Markus 3 - BIBLIA - traduson antigu in Krioulo

Jesus kura un omi ku si mon muri

¹ Jesus torna yentra na kasa di juntamentu. I tenba un omi la ku si mon muri.

² Utru jinti na peraba pa jubi si Jesus na kural na dia di diskansu, pa e pudi akusal.

³ Jesus fala omi ku si mon muri: “Lanta, bu bin li na metadi.”

⁴ I punta ki jinti: “Lei fala pa no fasi ben na dia di diskansu o pa no fasi mal? pa no salba vida o pa no mata?” E kala.

⁵ Jesus jubi elis na roda, ku raiba, ma tambi ku tristesa, manera ke risu korson. I fala omi: “Distindi bu mon.” I distindil; i torna san suma ki utru.

⁶ Fariseus sai, e bai junta ku jinti di partidu di Erodis pa bai filanta kuma ke pudi mata Jesus.

Jesus kura jinti lungu di Mar di Galileia

⁷ Jesus bai ku si disipulus pa praia. Manga di jinti bai si tras, di Galileia, Judeia,

⁸ Jerusalen, Idumeia, ku utru banda di riu Jordon, ku tera pertu di Tiru ku Sidon. Ki jinti tudu e obi di garandi kusas ku Jesus fasi, e bai pa el. Jinti ciu,

⁹ tok Jesus fala si disipulus pa e ranjal barku pikininu pa e ka pertal dimas.

¹⁰ Manera ki kuraba manga di jinti, tudu duentis na pinca ŋutru pa e pudi ciga e toka nel.

¹¹ Kilis ku teneba spiritu mau, si e ojal, e ta kai si dianti, e grita: “Abo i Fiju di Deus!”

¹² I fala elis risu pa ka e konta kin ki el.

Jesus kuji dozi apostolu

¹³ Jesus subi na monti, i coma kilis ki mistiba. E bai pa el.

¹⁴ I tira dozi na se metadi, i coma elis apostolus, pa e sta juntu ku el, pa i pudi manda elis pa e konta palabra di Deus,

¹⁵ tambi pa e ten puder pa tira dimoniu na jinti.

¹⁶ Ali se nomis: Simon ku Jesus da nomi di Pedru,

¹⁷ Tiagu ku si ermon Jon, fijus di Zebedeu, ki pui nomi di Boanerjes, ku signifika fijus di turbada;

¹⁸ André, Filip, Bartolomeu, Mateus, Tome, Tiagu, fiju di Alfeu, Tadeu, Simon di partidu ku misti indipendensia,

¹⁹ ku Judas Iskariotis, kil ku ntregal mas tardi.

²⁰ Jesus yentra na un kasa. Jinti torna junta ciu tok Jesus ku si disipulus ka tenba manera di kume.

²¹ Oca si familia obi de kusa, e bai buskal, pabia jinti na fala kuma si kabesa ka sta diritu.

²² Pursoris di lei ku binba di Jerusalen e fala: “Beelzebu ku yentral.” E fala tambi: “Ŝef di dimonius ta dal puder pa tira dimoniu na jinti.”

²³ Jesus coma elis, i fasi elis un komparason, i punta elis: “Kuma ku Satanas pudi tira Satanas fora?

²⁴ Si jinti di un renu e dividi entri elis, ki renu ka pudi nguenta.

²⁵ Si un familia dividi entri elis, ki familia ka pudi nguenta.

²⁶ Nta si Satanas ten divison ku gera na si renansa, i ka pudi nguenta; i ten ku bin kaba.

²⁷ Ningin ka pudi yentra na kasa di omi ku ten forsa, pa furta kusa ki tene; son si i mara ki omi purmeru ki pudi furta tudu na si kasa.

²⁸ “Na bardadi N na konta bos kuma, Deus i ta purda jinti tudu pekadu, ku tudu palabra mau ke fala kontra el Deus,

²⁹ ma kil ku papia mal kontra Spiritu Santu, nunka i ka na purdadu. I na fika ku si pekadu ntidu.”

³⁰ Jesus fala asin pabia e na falaba kuma i tene spiritu mau.

Familia di Jesus

³¹ Si ermons ku si mame bin ciga, e fika fora, e manda comal.

³² Manga di jinti sinta lungu del. Jinti falal: “Ala bu mame ku bu ermons e sta la fora, e na buskau.”

³³ I ruspundi elis, i punta: “Kin ki ña mame ku ña ermons?”

³⁴ I jubi pa jinti ku sinta pertu del, i fala: “I esis ku sedu ña mame ku ña ermons.

³⁵ Kil ku ta fasi suma ku Deus misti, el ki ña ermon macu, ña ermon femia, ku ña mame.”