Lukas 7 - BIBLIA - traduson antigu in Krioulo

Kura di kriadu di kapiton

¹ Oca ku Jesus kaba fala ku pobu tudu e kusas, i yentra na prasa di Kafarnaun.

² Un kapiton romanu teneba un kriadu ki kiri ciu; i staba duenti, kuas pa muri.

³ Kapiton obi di Jesus, i manda garandis di judeus pa e bai pidil pa i bin kural si kriadu.

⁴ Oca ke ciga nunde Jesus, e pidil ku ngodu, e falal: “E omi mersi pa bu fasil e fabur,

⁵ pabia i ama no nason. I el propi ku kumpunu kasa di juntamentu.”

⁶ Jesus bai ku elis. Oca i pertu ciga kasa, kapiton manda utru si amigus pa falal: “Siñor, ka Ñu kansa ku ciga, pabia N ka mersi pa Ñu yentra na ña kasa,

⁷ nin N ka oja kuma N mersi bai dianti di Ñu. Fala un palabra son; ña kriadu ta san.

⁸ Ami tambi i omi ku sta bas di otridadi, N tene soldadus bas di ña ordi. Si N fala un son: ‘Bai!’ i ta bai. Si N fala utru: ‘Bin!’ i ta bin. Ña kriadu, si N falal: ‘Fasi asin!’ i ta fasil.”

⁹ Oca ku Jesus obi ki palabra, i dimira di ki omi. I rabida, i fala pa multidon ku na sigilba: “N na konta bos kuma, nin na Israel N ka oja fe garandi suma es.”

¹⁰ Kilis ku mandaduba e riba pa kasa, e oja ki kriadu san ja.

Fiju di viuva di Nain

¹¹ Dipus di un bokadu, Jesus bai pa un prasa ku comadu Nain. Manga di si disipulus bai ku el, ku garandi multidon di jinti.

¹² Oca ki ciga pertu di porton di prasa, i kontra ku jinti ku na leba un difuntu, un fiju son di si mame ku seduba viuva. Manga di jinti di prasa na kumpañal.

¹³ Oca ku Siñor oja ki minjer, i sinti garandi pena del, i falal: “Ka bu cora.”

¹⁴ I ciga, i toka na kaŝon; kilis ku na lebal e para. Jesus fala: “Rapas, abo ku N na fala, lanta!”

¹⁵ Difuntu lanta i sinta, i kumsa na papia. Jesus ntregal pa si mame.

¹⁶ Medu garandi kai riba delis tudu; e da Deus gloria, e fala: “Un garandi anunsiadur lanta na no metadi.” E fala tambi: “Deus visita si pobu!”

¹⁷ E noba di Jesus laga pa tudu Judeia, ku tudu ki reẑions pertu.

Jon manda dus disipulu nunde Jesus

¹⁸ Disipulus di Jon kontal tudu e kusas.

¹⁹ Jon coma dus delis, i manda elis pa e bai punta Jesus si i el ku tenba ku bin, o si e na pera utru.

²⁰ Oca ku ki omis ciga nunde Jesus, e falal: “Jon Batista mandanu pa no puntau si abo i kil ku tenba ku bin, o si no na pera utru.”

²¹ Na ki ora Jesus kura manga di duenti, utrus ku duensa ku ta kamba, utrus ku spiritu mau; i pui manga di segu pa e oja.

²² I ruspundi i fala elis: “Bo bai, bo konta Jon ke ku bo oja, ku bo obi: segus na oja, mankus na yanda, jinti ku tene mpincu na kuradu, surdus na obi, mortus na lanta, Bon Noba na kontadu pa koitadis.

²³ Sortiadu i kil ku ka pirdi fe na mi.”

Jesus fala di Jon Batista

²⁴ Oca ku jinti ku Jon mandaba e riba, Jesus kumsa na fala pa multidon kusa di Jon; i punta: “Ke ku bo sai pa jubi na lala? Un kana ku bentu na bulbuli?

²⁵ Ke ku bo bai jubi? Un omi ku bisti ropa bonitu? Kilis ku ta bisti ropa finu, ku ta sta na sabura, na palasiu di rei ke ta sta.

²⁶ Ke ku bo sai pa jubi? Un anunsiadur? Bardadi, N na fala bos, i mas di ki anunsiadur.

²⁷ Es i kil ku Deus fala del na Skritura: ‘N na manda ña servu bu dianti, ku na kumpu kamiñu pa bo.’

²⁸ N na konta bos kuma, i ka ten ningin ku padidu ne mundu ki mas Jon, ma kil ki mas pikininu na renu di Deus i mas garandi di ki el.”

²⁹ Tudu kilis ku obil, te ku kobraduris di mpustu, e ngaba Deus, pabia e setaba batismu di Jon,

³⁰ ma fariseus ku pursoris di lei ku ka seta si batismu e nega planu di Deus pa elis.

³¹ Jesus punta mas: “Kin ku N dibi di kompara jinti di gosi ku el? Ku kin ke parsi?

³² E parsi suma mininus ku sinta na prasa, e na grita ŋutru: ‘No toka bos flauta, bo ka baja! No kanta bos kantiga tristi, bo ka cora!’

³³ Jon Batista bin, i ka kume pon, nin i ka bibi biñu; bo fala: ‘I tene dimoniu.’

³⁴ Fiju di omi bin, i ta kume, i ta bibi; bo fala: ‘Es i ta kume dimas, kaba i bibidur, amigu di kobraduris di mpustu ku jinti di mau nomi!’

³⁵ Ma rusultadu di jiresa di Deus i na mostra kuma i bardadi!”

Jesus na kasa di Simon, fariseu

³⁶ Un fariseu kumbida Jesus pa i bai kume ku el. I yentra na si kasa, i toma si lugar na mesa.

³⁷ Un minjer di ki prasa ku teneba mau vida, oca ki sibi kuma Jesus staba na mesa na kasa di ki fariseu, i tisi un jaru kumpudu di un pedra lebi ku ta comadu alabastru, ku teneba purfumu.

³⁸ I fika tras, lungu di pe di Jesus, i na cora, i kumsa na mojal pe ku larma, i na limpal ku si kabelu; i na dal beẑu na pe, i na untal ki purfumu.

³⁹ Oca fariseu ku kumbidal oja ki kusa, i fala dentru del: “Si es omi sedu anunsiadur, i na sibiba e minjer i kin, i kal koldadi ku na tokal, pabia i minjer di mau vida.”

⁴⁰ Jesus ruspundi i falal: “Simon, N tene un kusa pa falau.” I falal: “Mestre, kontan.”

⁴¹ Jesus falal: “I tenba dus omi ku dibi utru omi diñeru. Un dibil kiñentus mueda di prata, utru sinkuenta.

⁴² Suma e ka tenba manera di paga se dibida, e purdadu, tudu dus. Kontan de, kal delis ku mas na amal?”

⁴³ Simon ruspundi i falal: “N kuda i kil ku purdadu mas ciu.” Jesus falal: “Bu kuda diritu.”

⁴⁴ I rabida pa minjer, i fala Simon: “Bu oja e minjer li? N yentra na bu kasa, bu ka dan yagu pa N laba pe, ma el ku si larma i mojan pe, i limpal ku si kabelu.

⁴⁵ Bu ka dan beẑu, ma el, desdi ku N yentra, i ka para dan beẑu na pe.

⁴⁶ Bu ka untan oliu na kabesa, ma el, i unta ña pe ku purfumu.

⁴⁷ Asin N falau kuma, si manga di pekadu sta ja purdadu; e ku manda i ama ciu, ma kil ku purdadu puku, i ta ama puku.”

⁴⁸ I fala minjer: “Bu pekadus sta purdadu.”

⁴⁹ Kilis ku staba ku el na mesa kumsa na papia entri elis, e punta: “Es i kin ku, te pekadu i ta purda?”

⁵⁰ Jesus fala minjer: “Bu fe salbau. Bai ku pas.”