Markus 10 - BIBLIA - traduson antigu in Krioulo

Kaba-kasamenti

¹ Jesus sai di la, i bai pa ladu di Judeia, i kamba riu Jordon. Jinti junta utru bias na si roda. I torna na nsina elis, suma si kustumu.

² Utru fariseus bai pa el pa spurmental, e puntal: “Lei ta disa pa un omi kaba ku si minjer?”

³ Jesus ruspundi elis, i punta: “Ke ku Moisés fala bos na lei?”

⁴ E ruspundil: “Moisés seta pa un omi skirbi karta di kaba-kasamenti, i dispidi si minjer.”

⁵ Jesus ruspundi elis, i fala: “Moisés skirbi ki mandamentu pa bos pabia di duresa di bo korson,

⁶ ma na kumsada, oca Deus na kumpu mundu, i kumpu macu ku femia.

⁷ Pabia di kila, omi ta disa si pape ku si mame pa i bai junta ku si minjer;

⁸ elis dus e ta sedu un kurpu son. Asin e ka sedu mas dus, ma un kurpu son.

⁹ E ku manda kil ku Deus junta, omi ka dibi di rapatil.”

¹⁰ Oca ke bai kasa, si disipulus torna puntal ki kusa.

¹¹ I fala elis: “Kin ku dispidi si minjer, i kasa ku utru, i na fasi adulteriu kontra kil ki dispidi.

¹² Si i minjer ku nega tambi si omi, i kasa ku utru, i na fasi adulteriu.”

Jesus ku mininus

¹³ Utru jinti na tisiba mininus pa Jesus toka elis, ma disipulus jusia ku elis.

¹⁴ Oca ku Jesus rapara ke ku na pasa, i fika ku kasabi, i fala elis: “Bo disa mininus bin pa mi. Ka bo tuji elis, pabia Deus ta rena riba di jinti suma elis.

¹⁵ N na konta bos bardadi kuma, kil ku ka seta renu di Deus suma mininu, di nin un manera i ka na yentra nel.”

¹⁶ I barsa elis, i pui si mon riba di kada un, i ora pa elis.

Un riku ku na buska vida ku ka ta kaba

¹⁷ Oca Jesus sai, i pega kamiñu pa bai, un omi kuri pa el, i finka juju si dianti, i puntal: “Bon Mestre, ke ku N dibi di fasi pa ngaña vida ku ka ta kaba?”

¹⁸ Jesus puntal: “Pa ke ku bu na coman bon? Ningin i ka bon; Deus son ki bon.

¹⁹ Bu kunsi mandamentus: ‘Ka bu mata; ka bu dita ku algin ku bu ka kasa ku el; ka bu furta; ka bu lantanda falsu tustumuñu; ka bu nturja; rispita bu pape ku bu mame.’ ”

²⁰ Omi ruspundi, i falal: “Mestre, N guarda e kusas tudu disna di pikininu.”

²¹ Jesus finkal uju, i sinti amor pa el, i falal: “Un kusa son ku faltau. Bai, bu bindi tudu ku bu tene, bu da ki diñeru pa pobris, bu ta tene rikesa na seu. Dipus, bu ta bin, bu sigin.”

²² Oca ku omi obi ki palabra, si rostu rabida, i bai tristi, pabia i teneba manga di rikesa.

²³ Jesus jubi pa si disipulus na si roda, i fala elis: “I kansadu dimas pa rikus yentra na renu di Deus!”

²⁴ Si disipulus fika dimiradu ku ki palabra. Jesus torna fala elis: “Ña fijus, i kansadu dimas pa [kilis ku fiansa na rikesa] yentra na renu di Deus!

²⁵ I mas lestu pa un kamelu pasa na koba di guja te pa un riku seta pa Deus rena riba del.”

²⁶ Ku e palabra disipulus fika mas dimiradu inda, e punta ŋutru: “De manera li, kin ku pudi salba?”

²⁷ Jesus finka uju nelis, i ruspundi: “Omi ka pudi fasil, ma i ka kansadu pa Deus, pabia Deus pudi fasi tudu kusa.”

²⁸ Pedru rabida i falal: “Jubi, anos no disa tudu pa yanda ku bo.”

²⁹ Jesus ruspundi i fala elis: “N na konta bos bardadi kuma, i ka ten ningin ku disa si kasa, o ermons macu o femia, o mame o pape, o fijus, o bulañas, pabia di mi ku di Bon Noba,

³⁰ ku ka na risibi sen bias mas ciu ne tempu li, ku kasas, ermons macu ku femia, mames, ku fijus, ku bulañas, tambi ku pirsigison; na tempu ku na bin i na risibi vida ku ka ta kaba.

³¹ Manga di kilis ku sta dianti e na fika tras. Kilis di tras e na pasa dianti.”

Jesus torna fala kusa di si mortu

³² E staba na kamiñu pa bai Jerusalen. Jesus na baiba se dianti. Disipulus na kudaba ciu; utru jinti ku na binba se tras e staba ku medu. Jesus torna coma ki dozi aparti, i kumsa na konta elis ke ku na bin sedu ku el.

³³ I fala elis: “Bo sukuta. No na bai Jerusalen nunde ku Fiju di omi na ntregadu pa ŝefis di saserdoti, ku pursoris di lei. E na bai kondenal pa mortu, e na ntregal na mon di jinti ku ka sedu judeu.

³⁴ Elis e na fasil trosa, e na kuspil, e sutal, e matal, ma, dipus di tris dia, i na lanta di mortu.”

Kusa ku Tiagu ku Jon pidi

³⁵ Tiagu ku Jon, fijus di Zebedeu, e bai pa Jesus, e falal: “Mestre, i ten un kusa ku no misti pidiu pa bu fasinu.”

³⁶ Jesus punta elis: “Ke ku bo misti pa N fasi bos?”

³⁷ E falal: “Ora ku bu sinta na bu renu di gloria, pa bu disanu sinta, un na bu mon direita, utru na mon skerda.”

³⁸ Jesus fala elis: “Bo ka sibi nin ke ku bo na pidi. Nta bo pudi bibi na kopu ku N na bibi nel, o bo pudi batisadu na manera ku N na batisadu?”

³⁹ E ruspundil: “No pudi.” Jesus fala elis: “Na bardadi, bo na bibi na kopu ku N ten ku bibi nel, bo na batisadu na manera ku N ten ku batisadu,

⁴⁰ ma sinta na ña mon direita o na ña mon skerda, i ka ami ku ten diritu di dal. E lugar i pa kilis ki sta markadu pa elis.”

⁴¹ Oca ku ki des obi e kombersa, e paña raiba di Tiagu ku Jon.

⁴² Jesus coma elis pertu del, i fala elis: “Suma ku bo sibi, jinti ku rikuñisidu suma gubernaduris di jintius e ten forsa nelis; se ŝefis ten garandi otridadi riba delis,

⁴³ ma na bo metadi i ka pudi sedu asin; kil ku misti sedu garandi na bos, el i na sedu bo kriadu.

⁴⁴ Kil ku misti sedu purmeru na bos, i dibi di sedu katibu di tudu.

⁴⁵ Fiju di omi propi ka bin pa i sirbidu, ma pa i sirbi, i da si vida pa liberta manga di jinti.”

Jesus kura Bartimeu

⁴⁶ E ciga Jerikó. Oca ku Jesus na sai di prasa ku si disipulus, ku manga di jinti, i staba un segu comadu Bartimeu, fiju di Timeu, ku na pidi simola, sintadu na roda di kamiñu.

⁴⁷ Oca ki obi kuma i sedu Jesus di Nazaré, i kumsa na grita: “Jesus, Fiju di Davi! Ten pena di mi!”

⁴⁸ Manga di jinti na jusia ku el pa i kala, ma el i na gritaba inda mas: “Fiju di Davi! Ten pena di mi!”

⁴⁹ Jesus para, i fala elis pa e comal. E bai comal, e falal: “Ten koraẑen; lanta, i na comau.”

⁵⁰ Segu ferca si kapa, i jukuta dipresa, i bai pa Jesus.

⁵¹ Jesus puntal: “Ke ku bu misti pa N fasiu?” Segu falal: “Mestre, N misti torna oja.”

⁵² Jesus falal: “Bai, bu fe kurau.” Na ki ora propi Bartimeu oja; i pega kamiñu tras di Jesus.