Malakias 2 - BIBLIA - traduson antigu in Krioulo

Deus raprindi saserdotis

¹ “Gosi ja, e mandamentu i pa bos saserdotis.

² Si bo ka obil, bo ka pui sintidu pa da onra pa ña nomi, N na manda maldison kontra bos, N na maldisua bo bensons. N maldisua elis ja, pabia bo ka pui sintidu ne kusa.” Asin ku SIÑOR ku ten tudu puder fala.

³ “N na korta bo jorson, N na unta susidadi na bo rostu, ki susidadi di limarias di sakrifisiu di bo festival. Bo na tiradu juntu ku el.

⁴ Asin bo na sibi kuma N manda bos e mandamentu pa kontratu pudi kontinua ku Levi ten ku mi, SIÑOR ku ten tudu puder.

⁵ Ña kontratu ku el i seduba di vida ku pas. N dal vida ku pas, pa i pudi rispitan. Na bardadi i bin rispitan, i teneba ña nomi suma kusa meduñu pa el.

⁶ I ta nsinaba sempri bardadi; maldadi ka ta sai na si boka. I yanda ku mi diritu, ku pas, i libra manga di jinti di fasi pekadu.

⁷ Saserdoti dibi di guarda kuñisimentu; omis dibi di buska nsinamentu di si boka, pabia i el ku ta konta rekadu di SIÑOR ku ten tudu puder.

⁸ “Ma abos, bo disvia di kamiñu; bo nsinamentu pui manga delis da tapada. Bo kebra kontratu di Levi.” Asin ku SIÑOR ku ten tudu puder fala.

⁹ “Pabia di kila, ami tambi N pui pa bo njutidu, bo baŝadu dianti di pobu, pabia bo ka pega na ña kamiñus ma, na bo nsinamentu, bo ta fasi skuju di jinti.”

Deus nuju kaba-kasamenti

¹⁰ Nta anos tudu no ka tene mesmu Pape? I ka un Deus ku kumpunu? Kuma ku no na sedu infiel pa ŋutru, no kontamina kontratu di no papes?

¹¹ Judá sedu infiel; un kusa nujenti fasidu na Israel, suma na Jerusalen, pabia omis di Judá kontamina kau sagradu di SIÑOR ku el i ama, e bai kasa ku minjeris ku ta adora deus strañu.

¹² Kualker algin ku fasi ki kusa, SIÑOR na tiral na moradas di Jakó, nin si i tisi ofertas pa SIÑOR ku ten tudu puder.

¹³ Ali utru kusa ku bo ta fasi: Bo ta kubri altar di SIÑOR ku larma, bo ta cora, bo jimi, pabia gosi i ka ta oja pa ki oferta, nin i ka ta kontenti pa setal na bo mon.

¹⁴ Bo ta punta pabia di ke. I pabia SIÑOR i tustumuña na metadi di bo ku minjer ku bu kasa ocau rapas, ku bu sedu infiel pa el. El i sedu bu kumpañer, ki minjer ku bu fasi kontratu ku el.

¹⁵ Nta Deus ka fasi elis un son, na kurpu ku spiritu? Ke ku manda i fasi elis un son? I pa e pudi tene fijus ku sedu di Deus. Asin bo toma sintidu ku bo spiritu; ka ningin sedu infiel pa minjer di si nobresa.

¹⁶ SIÑOR, Deus di Israel, SIÑOR ku ten tudu puder, i fala: “N nuju kaba-kasamenti, ku omi ku ta kubri ku violensia suma ropa. Asin, bo toma sintidu ku bo spiritu, pa ka bo sedu infiel.”

Dia di julgamentu

¹⁷ Bo ta kansa SIÑOR ku bo palabras, ma bo ta punta: “Na ke ku no kansal?” Bo ta kansal manera ku bo ta fala: “Jinti ku fasi mal ta ojadu bon na uju di SIÑOR; el i ta kontenti ku elis.” Tambi bo ta punta: “Nunde ku Deus di justisa sta nel?”