Lukas 5 - BIBLIA - traduson antigu in Krioulo

Piska di milagri

¹ Un dia Jesus sikidu lungu di lagua di Jenesaré. Multidon na kalkalba pa obi palabra di Deus.

² I oja dus barku nkajadu na praia, ku piskaduris kumsa ria nel, e na lababa ridias.

³ I kamba na un delis ku sedu kil di Simon, i pidil pa i lunjusil un bokadu di praia. I sinta na barku, i kontinua na nsina multidon.

⁴ Oca ki kaba papia, i fala Simon: “Bo bai pa kau fundu, bo bota bo ridias pa piska.”

⁵ Simon ruspundil: “Mestre, no tarbaja ciu noti ntidu, no ka paña nada, ma suma ku bu fala asin, N na bota ridia.”

⁶ E bota, e paña manga di pis, tok ridia misti rumpi.

⁷ E sana se kumpañeris ku staba na utru barku pa e bin juda elis. E bai, e inci tudu dus barku, tok i falta pikininu pa e foga.

⁸ Oca ku Simon Pedru oja ke ku kontisi, i mborka dianti di Jesus, i falal: “Siñor, lunjusi di mi, pabia ami i un omi di pekadu!”

⁹ El ku tudu kilis ku staba ku el e fika spantadu pabia di ki manga di pis ke paña,

¹⁰ suma tambi Tiagu ku Jon, fijus di Zebedeu, ku seduba sos di Simon. Jesus fala Simon: “Ka bu medi; di aos pa dianti bu na sedu piskadur di omi.”

¹¹ E leba barkus, e nkajanta elis na praia; e disa tudu, e sigi Jesus.

Kura di un omi ku teneba mpincu

¹² Oca ki staba na un di ki prasas, i tenba un omi la ku mpincu toma konta di si kurpu. I oja Jesus, i mborka ku rostu na con, i pidil, i fala: “Siñor, si bu misti, bu pudi limpan.”

¹³ Jesus distindi mon, i tokal, i falal: “N misti; fika limpu!” Na ki ora mpincu pirdi nel.

¹⁴ Jesus dal ordi pa ka i konta ningin nada, i falal: “Bai, bu mostra saserdoti bu kurpu; suma ku bu sta limpu, bu ta da oferta ku Moisés manda pa i sedu tustumuñu pa elis.”

¹⁵ Si fama mas na laga. Manga di jinti ta juntaba pa obil, tambi pa i kura elis se duensas,

¹⁶ ma el i ta buskaba sempri un lugar dingidu pa bai ora.

Kura di un omi ku ka ta yandaba

¹⁷ Un dia, oca ki na nsina jinti, i staba la tambi sintadu fariseus ku pursoris di lei, ku binba di Jerusalen ku tudu tabanka di Galileia ku Judeia. Puder di Siñor staba ku el pa kura.

¹⁸ Utru omis bin, e tisi un omi na kanape pabia i duensi tok i ka pudi bulbuli si kurpu. E buska manera di lebal dentru, pa ditandal dianti di Jesus.

¹⁹ Suma ke ka oja manera di yentra ku el pabia di manga di jinti, e subi na kankra, e tira tija, e riantal na kanape na metadi di jinti, dianti di Jesus.

²⁰ Oca ki oja fe di ki omis, i fala duenti: “Omi, bu pekadu sta ja purdadu.”

²¹ Pursoris di lei ku fariseus e kumsa na punta na se sintidu: “Es i kin ku na lebsi Deus? Kin ku pudi purda pekadu si i ka Deus son?”

²² Jesus ntindi se pensamentu, i ruspundi elis, i punta: “Ke ku manda bo na pensa de manera?

²³ Kal ki mas lestu, pa fala: ‘Bu pekadu sta ja purdadu,’ o pa fala: ‘Lanta, bu yanda’?

²⁴ N na mostra bos kuma Fiju di omi ten puder na tera pa purda pekadu.” I rabida, i fala duenti: “Abo ku N na fala, lanta, bu toma bu kanape, bu bai pa bu kasa.”

²⁵ Na ki ora i lanta se dianti, i toma kanape ki ditaba nel, i bai pa si kasa, i ngaba Deus.

²⁶ Tudu jinti fika dimiradu, e ngaba Deus, e fika ku spantu, e fala: “Aos no oja kusas di dimirason!”

Jesus coma Levi (Mateus)

²⁷ Dipus de kontisimentu, i sai, i oja un kobradur di mpustu ku comadu Levi i sintaba na si kau di kobransa. I falal: “Bin no bai.”

²⁸ I lanta, i disa tudu, i bai ku el.

²⁹ Levi fasi garandi festa na si kasa pa Jesus. I staba la manga di kobradur di mpustu ku utru jinti ku na kumeba ku elis na mesa.

³⁰ Fariseus ku se pursoris di lei e na rui disipulus di Jesus, e punta elis: “Ke ku manda bo ta kume bo bibi ku kobraduris di mpustu, ku jinti di mau nomi?”

³¹ Jesus ruspundi elis: “Jinti san ka pirsisa di mediku, ma son kilis ku duensi.

³² N ka bin coma jinti bon, ma N bin coma jinti ku ta peka pa e ripindi.”

Jinti punta kusa di junjun

³³ E falal: “Disipulus di Jon ta junjuŋa manga di bias, e ta fasi orason, suma tambi kilis di fariseus, ma di bo e ta kume, e ta bibi.”

³⁴ Jesus punta elis: “Bo pudi fasi kumbidadus di kasamenti pa e junjuŋa nkuantu noivu sta ku elis?

³⁵ Tempu na ciga ke na tiradu noivu. Ki ora e na bin junjuŋa.”

³⁶ I da elis tambi un komparason, i fala: “Ningin ka ta sapa padas di kamisa nobu pa bota rumbu na kamisa beju. Si i fasi asin, ki kamisa nobu na dana; menda ka ta fila ku ki beju.

³⁷ Tambi ningin ka ta pui biñu ku ka fermenta inda na saku di kuru beju, pabia ki biñu nobu ta rumpi kuru beju, biñu ta darma, saku ta dana.

³⁸ Biñu nobu dibi di pudu na saku di kuru nobu.

³⁹ Kin ku bibi biñu beju i ka ta misti ki ora bibi biñu nobu, pabia i ta fala: ‘Beju i mas bon!’ ”