Lukas 23 - BIBLIA - traduson antigu in Krioulo

Jesus dianti di Pilatus

¹ Tudu ki jinti lanta, e leba Jesus pa Pilatus,

² e kumsa na akusal, e fala: “No oja es omi i na pui pobu lanta kontra gubernu, i na fala pa ka e paga mpustu pa rei garandi; i fala tambi el i Kristu ku ten ku sedu rei.”

³ Pilatus punta Jesus: “Abo i rei di judeus?” Jesus ruspundi i falal: “Añu ku fala.”

⁴ Pilatus fala ŝefis di saserdoti ku tudu jinti: “N ka oja nin un kulpa ne omi.”

⁵ Ma e na ntemaba kada bias mas, e na fala: “I ta turmenta pobu ku kusas ki na nsina na tudu Judeia; i kumsa na Galileia, i ciga te li.”

Jesus mandadu pa Erodis

⁶ Oca ku Pilatus obi elis e coma Galileia, i punta si Jesus i di la.

⁷ Oca ki sibi kuma i seduba di reẑion di rei Erodis, i mandal pa Erodis ku staba tambi na Jerusalen na ki dias.

⁸ Oca ku Erodis oja Jesus, i kontenti dimas, pabia i tarda ki mistiba ojal, suma ki obi manga di kusa del. I na peraba pa i fasi kualker milagri si dianti.

⁹ I fasil manga di purgunta ma Jesus ka ruspundil nada.

¹⁰ Ŝefis di saserdoti ku pursoris di lei na akusalba ku tudu forsa.

¹¹ Erodis ku si soldadus e njutil, e fasil trosa; e bistil un ropa ku si bonitasku ta parsintidu suma di rei, e ribantal pa Pilatus.

¹² Na mesmu dia Pilatus ku Erodis e pui sabi ku ŋutru, pabia e ka filaba.

Jesus kondenadu pa muri

¹³ Pilatus junta ŝefis di saserdoti ku otridadis ku pobu, i fala elis:

¹⁴ “Bo tisin e omi li, bo fala kuma i ta lantanda pobu kontra gubernu, ma N puntal bo dianti, N ka oja nel nin un di ki krimis ku bo fala.

¹⁵ Nin Erodis tambi ka ojal kulpadu, pabia, suma ku bo oja, i torna ribantanu el. I ka fasi nada ku mersi mortu.

¹⁶ Asin N na kastigal, N largal.” [

¹⁷ Na tempu di festival i tenba obrigason di larga elis un prezu.]

¹⁸ Tudu multidon grita tudu juntu, e fala: “Fora ku es li! Larganu Barabás.”

¹⁹ Barabás puduba na kalabus pabia i lantanda pobu na prasa kontra gubernu; tambi i mata algin.

²⁰ Pilatus torna papia ku elis mas, pabia i misti larga Jesus,

²¹ ma e ruspundi ku gritu: “Krusifikal! Krusifikal!”

²² Terseru bias Pilatus papia ku elis, i punta: “Ma kal mal ki fasi? N ka oja nel nin un krimi ku mersi mortu. Asin N na kastigal, N largal.”

²³ Ma elis e na ntemaba, e na grita ku forsa pa i krusifikadu, tok e ngaña ku se gritus.

²⁴ Pilatus oja kuma i dibi di fasi suma ke pidi.

²⁵ I larga elis kil ke pidi, ku sedu kil ku pudu na kalabus pabia i lantanda pobu kontra gubernu, tambi i mata algin. I ntrega Jesus pa se vontadi.

Jesus na kamiñu pa bai muri

²⁶ Oca ke na lebal, e paña un omi comadu Simon, di prasa di Sireni, ku na binba di matu. E kargantal krus na kosta pa i lebal tras di Jesus.

²⁷ Garandi multidon na bai si tras, ku utru minjeris ku na cora, e na miskiña.

²⁸ Jesus rabida pa elis i fala: “Minjeris di Jerusalen, ka bo cora pa mi. Bo cora pa bos propi, ku bo fijus,

²⁹ pabia dias na bin ku jinti na fala: ‘Sortiadu kilis ku ka tene fiju, ku nunka ka padi, e ka mamanta.’

³⁰ Na ki tempu e na kumsa fala montis: ‘Bo kai riba di nos.’ E na fala montisiñus: ‘Bo sukundinu.’

³¹ Si e trata madera verdi de manera, ke ku na sedu ku ki seku?”

Krusifikason

³² Tambi e leba utru dus omi ku seduba kriminosu, pa e muri juntu ku Jesus.

³³ Oca e ciga na lugar comadu Kaku di Kabesa, la ke krusifikal, ku ki kriminosus, un son na direita, utru na skerda.

³⁴ Jesus fala: “Ña Pape, purda elis, pabia e ka sibi ke ke na fasi.” E juga sorti pa rapati si ropa.

³⁵ Pobu sikidu, e na jubi. Tambi otridadis di judeus na fasilba trosa, e na fala: “I salba utru jinti; pa i salba si kabesa si el i Kristu, kil ku Deus kuji!”

³⁶ Soldadus tambi na fasilba trosa, e bai nunde el, e dal vinagri,

³⁷ e falal: “Salba bu kabesa si abo i rei di judeus!”

³⁸ Riba del i staba skritu e palabra: “ES I REI DI JUDEUS.”

³⁹ Un di ki kriminosus ku pindradu njurial, i puntal: “Nta abo i ka Kristu? Salba bu kabesa, bu salbanu tambi.”

⁴⁰ Ma ki utru jusia ku el, i puntal: “Abo inda bu ka ta rispita Deus? Bu na sufri mesmu kastigu suma e omi li.

⁴¹ Pa nos i justu, pabia no na risibi kil ku no mersi pa mal ku no fasi, ma es, nin un mal i ka fasi.”

⁴² Dipus i fala: “Jesus, lembra di mi ora ku bu yentra na bu renu.”

⁴³ Jesus falal: “N na kontau bardadi, aos propi bu na sta ku mi la na Paraísu.”

Mortu di Jesus

⁴⁴ Kuas me-dia; sol kubri; tudu tera fika sukuru te tris ora di tardi.

⁴⁵ Kurtina di kasa di Deus rumpi na metadi.

⁴⁶ Jesus grita risu, i fala: “Ña Pape, N ntrega ña spiritu na bu mon.” I kaba di fala asin, i muri.

⁴⁷ Kapiton di guarda oja kil ku kontisi. I ngaba Deus, i fala: “Na bardadi e omi i seduba justu.”

⁴⁸ Tudu multidon di jinti ku juntaba pa mati krusifikason e oja kil ku kontisi, e kumsa bati na pitu, e riba pa kasa.

⁴⁹ Tudu kilis ku kunsi Jesus, ku minjeris ku binba ku el di Galileia, e staba un bokadu lunju, e na jubi e kusas.

Jesus nteradu

^50-51 I tenba un omi comadu José, di un prasa di Judeia comadu Arimateia. I seduba un bon omi justu ku na peraba renu di Deus. Kontudu i seduba membru di Konseliu, i ka konkorda ku kil ke ruma, nin ku kusas ke fasi.

⁵² I bai pa Pilatus, i pidil kurpu di Jesus.

⁵³ Oca ki tiral na krus, i mbuljal na un lensol, i pul na un koba ku kobadu na roca, nunde ku ningin ka puduba inda.

⁵⁴ I seduba dia di purparason pa mansi dia di diskansu.

⁵⁵ Minjeris ku binba ku el di Galileia e bai tras di José, e oja koba, kuma ku kurpu pudu la.

⁵⁶ E riba pa kasa pa purpara pomadas ku purfumus. Dia di sabadu e diskansa, suma ku lei manda.