Markus 13 - BIBLIA - traduson antigu in Krioulo

Jesus fala kuma kasa di Deus na bin batidu

¹ Oca Jesus na sai na kasa di Deus, un di si disipulus falal: “Mestre, jubi e pedras garandi ku e kasas bonitu!”

² Jesus ruspundi, i falal: “Bu oja e kasas garandi? Nin pedra ka na fika riba di ŋutru ku ka na batidu.”

Sufrimentu ku pirsigison

³ Oca i sinta na monti di Olivera, dianti di kasa di Deus, Pedru, Tiagu, Jon ku André bai pa el, e puntal aparti,

⁴ e falal: “Kontanu kal tempu ku e kusas na kontisi. Kal ki sinal ku na mostra kuma tempu ciga pa tudu e kusas kontisi?”

⁵ Jesus fala elis: “Bo toma sintidu pa ka ningin ngana bos.

⁶ Manga di jinti na bin na ña nomi, e na fala kuma elis i Kristu. E na ngana manga di jinti.

⁷ Ora ku bo obi baruju di gera pertu, ku noba di gera lunju, ka bo panta, pabia e kusas ten ku kontisi, ma inda i ka fin.

⁸ Nason ten ku lanta kontra nason, renu kontra renu. Con na tirmi na manga di parti; fomi na ten. E kusas na parsi suma purmeru dur di partu.

⁹ “Abos propi, bo toma sintidu. Pabia di mi bo na ntregadu na justisa; bo na sutadu na kasas di juntamentu; tambi bo na lebadu dianti di gubernaduris ku reis, pa bo pudi konta di mi se dianti.

¹⁰ Ma antis di kila, i pirsis pa Bon Noba kontadu pa tudu rasa.

¹¹ Ora ku bo prindidu, bo ntregadu, ka bo jumna bo fika ku kudadi di kil ku bo na fala. Na ki ora, kil ku bo pudu na sintidu, bo ta fala, pabia i ka abos ku na fala, ma i Spiritu Santu.

¹² Ermons na ntrega ŋutru pa e matadu; pape na ntrega si fiju. Fijus na lanta kontra se papes, e pui elis pa e matadu.

¹³ Tudu jinti na nfastia bos pabia di mi, ma kil ku fika fiel te na fin i na sedu salbu.”

Garandi sufrimentu

¹⁴ (Kin ku lei e palabra, pa i buska ntindil.) “Ora ku bo oja ki ‘nujentimenti meduñu’ na lugar ki ka dibi di sta nel, kilis ku sta na Judeia pa e kuri pa montis.

¹⁵ Kil ku sta riba di kasa pa ka i ria dentru di kasa pa toma kualker kusa di la.

¹⁶ Kil ku sta na matu, ka i riba tras pa toma si kapa.

¹⁷ Koitadi di preñadas, ku kilis ku na mamanta na ki dias!

¹⁸ Bo ora pa ka e kusa kontisi na tempu di cuba,

¹⁹ pabia na ki dia i na ten garandi foronta, ku si koldadi nunka ka ciga di kontisi disna di kumsada di mundu ku Deus kumpu te aos, nin nunka mas i ka na ten suma el.

²⁰ Si Siñor ka menusa dias di ki foronta, nin un kriatura bibu ka na pudiba salba, ma, pa amor di si pobu ki kuji, i menusa ki dias.

²¹ “Asin, si algin fala bos: ‘Ali Kristu li!’ o ‘Alal la!’ ka bo fia,

²² pabia i na lanta finjiduris ku na fala kuma elis i Kristu, o elis i anunsiaduris; e na fasi sinal ku milagri pa ngana, si e pudi, te kilis ku Deus kuji.

²³ Bo toma sintidu; N jumna konta bos tudu e kusas.

Fiju di omi na bin

²⁴ “Dipus di ki dias di foronta, sol na bida sukuru, lua ka na da lus;

²⁵ strelas na kai di seu; puderis ku sta na seu na bulbulidu.

²⁶ Dipus, jinti na oja Fiju di omi na bin na nuven ku garandi puder ku gloria.

²⁷ Na ki ora i na manda si anjus pa kuatru kantu di tera pa e junta kilis ki kuji, desdi un ladu di mundu te na utru.

Lison di figera

²⁸ “Bo toma lison di figera. Ora ku si ramu na bida moli, si foja kumsa na nasi, bo ta sibi kuma cuba pertu.

²⁹ Asin tambi, ora ku bo oja tudu e kusas na kontisi, bo pudi sibi kuma i sta pertu, mesmu na porta.

³⁰ N na konta bos bardadi kuma, e jorson ka na kaba antis di tudu e kusas kontisi.

³¹ Seu ku tera na pasa, ma ña palabra ka na pasa.

Ningin ka sibi dia nin ora

³² “Di ki dia ku ora, ningin ka sibi, nin anjus na seu, nin Fiju; son ña Pape ku sibi.

³³ “Bo bisia, bo toma sintidu, pabia bo ka sibi ora ku tempu na ciga.

³⁴ I suma un omi ku bai bias. I disa kasa na konta di si servus, i da kada kin si tarbaju, i da porteru ordi pa i bisia.

³⁵ Abos tambi bo bisia, pabia bo ka sibi kal tempu ku dunu di kasa na bin, si i di tardi, o di noti, o si i ora ku galu na kanta, o parmaña.

³⁶ Ora ki bin di repenti, ka i oja bo na durmi.

³⁷ Kusa ku N fala bos, N fala pa tudu jinti: ‘Bo bisia.’ ”