Lukas 9 - BIBLIA - traduson antigu in Krioulo

Jesus manda si dozi disipulu

¹ I junta si dozi disipulu, i da elis puder ku otridadi riba di tudu dimonius, tambi pa kura duensas.

² I manda elis pa e bai konta di renu di Deus, pa kura duentis tambi.

³ I fala elis: “Ka bo leba nada na bias; ka bo pega nin po na mon, nin saku, nin kusa di kume, nin diñeru, nin ka bo leba dus kapa.

⁴ Na kasa ku bo risibidu nel, bo fika la te dia ku bo na sai na ki tabanka,

⁵ ma na prasa ke ka risibi bos, ora ku bo na sai, bo konkoñi puera di bo pe pa i sedu sinal kontra elis.”

⁶ Disipulus bai, e yanda na tudu tabankas, e konta Bon Noba, e kura jinti na tudu lugar.

Erodis ku Jon Batista

⁷ Rei Erodis obi tudu ku na pasa, i fika tarpajadu, pabia utrus na fala kuma Jon lanta di mortu.

⁸ Utrus fala kuma i Elias ku parsi, utrus tambi kuma i un di antigu anunsiaduris ku lanta di mortu.

⁹ Erodis fala: “Ami N manda korta kabesa di Jon. Nta es i kin ku N obi e na fala e kusas del?” I na buskaba ojal.

Jesus da 5.000 omi di kume

¹⁰ Oca ku apostolus riba, e kontal tudu ke fasi. I leba elis juntu ku el, e sai pa un lugar dingidu fora di prasa di Betsaida,

¹¹ ma multidon bin sibi, e bai si tras. Jesus risibi elis, i konta elis di renu di Deus, i kura tambi kilis ku pirsisaba di kura.

¹² Oca ku sol na bai kai, si dozi disipulu bai pertu del, e falal: “Dispidi e multidon di jinti, pa e pudi bai pa kasas ku tabankas pertu pa e bai gasija, nos e ta oja di kume, pabia ali no sta na un lugar dingidu.”

¹³ I fala elis: “Abos bo da elis di kume.” E ruspundi e fala: “No ka tene nada, son sinku pon ku dus pis. Son si no bai kumpra kusa di kume pa tudu e jinti li.”

¹⁴ (Elis e seduba kuas sinku mil omi.) I fala si disipulus: “Bo pui elis pa e sinta, grupu grupu di sinkuenta.”

¹⁵ Asin ke fasi; e pui elis tudu e sinta.

¹⁶ Jesus toma ki sinku pon ku dus pis, i yalsa uju pa seu, i fala Deus obrigadu, i kebra elis, i ntrega si disipulus pa e pui dianti di ki jinti.

¹⁷ Tudu kume, e farta. Inda e junta dozi kufu di padas ku sobra.

Pedru diklara kin ki Jesus

¹⁸ Un dia ku Jesus na ora, el son, si disipulus staba la. I punta elis: “Kin ku pobu ta fala kuma N sedu?”

¹⁹ E ruspundil e fala: “Utru jinti ta fala abo i Jon Batista, utrus Elias, utrus ta fala inda kuma, i un di anunsiaduris antigu ku lanta di mortu.”

²⁰ I punta elis: “Ma abos, kin ku bo fala kuma N sedu?” Pedru ruspundi i falal: “Mesias di Deus.”

Jesus fala di si sufrimentu ku mortu

²¹ I da elis ordi pa ka e konta ningin nada de kusas.

²² I fala elis: “I pirsis pa Fiju di omi sufri manga di kusa, pa i negadu pa jinti garandi, ku ŝefis di saserdoti, ku pursoris di lei; pa i matadu; na terseru dia pa i lanta di mortu.”

²³ Dipus i fala elis tudu: “Si algin misti bin ku mi, i ten ku nega si kabesa. Kada dia i ten ku lambu si krus, i sigin.

²⁴ Kin ku misti salba si vida i na pirdil, ma kin ku pirdi si vida pa amor di mi, i na salbal.

²⁵ Kal purbitu ku algin ta ten si i ngaña mundu ntidu, ma i pirdi si kabesa propi?

²⁶ Si algin ten borgoña di mi ku di ña palabra, Fiju di omi na sinti borgoña del ora ki bin na si gloria, ku di si Pape, ku santu anjus.

²⁷ Na bardadi N na konta bos, utru di bos ku sta li ka na muri tok e oja renu di Deus.”

Jesus torkia parsensa di si gloria

²⁸ Pertu di un semana dipus di fala e palabras, i toma Pedru, Jon ku Tiagu, i subi ku elis na monti pa bai ora.

²⁹ Oca i na ora, parsensa di si rostu torkia, si ropa bida branku fandan, i na lampra.

³⁰ I staba dus omi ku na papia ku el, ku sedu Moisés ku Elias.

³¹ E bin ku gloria, e na papia di si mortu ku tenba ku sedu na Jerusalen, suma ki markadu.

³² Pedru ku ki utrus ku staba ku el, se uju pisadu ku sonu. Oca ke korda, e oja si gloria ku ki dus omi ku staba ku el.

³³ Oca ku ki omis na afasta del pa bai, Pedru fala Jesus: “Mestre, i bon pa no sta li. No ta kumpu tris baraka, un pa bo, utru pa Moisés, utru pa Elias.” (Ma i ka sibiba ke ki na fala.)

³⁴ Suma ki na papiaba inda, nuven bin kubri elis ku si sombra. E panta oca e na yentra na nuven.

³⁵ Un vos sai na nuven ku fala: “Es i ña Fiju ku N kuji. Bo sukutal.”

³⁶ Oca ku ki vos kaba papia, e oja Jesus el son. E kala; na ki dias e ka konta ningin nada di kil ke oja.

Kura di rapas ku tene spiritu mau

³⁷ Oca sol mansi, e ria na monti; garandi multidon bin kontra ku Jesus.

³⁸ Un omi na metadi di ki jinti grita, i fala: “Mestre, N pidiu, jubi pa ña fiju, pabia i el son ku N tene.

³⁹ Un spiritu ta toma konta del; di repenti i ta grita, i ta fika i na sakudil tok sukuma ta sai na boka; i ta molostal; kuas i ka ta misti largal.

⁴⁰ N pidi bu disipulus pa e tiral, ma e ka pudi.”

⁴¹ Jesus ruspundi i fala: “Abos i jinti mau ku ka ten fe! Te kal tempu ku N ten ku fika ku bos, pa N sufri bos? Tisin bu fiju li.”

⁴² Oca ki na pertu, dimoniu batil, i sakudil. Jesus raprindi spiritu mau, i kura rapas, i ntregal pa si pape.

⁴³ Tudu elis e fika spantadu ku garandesa di Deus. Nkuantu tudu jinti na dimira di tudu kusa ku Jesus fasi, el i fala si disipulus:

⁴⁴ “Bo pui e palabra na bo sintidu. Fiju di omi na ntregadu na mon di jinti.”

⁴⁵ Disipulus ka ntindi ki palabra, pabia i sukuru pa elis; e ka pudi paña pe del. E tenba medu di puntal si sintidu.

Kin ku na sedu ŝef?

⁴⁶ Disipulus bin lanta ku purfia na se metadi aserka di kin ku na sedu ŝef.

⁴⁷ Jesus ntindi ke ke na kuda, i toma un mininu, i pul lungu del,

⁴⁸ i fala elis: “Kin ku risibi e mininu na ña nomi, i ami ki risibi. Kin ku risibin, i risibi kil ku mandan. Asin, kil ki mas pikininu na bo metadi, i el ki garandi.”

Kin ku ka sta kontra nos i sta ku nos

⁴⁹ Jon falal: “Mestre, no oja un omi ku na tira dimonius na jinti na bu nomi. No falal pa ka i fasil suma i ka di no grupu.”

⁵⁰ Jesus fala elis: “Ka bo tujil, pabia kin ku ka sta kontra bos i sta ku bos.”

Jinti di Samaria nega risibi Jesus

⁵¹ Suma i pertuba ja lebadu pa seu, i pui tudu sintidu kuma i ten ku bai Jerusalen.

⁵² I manda utrus pa e bai dianti. E bai, e yentra na un tabanka di Samaria pa purparal un kau di diskansu,

⁵³ ma jinti di tabanka ka risibil, suma e oja kuma i na bai pa Jerusalen.

⁵⁴ Si disipulus Tiagu ku Jon e oja manera di ki jinti, e puntal: “Siñor, bu misti pa no coma fugu di seu pa i ria pa kaba ku elis, suma ku Elias fasi tambi?”

⁵⁵ Jesus rabida i raprindi elis, [i fala: “Abos bo ka sibi di kal koldadi spiritu ku bo sedu,

⁵⁶ pabia Fiju di omi ka bin pa kaba ku vida di jinti, ma pa salba elis.”] Asin e bai pa utru tabanka.

Kansera pa sigi Jesus

⁵⁷ Oca e na bai na kamiñu, un omi falal: “Siñor, pa nunde ku bu na bai N na bai ku bo.”

⁵⁸ Jesus falal: “Timbas tene se koba, kacus di seu tene se niñu, ma Fiju di omi ka tene kau di ngosta kabesa.”

⁵⁹ I fala utru omi: “Bin no bai.” Kila falal: “Siñor, disan pa N bai ntera ña pape purmeru.”

⁶⁰ Jesus falal: “Disa mortus ntera se mortus, ma abo, bai konta di renu di Deus.”

⁶¹ Utru omi falal: “Siñor, ami N na bai ku bo, ma disan purmeru N bai dispidi jinti di ña kasa.”

⁶² Jesus falal: “Algin ku pega radi, i fika i na jubi tras, i ka bali pa sirbi na renu di Deus.”