Markus 1 - BIBLIA - traduson antigu in Krioulo

Jon Batista

¹ Bon Noba di Jesus Kristu, Fiju di Deus, i kumsa

² suma ku anunsiadur Isaias skirbi na libru, kuma Deus fala: “N na manda ña servu bu dianti, ku na kumpu kamiñu pa bo.

³ Algin na grita na lala, i na fala: ‘Bo kumpu kamiñu di Siñor; bo filantal strada.’ ”

⁴ Asin un omi ku comadu Jon i parsi na lala, i na batisa jinti, i na konta elis palabra di Deus, i fala: “Bo ripindi di bo pekadu, bo batisa; Deus ta purda bo pekadu.”

⁵ Tudu jinti di tera di Judeia ku jinti di prasa di Jerusalen e ta baiba pa Jon, e konfesa se pekadu; i ta batisa elis na riu Jordon.

⁶ Jon ta bistiba ropa di kabelu di kamelu tisidu; i ta mara sintu di kuru na rabada; i ta kume gamfañotis ku mel.

⁷ I ta konta jinti, i fala elis: “Un algin na bin dipus di mi ki mas di ki mi. Ami N ka mersi wuŋi pa dismanca korda di si sapatu.

⁸ Ami na bardadi N na batisa bos ku yagu, ma el i na batisa bos ku Spiritu Santu.”

Jesus batisadu, i tentadu

⁹ Na ki tempu Jesus saiba na tabanka di Nazaré na tera di Galileia. Jon batisal na riu Jordon.

¹⁰ Oca ki na sai na yagu, i oja seu yabri. Spiritu Santu disi suma pumba, i ria nel.

¹¹ Un algin papia di seu, i fala: “Abo i ña Fiju ku N kiri ciu; N ten garandi kontentamentu na bo.”

¹² I ka tarda, Spiritu di Deus lebal pa lala.

¹³ I fika la korenta dia, son ku limarias brabu. Satanas na tentalba. Anjus bin sirbil.

Purmeru disipulus di Jesus

¹⁴ Jon pudu na kalabus. Dipus, Jesus riba pa Galileia, i konta Bon Noba di Deus, i fala:

¹⁵ “Tempu ciga ja. Renu di Deus sta ja pertu. Bo ripindi di bo pekadu, bo fia na Bon Noba.”

¹⁶ Oca Jesus na yandaba lungu di Mar di Galileia, i oja dus piskadur, Simon ku si ermon André, ku na botaba ridia na mar.

¹⁷ I fala elis: “Bo bin no bai; N na fasi bos piskadur di jinti.”

¹⁸ E disa janan se ridia, e bai ku el.

¹⁹ I bai mas dianti, i oja Tiagu, fiju di Zebedeu, ku si ermon Jon. E staba na barku, e na capa se ridia.

²⁰ Na ki ora Jesus coma elis. E disa se pape Zebedeu na barku ku si tarbajaduris, e bai ku Jesus.

Jesus kura un omi ku teneba spiritu mau

²¹ E bai pa Kafarnaun. Na dia di diskansu Jesus yentra na kasa di juntamentu, i kumsa na nsina.

²² Jinti fikaba dimiradu ku si nsinamentu, pabia i ka nsina suma pursoris di lei, ma i ta nsina ku tudu sertesa.

²³ Un omi ku teneba spiritu mau staba na kasa di juntamentu. I grita, i punta:

²⁴ “Ke ku no ten ku bo, Jesus di Nazaré? Bu bin pa kaba ku nos? N sibi kin ki abo; abo i ki algin santu di Deus.”

²⁵ Jesus raprindil, i fala: “Kala, bu sai nel.”

²⁶ Spiritu mau bulbuli kurpu di omi ku forsa, i grita risu, i sai nel.

²⁷ Tudu jinti fika dimiradu tok e na punta ŋutru: “Es i ke? I nsinamentu nobu? E omi ta papia ku otridadi, i ta da ordi te pa spiritus mau; e ta obdisil!”

²⁸ Si fama laga, i spaja na tudu tera di Galileia.

Jesus kura manga di duenti

²⁹ Oca ke sai na kasa di juntamentu, e bai pa kasa di Simon ku André. Tiagu ku Jon bai ku elis.

³⁰ Mame di minjer di Pedru ditaba ku febri. Na ki ora e konta Jesus del.

³¹ I bai pa el, i pegal na mon, i judal lanta. Febri disal janan; i kumsa sirbi elis.

³² Di tardi, oca ku sol na kai, e tisi tudu duentis pa Jesus, ku kilis ku teneba dimoniu.

³³ Tudu jinti di prasa ruma na porta.

³⁴ Jesus kura manga di jinti di manga di koldadi duensa; i tira manga di dimoniu na jinti, ma i ka disa dimonius pa e papia, pabia e kunsilba.

Jesus yanda na Galileia

³⁵ Parmaña sedu, oca kau sukuru inda, Jesus lanta, i sai, i bai pa un lugar dingidu fora di tabanka pa fasi orason.

³⁶ Simon ku si kumpañeris bai buskal.

³⁷ E ojal, e falal: “Tudu jinti na buskau.”

³⁸ Jesus fala elis: “No ten ku bai pa utru tabankas ne ladus pa N konta palabra di Deus la tambi, pabia i es ku N bin pa el.”

³⁹ I fika i na yanda na tudu Galileia, i konta palabra di Deus na kasas di juntamentu, i tira dimonius na jinti.

Kura di un omi ku teneba mpincu

⁴⁰ Un omi ku teneba mpincu ciga pertu di Jesus, i finka juju si dianti, i rogal, i falal: “Si bu misti, bu pudi limpan.”

⁴¹ Jesus sinti pena del, i distindi mon, i toka nel, i falal: “N misti. Fika limpu!”

⁴² I kaba papia son, mpincu pirdi nel; omi fika kuradu.

⁴³ Oca Jesus na dispidil, i papia risu ku el,

⁴⁴ i falal: “Jubi, ka bu konta ningin nada. Bai pa saserdoti, bu mostral bu kurpu, bu da Deus oferta ku Moisés manda, manera ku bu sta ja limpu. Es i ta sirbi proba kuma bu sta kuradu.”

⁴⁵ Ma ki omi sai, i kumsa na papia ciu, i spaja noba di kusa ku kontisiba, tok Jesus ka pudi ja yentra na tabanka na uju di jinti. I fika fora na lugar dingidu, ma jinti di tudu parti e ta bai pa el.