Lukas 24 - BIBLIA - traduson antigu in Krioulo

Jesus lanta di mortu

¹ Na purmeru dia di semana, mandrugada, minjeris bai pa koba, e leba pomadas ke purparaba ja.

² E oja pedra tiradu na boka di koba.

³ E yentra, e ka oja kurpu di Siñor Jesus.

⁴ E staba dimiradu sin sibi ke ke na fasi. Di repenti i parsi dus omi pertu delis ku ropa lampradu.

⁵ Minjeris panta, e mpina rostu na con. Ki omis punta elis: “Pa ke ku bo na buska un algin bibu na metadi di mortus?

⁶ I ka sta li, ma i lanta. Bo lembra kil ki fala bos oca i staba inda na Galileia,

⁷ kuma Fiju di omi ten ku ntregadu na mon di omis mau, pa i krusifikadu, i lanta na terseru dia.”

⁸ Ki ora minjeris lembra di ki palabra di Jesus.

⁹ E riba pa prasa, e bai konta tudu e kusas pa ki onzi disipulu ku tudu utru jinti ku staba la.

¹⁰ I seduba Maria Madalena, Joana ku Maria, mame di Tiagu, ku utrus ku staba ku elis, ku konta apostolus e kusas.

¹¹ E ka fia, pabia e oja kuma i tulesa ku minjeris na papia,

¹² ma Pedru lanta, i kuri pa koba, i jimpini, i oja son panus ku Jesus mbuljaduba nel, ditandadu. I riba pa kasa, dimiradu ku ki kontisimentu.

Na kamiñu pa Emaús

¹³ Na mesmu dia dus delis staba na kamiñu pa un tabanka comadu Emaús, onzi kilometru di Jerusalen.

¹⁴ E na bai, e na papia entri elis di tudu ku kontisi.

¹⁵ Suma ke na bai, e na papia entri elis, e na punta ŋutru, Jesus propi ciga, i ndianta ku elis,

¹⁶ ma i parsi kuma se uju ka na oja diritu, ke ka raparal.

¹⁷ I punta elis: “Es i kal kombersa ku bo na yanda bo na papia entri bos?” E para ku rostu tristi.

¹⁸ Un delis, ku comadu Kléofas, puntal: “Abo son ki ospri na Jerusalen ku ka sibi di kusas ku pasa ne dias?”

¹⁹ I punta elis: “Kal kusas?” E ruspundi: “Kusas ku kontisi ku Jesus di Nazaré. Ki omi seduba anunsiadur ku ten puder na kusas ki ta fasi, ku ke ki ta fala, dianti di Deus ku tudu jinti.

²⁰ Ŝefis di saserdoti ku no otridadis ntregal pa i kondenadu pa mortu; e krusifikal.

²¹ Anos no na peraba kuma i el ku na liberta Israel. Riba di tudu e kusas, aos fasi tris dia ki kontisi.

²² Tambi, utru minjeris di no grupu e fasinu dimira, pabia e bai mandrugada pa koba,

²³ e ka oja difuntu la. E riba, e konta kuma e oja un vison di anjus ku fala elis kuma i sta bibu.

²⁴ Utrus ku staba la ku nos e bai pa koba, e oja tudu suma ku minjeris fala, ma e ka oja Jesus.”

²⁵ Jesus fala elis: “Kal falta di ntindimentu ku bo ten! Bo ta tarda pa fia na tudu ku anunsiaduris fala!

²⁶ Nta Kristu ka dibi di sufri e kusas pa i kumsa yentra na si gloria?”

²⁷ Dipus i kumsa na libru di Moisés, i pasa na tudu anunsiaduris, i splika elis kil ku Skritura fala del.

²⁸ E ciga tabanka nunde ke na baiba. El i fasi suma kin ku na pasa mas dianti.

²⁹ E ngodal, e falal: “Fika ku nos; i sta ja tardi; sol na kai.” I yentra pa fika ku elis.

³⁰ Oca ki sta ku elis na mesa, i toma pon, i fala Deus obrigadu, i kebral, i rapati ku elis.

³¹ Ki ora se uju yabri, e raparal. I disparsi na se metadi.

³² E punta ŋutru: “Nta no korson ka na yardinu ki ora na kamiñu ki na papia ku nos, oca i na splikanu Skritura?”

³³ E lanta janan, e riba pa Jerusalen. E oja ki onzi juntadu ku utru jinti ku staba ku elis,

³⁴ e na falaba: “I bardadi, Siñor lanta di mortu! Simon ojal ja.”

³⁵ Ki dus konta elis ke ku pasa na kamiñu, tambi kuma ke raparal oca i na kebra pon.

Jesus parsi na metadi di si disipulus

³⁶ Oca ke na papia de kusas, Jesus propi parsi na se metadi, i fala elis: “Pas ta sta ku bos.”

³⁷ E panta, e fika ku medu, e kuda kuma i un kasisa ke na oja.

³⁸ I punta elis: “Pa ke ku bo ntrumpi? Ke ku manda bo na kuda asin?

³⁹ Bo jubi ña mon ku ña pe, kuma i ami propi. Bo palpan, bo na rapara, pabia kasisa ka tene karni nin os, suma ku bo oja N tene.”

⁴⁰ Oca ki na fala asin, i mostra elis si mon ku si pe.

⁴¹ E ka fia inda pabia e kontenti, e dimiraba. I punta elis: “Bo tene kualker kusa di kume?”

⁴² E dal padas di pis yasadu [ku un bagus di mel].

⁴³ I tomal, i kume se dianti.

⁴⁴ I fala elis: “I e kusas ku N konta bos oca N staba inda ku bos, kuma tudu ku staba skritu di mi na lei di Moisés, ku libru di anunsiaduris, ku salmus, i ten ku sedu.”

⁴⁵ Dipus i yabri elis kabesa pa e ntindi Skritura.

⁴⁶ I fala elis: “I asin ki sta skritu, kuma Kristu tenba ku sufri; na terseru dia i ta lanta di mortu,

⁴⁷ pa jinti konta di ripindimentu ku purdon di pekadu na si nomi, pa tudu nasons. E na kumsa na Jerusalen.

⁴⁸ I abos ku sedu tustumuñas de kusas.

⁴⁹ Ami N na manda riba di bos kil ku ña Pape fala i na da. Bo fika na prasa di Jerusalen tok puder di seu bin riba di bos.”

Jesus lebadu pa seu

⁵⁰ Dipus i leba elis pa fora, na ladu di Betânia. I yalsa mon, i ora riba delis.

⁵¹ Oca ki na ora, i separa delis, i lebadu pa seu.

⁵² E adoral, e riba ku garandi kontentamentu pa Jerusalen.

⁵³ E ta staba sempri na kasa di Deus, e na ngaba Deus, e na gardisil.