Lukas 3 - BIBLIA - traduson antigu in Krioulo

Palabra di Jon Batista

¹ Na anu kinzi di renansa di Rei Tiberiu, Ponsiu Pilatus seduba gubernadur di Judeia; Erodis na mandaba na Galileia; si ermon Filip na mandaba na reẑion di Itureia ku Trakonitis; Lisânias na mandaba na Abileni;

² Anás ku Kaifás seduba ŝefis di saserdoti. Na ki tempu palabra di Deus bin pa Jon, fiju di Zakarias, ocal na lala.

³ I kumsa na yanda-yanda pa tudu ki tera na roda di riu Jordon, i na kontaba palabra di Deus, i na fala jinti: “Bo ripindi di bo pekadu, bo batisa; Deus ta purda bo pekadu.”

⁴ I kontisi suma ki sta skritu na libru di palabra di anunsiadur Isaias ku fala: “Algin na grita na lala: ‘Bo kumpu kamiñu pa Siñor; bo ndirital strada.

⁵ Tudu kobon na incisidu; tudu monti, garandi ku pikininu, na justandadu; strada ku jingi na filantadu; kamiñus mau na niveladu;

⁶ jinti di tudu mundu na oja salbason di Deus.’ ”

⁷ Multidon di jinti ta bai pa Jon batisa elis. I ta falaba elis: “Jorson di kobra! Kin ku nsina bos pa kuri di kastigu ku na bin?

⁸ Bo mostra na bo manera di yanda kuma na bardadi bo ripindi. Ka bo kumsa na fala na bo sintidu kuma Abraon i bo pape, pabia N na fala bos kuma, te de pedra propi, Deus pudi lantanda fijus pa Abraon.

⁹ Mancadu pudu ja na rais di pos. Tudu po ku ka da bon fruta, i na kortadu, i botadu na fugu.”

¹⁰ Pobu puntal: “Nta ke ku no dibi di fasi?”

¹¹ I ruspundi i fala elis: “Kin ku tene dus kamisa, pa i rapati ku kil ku ka tene nin un son. Kil ku tene kusa di kume, pa i fasi mesmu.”

¹² Kobraduris di mpustu bai tambi pa e batisadu; e puntal: “Mestre, ke ku no dibi di fasi?”

¹³ I ruspundi elis: “Ka bo kobra mas di ki kil ku bo mandadu.”

¹⁴ Utru soldadus tambi puntal: “Anos, ke ku no dibi di fasi?” I fala elis: “Ka bo trata ningin mal; ka bo tursi ningin mon pa tomal kualker kusa; bo kontenti ku kil ku bo na ngaña.”

¹⁵ Pobu staba diskunfiadu; kada kin na punta na si sintidu si kontra Jon i Mesias.

¹⁶ Jon ruspundi i fala elis tudu: “Na bardadi ami N na batisa bos ku yagu, ma i na bin kil ki mas mi puder, ku N ka mersi dismanca si korda di sapatu. El i na batisa bos ku Spiritu Santu ku fugu.

¹⁷ I tene kabas na si mon pa buanta paja na arus na kau di masa. I na rukuji arus na si bemba, ma i na kema paja na fugu ku nunka ka ta paga.”

¹⁸ Ku manga di utru konsiju Jon kontaba pobu Bon Noba,

¹⁹ ma i raprindi Rei Erodis pabia kila kasa Erodias, minjer di si ermon Filip, tambi ku tudu kusa mau ki fasi.

²⁰ Erodis buri inda utru mal: i manda fica Jon na kalabus.

Batismu di Jesus

²¹ Oca ku tudu jinti batisadu, Jesus batisadu tambi. Oca i na ora, seu yabri,

²² Spiritu Santu ria riba del na forma di kurpu di pumba. Un algin papia na seu, i fala: “Abo i ña Fiju ku N kiri ciu. N ten garandi kontentamentu na bo.”

Jorson di Jesus

²³ Oca ku Jesus kumsa si tarbaju, i teneba kuas trinta anu. I kunsidu suma fiju di José; José i fiju di Eli,

²⁴ fiju di Matat, fiju di Levi, fiju di Melki, fiju di Janai, fiju di José,

²⁵ fiju di Matatias, fiju di Amos, fiju di Naun, fiju di Esli, fiju di Nagai,

²⁶ fiju di Maat, fiju di Matatias, fiju di Semei, fiju di Josek, fiju di Jodá,

²⁷ fiju di Joanan, fiju di Resa, fiju di Zorobabel, fiju di Salatiel, fiju di Neri,

²⁸ fiju di Melki, fiju di Adi, fiju di Kosan, fiju di Elmodan, fiju di Er,

²⁹ fiju di Josué, fiju di Eliezer, fiju di Jorin, fiju di Matat, fiju di Levi,

³⁰ fiju di Simeon, fiju di Judá, fiju di José, fiju di Jonan, fiju di Eliakin,

³¹ fiju di Meleá, fiju di Mená, fiju di Matatá, fiju di Natan, fiju di Davi,

³² fiju di Jesé, fiju di Obed, fiju di Boaz, fiju di Salmon, fiju di Naason,

³³ fiju di Aminadab, fiju di Admin, fiju di Arni, fiju di Ezron, fiju di Perez, fiju di Judá,

³⁴ fiju di Jakó, fiju di Isak, fiju di Abraon, fiju di Tara, fiju di Naor,

³⁵ fiju di Serug, fiju di Ragaú, fiju di Falek, fiju di Eber, fiju di Salá,

³⁶ fiju di Kainan, fiju di Arfasad, fiju di Sen, fiju di Noe, fiju di Lamek,

³⁷ fiju di Metuselá, fiju di Enok, fiju di Jared, fiju di Maleleel, fiju di Kainan,

³⁸ fiju di Enos, fiju di Set, fiju di Adon, fiju di Deus.