Lukas 8 - BIBLIA - traduson antigu in Krioulo

Minjeris ku ta kumpañaba Jesus

¹ Dipus, Jesus kumsa yanda na kada prasa, ku kada tabanka, i na konta Bon Noba di renu di Deus. Si dozi disipulu ta baiba ku el,

² tambi utru minjeris ki kuraba di duensa, ku kilis ki tira spiritus mau nelis. I seduba Maria ku comadu Madalena, ku seti dimoniu sai nel,

³ Joana, minjer di Kusa, prokuradur di Erodis, ku Susana, ku manga di utru jinti ku ta judaba Jesus ku si disipulus ku sustentu.

Komparason di sumiadur

⁴ Oca garandi multidon di jinti junta, inda e na bin pa el di kada prasa, i konta e storia:

⁵ “Un labradur sai pa bai waga simentera. Oca ki na wagal, un parti kai lungu di kamiñu, i masadu; kacu kumel.

⁶ Utru parti kai riba di pedra, i nasi, i seku, pabia kau ka moja.

⁷ Utru kai na metadi di fididas; fididas kirsi juntu ku el, e rodial, e pertal.

⁸ Utru kai na bon terenu, i nasi, i padi; kada un da sen.” Oca ki fala e kusa li, i fala risu: “Kin ku tene oreja pa obi, pa i sukuta.”

⁹ Si disipulus puntal: “E storia, ke ki signifika?”

¹⁰ I fala elis: “Deus da bos kuñisimentu di sigridu di si renu, ma utru jinti ta obi son pa komparason, pa e jubi sin oja, pa e obi sin ntindi.

¹¹ “Es i splikason di storia: Simentera i palabra di Deus.

¹² Kilis ku sta lungu di kamiñu i ki jinti ku ta obi palabra; dipus diabu ta bin tiral na se korson, pa ka e fia, e salba.

¹³ Kilis ku sta riba di pedra tambi i kilis ku obi palabra, e risibil ku alegria, ma e ka tene rais. E ka ta tarda na vida di krenti; na tempu di tentason e ta disvia.

¹⁴ Simentera ku kai na metadi di fididas i mostra kilis ku obi; mas dianti, kudadis ku rikesa ku sabura de vida e ta perta elis, e ka ta padi frutu diritu.

¹⁵ Ma kil ku kai na bon terenu i mostra kilis ku obi palabra, e guardal na bardadi ku bon korson, e pega tesu, e ta da frutu.

Kanderu ta pudu riba

¹⁶ “Ningin ka ta peganda kanderu pa kubril ku balai, nin i ka ta mitil bas di kama, ma i ta pul na kau altu, pa kilis ku na yentra pudi oja lus.

¹⁷ I ka ten nada ku kubridu ku ka na bin ojadu; i ka ten nada sukundidu ku ka na bin sai na lus pa i sibidu.

¹⁸ Bo toma sintidu na manera ku bo ta sukuta. Kualker algin ku tene, i ta dadu, ma kualker ku ka tene, te kil ki kuda kuma i tene i na tiradu el.”

Familia di Jesus

¹⁹ Si mame ku si ermons e bai jubil, ma e ka pudiba yangasal pabia di manga di jinti.

²⁰ Utrus fala Jesus: “Ala bu mame ku bu ermons sikidu la fora, e misti ojau.”

²¹ I ruspundi i fala elis: “Ña mame ku ña ermons i kilis ku ta obi palabra di Deus, e obdisil.”

Jesus kalma mar

²² Un dia Jesus mbarka ku si disipulus, i fala elis: “No kamba pa utru banda.” E rinka.

²³ Suma ke na bai, Jesus durmi. Turbada ku bentu bin lanta na mar, barku na inci yagu, tok e sta na pirigu.

²⁴ E bai pa el, e kordal, e falal: “Mestre, Mestre, no na muri!” I lanta, i da ordi pa bentu ku maron. E para; tudu fika kalmu.

²⁵ I rabida i punta elis: “Nunde ku bo fe sta nel?” Elis e staba dimiradu, ku medu, e punta ŋutru: “Es i kin? Te bentu ku yagu, i ta manda nelis, e ta obil!”

Kura di un omi ku tene spiritu mau

²⁶ E ciga na tera di gadarenus ku sta dianti di Galileia.

²⁷ Oca ku Jesus disimbarka, un omi di ki prasa bai kontra ku el; dimonius tardaba ja dentru del. I ka ta bisti ropa, i ka ta mora na kasa, ma son na simiteriu.

²⁸ I kaba oja Jesus, i grita, i kai si dianti, i fala ku vos forti: “Jesus, Fiju di ki Deus ku sta riba di tudu, ke ku bu misti ku mi? N pidiu, ka bu kastigan.”

²⁹ I fala asin pabia Jesus mandaba ja spiritu mau pa i sai na ki omi. I tenba ja manga di tempu ki toma konta del. Jinti ta pañal, e maral ku korenti pe ku mon, ma i ta sapa korenti; ki dimoniu ta pincal son pa lala.

³⁰ Jesus puntal: “Kuma ku bu nomi?” I ruspundil: “Multidon,” pabia manga di dimoniu yentralba.

³¹ Elis e pidi Jesus pa ka i manda elis pa abismu.

³² I staba la manga di purku ku na ferferi na monti. Dimonius pidi Jesus pa i disa elis e yentra na ki purkus. I disa elis.

³³ Dimonius sai na omi, e yentra na ki purkus. Elis tudu e kuri, e ciga na un riada, e kai na mar, e foga.

³⁴ Bakiaduris oja kil ku kontisi, e rinka kuri, e bai konta na prasa ku tabankas ke ku pasa.

³⁵ Jinti sai pa jubi ke ku ten, e bin pa Jesus, e oja ki omi ku dimonius saiba nel, sintadu lungu di Jesus, bistidu, ku si juisu diritu. E panta.

³⁶ Kilis ku mati e konta elis kuma ku omi ku teneba dimonius i kuradu.

³⁷ Tudu ki jinti di tera di gadarenus e pidi Jesus pa i sai na se metadi, pabia e staba ku garandi medu. I mbarka, i bai.

³⁸ Omi ku dimonius sai nel i pidil pa i disal i bai juntu ku el, ma Jesus mandal pa i bai, i falal:

³⁹ “Riba pa bu kasa, bu bai konta garandi kusas ku Deus fasi pa bo.” I bai, i kumsa na konta, na tudu parti di prasa, garandi kusas ku Jesus fasil.

Bajuda ku muri

⁴⁰ Oca Jesus riba pa utru banda, multidon risibil, pabia tudu staba na si spera.

⁴¹ Na ki ora i bin un omi ku comadu Jairu, ku seduba ŝef di kasa di juntamentu. I mborka na pe di Jesus, i pidil pa i bai na si kasa,

⁴² pabia i tene un fiju son, bajuda ku tene pertu di dozi anu di idadi, ku staba kuas pa muri. Suma ki na bai, multidon na pertal di tudu ladu.

⁴³ I sta la un minjer ku tenba dozi anu ku duensa ku ta pul pa i pirdi sangi. I gasta tudu kusa ki tene ku medikus, ma nin un delis ka pudi kural.

⁴⁴ I bai tok i ciga tras di Jesus, i toka na roda di si ropa. Ki ora, sangi para janan.

⁴⁵ Jesus punta: “Kin ku toka na mi?” Suma ku tudu nega, Pedru ku si kumpañeris falal: “Mestre, multidon na pertau, i na kalkau!”

⁴⁶ Jesus fala: “Algin tokan, pabia N sinti puder sai na mi.”

⁴⁷ Ki ora minjer oja kuma i ka pudi sukundi, i bai pa Jesus, i na tirmi, i mborka si dianti, i kontal dianti di tudu jinti ke ku manda i tokal, tambi kuma ki sinti kura na ki ora.

⁴⁸ Jesus falal: “Ña fiju, bu fe kurau. Bai ku pas.”

⁴⁹ Oca ki na papia inda, i bin un algin di kasa di ŝef di kasa di juntamentu ku fala: “Bu fiju muri ja. I ka pirsis bu kansa Mestre.”

⁵⁰ Jesus obi ke ku faladu, i fala Jairu: “Ka bu panta; fia son. I na salba.”

⁵¹ Oca ki ciga na kasa, i ka disa ningin yentra ku el, son Pedru, Tiagu ku Jon, ku pape ku mame di bajuda.

⁵² Tudu na cora, e na grita. Jesus fala elis: “Ka bo cora. I ka sta mortu, i na durmi nan.”

⁵³ Jinti ril, pabia e sibi kuma i sta mortu.

⁵⁴ Jesus pegal na mon, i comal, i fala: “Bajuda, lanta.”

⁵⁵ Si spiritu riba nel; i lanta janan. Jesus manda pa e dal kusa di kume.

⁵⁶ Si pape ku mame fika dimiradu. I fala elis pa ka e konta ningin ke ku kontisi.