Markus 15 - BIBLIA - traduson antigu in Krioulo

Jesus dianti di Pilatus

¹ Oca sol na mansi, ŝefis di saserdoti junta ku garandis ku pursoris di lei ku tudu membrus di Konseliu, pa filanta ke ke dibi di fasi. E mara Jesus ku korenti, e lebal, e ntrega Pilatus.

² Pilatus puntal: “Abo i Rei di judeus?” Jesus ruspundi i falal: “I suma ku Ñu fala.”

³ Ŝefis di saserdoti e na akusalba ku manga di kusa.

⁴ Pilatus torna puntal: “Bu ka na ruspundi nada? Jubi kuma ke na fala manga di kusa kontra bo!”

⁵ Jesus ka ruspundi mas nada. Pilatus dimira dimas.

Jesus kondenadu pa mortu

⁶ I seduba kustumu, na tempu di festival, pa Pilatus larga un prezu ku pobu pidi.

⁷ I staba na kalabus un omi ku comadu Barabás, ku utrus si kumpañeris bandidu ku mata algin oca ku jinti lanta kontra gubernu.

⁸ Multidon di jinti junta, e bai pidi Pilatus pa i fasi elis kil ki kustuma ta fasi.

⁹ Pilatus punta elis: “Bo misti pa N larga bos Rei di judeus?”

¹⁰ I sibiba kuma ŝefis di saserdoti ntregal Jesus pabia di nveẑa.

¹¹ Ŝefis di saserdoti cuci pobu pa e pidi pa i larga Barabás mbe di larga Jesus.

¹² Pilatus torna punta elis: “Nta ke ku bo misti pa N fasi ku kil ku bo coma Rei di judeus?”

¹³ E ruspundi ku gritu: “Krusifikal!”

¹⁴ Pilatus torna punta elis: “Ma kal mal ki fasi?” E torna grita mas risu: “Krusifikal!”

¹⁵ Pilatus mistiba pa pobu kontenti ku el; i larga elis Barabás, i manda suta Jesus, i ntregal pa i krusifikadu.

Soldadus fasi Jesus trosa

¹⁶ Soldadus leba Jesus pa dentru di sedi di gubernadur; e coma restu di kompañia di tropas.

¹⁷ E bistil kapa burmeju suma rei; e kumpu koroa di fidida, e pul na kabesa.

¹⁸ E kumsa na falal manteña: “Viva, Rei di judeus!”

¹⁹ E sutal ku kana na kabesa, e kuspi riba del, e finka juju si dianti suma ke na adoral.

²⁰ Dipus ke fasil trosa, e tiral ki kapa burmeju, e tornal si ropa, e lebal pa bai krusifikal.

Krusifikason

²¹ Un omi comadu Simon, di prasa di Sireni, pape di Alŝandri ku Rufu, i na pasa oca ki na bin di matu. E obrigal pa i karga krus.

²² E leba Jesus pa lugar comadu Gólgota, ku signifika lugar di Kaku di Kabesa.

²³ E dal biñu jagasidu ku utru mesiñu comadu mira, ma i nega tomal.

²⁴ Ki ora e krusifikal; e rapati si ropa entri elis; e juga pa jubi ke ku kada kin na leba.

²⁵ I seduba novi ora di parmaña oca ki krusifikadu.

²⁶ Riba del e skirbi si akusason, ku fala: “REI DI JUDEUS”.

²⁷ E krusifika tambi dus bandidu juntu ku el, un na direita, utru na skerda. [

²⁸ Asin i sedu suma ku Skritura fala: “I kontadu na grupu di jinti ku fasi mal.”]

²⁹ Kilis ku na pasa e na kobalba, e na balansa kabesa, e fala: “Yode! Abo ku fala bu na bati kasa di Deus, na tris dia bu ta kumpul mas,

³⁰ salba bu kabesa, bu ria na krus!”

³¹ Na mesmu manera tambi ŝefis di saserdoti ku pursoris di lei na trosalba, e na fala ŋutru: “I salba utrus, ma i ka pudi salba si kabesa!

³² Suma el i Mesias, Rei di Israel, pa i ria na krus gosi pa no pudi oja, no fia!” Kilis ku krusifikadu ku el e na kobalba tambi.

Mortu di Jesus

³³ Me-dia, tudu tera bida sukuru te tris ora.

³⁴ Na tris ora di tardi Jesus fala ku vos altu: “Eloi, Eloi, lamá sabaktani?” ku sedu: “Ña Deus, ña Deus, pabia di ke ku bu bandonan?”

³⁵ Utru di kilis ku staba la ku obil, e fala: “Ali i na coma Elias!”

³⁶ Un delis kuri, i pui sponja na vinagri tok i moja yop, i maral na kana, i cigantal na boka di Jesus, i fala: “Pera, no jubi si Elias na bin tiral!”

³⁷ Jesus da garandi gritu, i muri.

³⁸ Kurtina di kasa di Deus rumpi dus padas di riba pa bas.

³⁹ Kapiton di guarda ku staba dianti di krus i oja kuma ku Jesus grita, i muri; i fala: “Na bardadi, e omi i seduba Fiju di Deus!”

⁴⁰ Tambi i staba la utru minjeris ku na jubi di lunju, suma Maria Madalena, Salomé, ku Maria, mame di Tiagusiñu ku José.

⁴¹ E minjeris ta kumpaña Jesus, e ta judalba oca i staba na Galileia. I staba la tambi manga di utru minjer ku kumpañalba pa Jerusalen.

Nteru di Jesus

⁴² Oca ku sol na kai, suma i seduba dia di purparason, ku sedu vespera di dia di diskansu,

⁴³ José ku bin di Arimateia, un omi rispitadu di Konseliu, ku na peraba renu di Deus, i mara koraẑen, i bai nunde Pilatus, i pidi kurpu di Jesus.

⁴⁴ Pilatus dimira di manera ku Jesus muriba ja. I coma kapiton di guarda, i puntal si i tarda ki muri.

⁴⁵ Dipus ki obi konfirmason di kapiton di guarda, i da José lisensa pa i toma kurpu.

⁴⁶ José bai kumpra lensol finu, i tira kurpu na krus, i mbuljal na ki lensol, i mitil na un koba ku kobadu na roca, i rola pedra, i tapa boka di koba.

⁴⁷ Maria Madalena ku Maria, mame di José, e oja nunde ki nteradu.