nos.

⁴¹ N na konta bos bardadi, kualker algin ku da bos un kopu di yagu pa bibi pabia bo sedu di Kristu, di nin un manera i ka na pirdi si pagamentu.

Tentason pa fasi pekadu

⁴² “Tudu kil ku fasi un de pikininus ku fia na mi pa i kai na pekadu, i minjor pa i maradu un pedra garandi di muiñu na garganti, i botadu na mar.

^43-44 Si bu mon pou pa bu peka, kortal. I mas minjor pa bu yentra na vida ku falta di un mon di ki bu bai pa nfernu ku dus mon, pa fugu ku nunka ka ta paga.

^45-46 O si bu pe pou pa bu peka, kortal. I mas minjor pa bu yentra na vida ku falta di un pe, di ki bu tene dus pe, bu botadu na nfernu, na fugu ku nunka ka ta paga.

⁴⁷ O si bu uju pou pa bu peka, rinkal. I mas minjor bu yentra na renu di Deus ku un uju son, di ki bu tene dus uju, bu botadu na nfernu,

⁴⁸ nunde ku se bicu ka ta muri, fugu nunka ka ta paga.

⁴⁹ Kada un na tempradu ku fugu, suma ku sal ta tempra karni di sakrifisiu.

⁵⁰ Sal i bon, ma si i pirdi si gustu, ku ke ku bo na pul mas pa i salga? Bo tene sal na bo vida, pa bo sta ku ŋutru na pas.”