Markus 8 - BIBLIA - traduson antigu in Krioulo

Jesus alimenta 4.000 jinti

¹ Na ki dias, manga di jinti junta utru bias. E ka teneba nada di kume. Jesus coma si disipulus, i fala elis:

² “N ten pena de jinti, pabia e sta ja tris dia ku mi; nada di kume e ka tene.

³ Si N manda elis pa kasa sin kume nada, e na dismaja na kamiñu, pabia utrus bin di lunju.”

⁴ Si disipulus puntal: “Nunde ku algin pudi oja pon ku ciga pa da tudu e jinti li na lala?”

⁵ Jesus punta elis: “Kantu pon ku bo tene?” E falal: “Seti.”

⁶ I manda pa ki jinti sinta na con. I toma ki seti pon, i fala Deus obrigadu, i kebra elis, i da si disipulus pa e rapati. Elis e rapati pa tudu ki jinti.

⁷ E teneba tambi un bokadu di moño. I fala Deus obrigadu pa elis, i manda pa e rapati elis tambi.

⁸ Tudu jinti kume tok e farta. E inci seti balai ku padas ku sobra.

⁹ Jinti ku kume seduba kuas kuatru mil. Dipus, Jesus dispidi elis,

¹⁰ i kamba janan na barku ku si disipulus, i bai pa ladu di Dalmanuta.

Sinal di seu

¹¹ Utru fariseus sai, e kumsa na diskuti ku el. Pa spurmental, e pidil un sinal di seu.

¹² I da folgu fundu dentru del, i punta: “Pa ke ku jinti di aos na pidi un sinal? Na bardadi, N fala bos kuma e jinti e ka na dadu nin un sinal.”

¹³ I disa elis, i torna mbarka, i bai pa utru banda.

Fermentu di fariseus

¹⁴ Disipulus diskisiba di leba pon. Na barku e teneba son un pon.

¹⁵ Jesus avisa elis, i fala: “Bo toma sintidu, bo libra di fermentu di fariseus ku fermentu di Erodis.”

¹⁶ E kumsa na papia entri elis, e fala: “I suma no ka tene pon.”

¹⁷ Jesus ntindi tudu, i punta elis: “Ke ku manda bo na miskiña, bo na fala kuma bo ka tene pon? Bo ka rapara, nin bo ka ntindi inda? Bo kabesa sta ficadu?

¹⁸ Bo tene uju, bo ka ta oja? Bo tene oreja, bo ka ta obi? Nin bo ka lembra?

¹⁹ Oca ku N kebra sinku pon pa rapati sinku mil, kantu kufu di padas ku bo kuji?” E falal: “Dozi.”

²⁰ “Oca ku N kebra ki seti pon pa rapati kuatru mil, kantu balai di padas ku bo kuji?” E ruspundil: “Seti balai.”

²¹ I punta elis: “Kuma ku bo ka ntindi inda?”

Jesus kura segu di Betsaida

²² I ciga na Betsaida. Jinti lebal un segu, e pidil pa i toka nel.

²³ Jesus pega segu na mon, i lebal pa fora di tabanka. Dipus i kuspil na ujus, i pui mon riba del, i puntal: “Bu na oja kualker kusa?”

²⁴ I yalsa uju, i fala: “N na oja jinti; e parsi suma pos ku na yanda.”

²⁵ Jesus torna pui mon utru bias riba di si ujus. Omi jubi diritu, i fika kuradu, i na ojaba tudu kusa klaru.

²⁶ Jesus mandal pa kasa, i falal: “Ka bu yentra na tabanka.”

Pedru diklara kin ki Jesus

²⁷ Jesus bai ku si disipulus pa tabankas di Sesareia di Filip. Na kamiñu i punta elis: “Kin ku jinti ta fala kuma N sedu?”

²⁸ E ruspundil: “Utrus ta fala abo i Jon Batista; utrus ta fala abo i Elias; utrus inda ta fala abo i un di anunsiaduris.”

²⁹ I punta elis: “Ma abos, kin ku bo fala kuma N sedu?” Pedru ruspundi, i falal: “Abo i Mesias.”

³⁰ Jesus da elis ordi pa ka e konta ningin nada del.

Jesus konta kusa di si mortu

³¹ I kumsa na nsina elis, i fala kuma Fiju di omi ten ku sufri ciu. Garandis ku ŝefis di saserdoti ku pursoris di lei na negal. I na matadu. Dipus di tris dia i na lanta di mortu.

³² I konta es klaru pa elis. Pedru lebal na un ladu, elis dus, i kumsa na raprindil.

³³ Jesus rabida, i jubi pa si disipulus, i raprindi Pedru, i falal: “Sai ña dianti, Satanas, pabia bu pensamentu i ka bin di Deus, ma i di omi.”

Kada kin dibi di leba si krus

³⁴ Dipus i coma jinti tudu, ku si disipulus, i fala elis: “Si algin misti bin ku mi, i ten ku nega si kabesa, i lambu si krus, i sigin.

³⁵ Kin ku misti salba si vida i na pirdil, ma kin ku pirdi si vida pa amor di mi ku di Bon Noba i na salbal.

³⁶ Ke ku un omi ta purbita si i ngaña mundu ntidu, i pirdi si kabesa propi?

³⁷ O ke ku algin pudi da pa torna liberta si alma?

³⁸ Kin ku ten borgoña di mi ku ña palabra, na metadi di jinti mau i infiel ne mundu di aos, Fiju di omi tambi na ten borgoña del, ora ki bin na gloria di si Pape, ku si santu anjus.”