Markus 16 - BIBLIA - traduson antigu in Krioulo

Jesus lanta di mortu

¹ Oca dia di diskansu pasa, Maria Madalena, Salomé ku Maria, mame di Tiagu, e kumpra purfumu pa bai unta kurpu di Jesus.

² Na purmeru dia di semana e bai sedu pa koba, oca sol kumsa na lanta.

³ Na kamiñu e na punta ŋutru: “Kin ku na rolanu pedra na boka di koba?”

⁴ Ma oca e yalsa uju, e rapara kuma ki pedra, ku garandi ba dimas, i tiraduba ja.

⁵ E yentra na koba, e oja un rapas sinta na ladu direita; i bisti ropa kumpridu, branku. E panta.

⁶ I fala elis: “Ka bo panta. Bo na buska Jesus di Nazaré ku krusifikadu. I lanta; i ka sta li. Ali lugar nunde ke pulba.

⁷ Bo bai, bo fala si disipulus, ku Pedru, kuma el i na bai bo dianti pa Galileia. La bo na ojal suma ki falaba bos.”

⁸ E sai na koba dipresa, e kuri, pabia e tenba medu ku spantu. E ka fala ningin nada pabia e medi. [

Jesus parsi pa Maria Madalena

⁹ Oca ku Jesus lanta di mortu parmaña sedu na purmeru dia di semana, i parsi purmeru pa Maria Madalena, kil ki tira seti dimoniu nel.

¹⁰ Maria bai konta kilis ku ta yandaba ku Jesus. E staba tristi, e na cora.

¹¹ Oca ke obi kuma i sta bibu, kuma Maria ojal, e ka fia.

Jesus parsi pa dus disipulu

¹² Dipus, Jesus parsi ku utru parsensa pa dus delis ku staba na kamiñu pa bai pa se tabanka.

¹³ E bai konta ki utrus, ma e ka fia inda.

Jesus parsi pa si onzi disipulu

¹⁴ Pa kabantada i parsi pa ki onzi, oca e staba na mesa. I kulpa elis pa se falta di fe ku duresa di korson, pabia e ka fia na kilis ku ojal dipus di i lanta di mortu.

¹⁵ I fala elis: “Bo bai pa tudu mundu, bo konta Bon Noba pa tudu jinti.

¹⁶ Kin ku seta, i batisadu, i na sedu salbu, ma kil ku ka setal i na kondenadu.

¹⁷ E sinal na kumpaña kilis ku fia: na ña nomi e na tira dimonius na jinti; e na papia nobu linguas;

¹⁸ e na pega na kobras; si e bibi kualker kusa ku ta mata, i ka na fasi elis nin danu; e na pui mon riba di duentis; e ta san.”

Jesus subi pa seu

¹⁹ Dipus di Siñor Jesus papia ku elis, i lebadu pa seu, i sinta na mon direita di Deus.

²⁰ Disipulus bai, e konta palabra di Deus na tudu parti. Siñor tarbaja juntu ku elis, i konfirma se palabra ku milagris ku na kumpañalba.]