Markus 4 - BIBLIA - traduson antigu in Krioulo

Komparason di sumiadur

¹ Utru bias Jesus kumsa na nsina na praia. Manga di jinti junta lungu del tok i kamba na un barku ku staba na mar, i sinta. Jinti tudu firma na praia.

² I nsina elis manga di kusa ku komparason. Oca i na nsina elis, i fala:

³ “Bo sukuta. Un labradur sai pa bai waga simentera.

⁴ Oca ki na wagal, utru kai lungu di kamiñu. Kacus ria e kumel.

⁵ Utru kai na pedra, kau ku ka tene reia ciu; i nasi dipresa pabia reia ka fundu.

⁶ Sol sai, i kemal; planta seku pabia i ka teneba rais.

⁷ Utru kai na metadi di fidida; fidida kirsi, i rodial, i pertal tok i ka pudi padi.

⁸ Utru kai na bon terenu, i lanta, i kirsi, i da frutu; utru padi te trinta bias mas di ki kil ku sumiadu; utru da sesenta bias, utru da sen bias.”

⁹ I kaba, i fala elis: “Kin ku tene oreja pa obi, pa i sukuta.”

¹⁰ Oca ki fika el son, si dozi disipulu, ku utru jinti ku fikaba ku el, e puntal kusa di ki komparason.

¹¹ Jesus fala elis: “Abos, Deus misti pa bo kunsi sigridu di si renu, ma jinti di fora e ta obi tudu kusa son ku komparason,

¹² pa e fasi suma Skritura fala: ‘E pudi jubi, ma e ka na rapara; e pudi obi, ma e ka na ntindi. Si i ka asin, e ta rabida pa Deus; i ta purda elis se pekadu.’ ”

¹³ I punta elis: “Bo ka ntindi e komparason? Nta kuma ku bo pudi ntindi tudu utru komparason?

¹⁴ Ki sumiadur i ta sumia palabra di Deus.

¹⁵ Simentera ku kai lungu di kamiñu signifika kilis ku palabra sumiadu nelis, ma e kaba obil son, Satanas bin tira ki palabra ku sumiadu na se korson.

¹⁶ I asin tambi ku kilis ku risibi simentera riba di pedra; e ta obi palabra, e ta risibil ku kontentamentu,

¹⁷ ma e ka tene rais fundu; e ka ta tarda. Si kansera bin, jinti lanta kontra elis pabia di ki palabra, ki ora e ta disvia.

¹⁸ Kilis ku risibi palabra na metadi di fidida, e obi palabra,

¹⁹ ma e ta kuda ciu na kusas de mundu; rikesa ta ngana elis; e ta misti manga di kusa. Tudu e pensamentu ta perta palabra, i ta tujil padi.

²⁰ Kilis ku risibi simentera na terenu bon i kilis ku obi palabra, e setal, e padi frutu; un i padi trinta, utru padi sesenta, utru padi te sen bias.”

Komparason di kanderu

²¹ Jesus punta elis: “Nta algin ta bin ku kanderu pa mitil bas di balai o bas di kama? I ka ta pul na un kau altu?

²² I ka ten kusa sukundidu ku ka na sai na lus. Tudu ku fasidu na sigridu i na diskubridu.

²³ Kin ku tene oreja pa obi, pa i sukuta.”

²⁴ I fala elis tambi: “Bo para sintidu na kil ku bo na obi. Midida ku bo midi ku el, el ku jinti na midi bos ku el; e na buri inda mas pa bos.

²⁵ Kil ku tene, i na buridu, ma kil ku ka tene, te ki kusa ki tene i na tiradu el.”

Komparason di simentera

²⁶ I torna fala: “Renu di Deus i asin. Un omi waga simentera na con.

²⁷ Konformi ki na durmi di noti, i na lanta di dia, ki simentera na nasi, i kirsi; omi ka sibi kuma ki yanda tok i kirsi.

²⁸ I con propi ku ta da frutu; paja ta sai purmeru; dipus i ta preña; na kabantada i ta padi.

²⁹ Ora ku frutu burmeju, i ta kumsa kebur, pabia tempu di kebra ciga.”

Komparason di simentera di mostarda

³⁰ Jesus torna punta: “Ke ku no pudi fala kuma renu di Deus parsi ku el? Ke ku no pudi komparal ku el?

³¹ I parsi simentera di mostarda. I mas pikininu di tudu simentera,

³² ma ora ki sumiadu, i ta kirsi, i ta mas tudu utru planta na orta; i ta larga ramu garandi, tok kacus ta fasi se kasa nel, bas di si sombra.”

³³ I fika i na konta jinti palabra ku manga di komparason suma es, konformi e pudi ntindi.

³⁴ I ta papiaba ku elis son ku ditus, ma ora ki staba son ku si disipulus i ta splika elis tudu.

Jesus kalma mar

³⁵ Na ki dia, oca ku sol na kai, Jesus fala si disipulus: “No kamba pa utru banda.”

³⁶ E fika jinti, e leba Jesus na barku ki sintaba nel. Utru barkus bai ku el tambi.

³⁷ Turbada garandi lanta, ku bentu; maron na kamba tok barku na inci.

³⁸ Jesus na durmiba na popa, ku kabesa riba di turbuseru. E kordal, e puntal: “Mestre, bu ka oja kuma no na muri?”

³⁹ I korda, i papia risu ku bentu, i fala mar: “Kala, bu keta.” Bentu para; mar torna tudu ketu.

⁴⁰ I punta elis: “Ke ku manda bo panta asin? Bo ka fiansa na mi inda?”

⁴¹ E panta dimas, e punta ŋutru: “E omi i kin ku te bentu ku mar ta obdisi?”