Lukas 22 - BIBLIA - traduson antigu in Krioulo

Falsiamentu di Judas

¹ I staba pertu festival di pon sin fermentu ku ta comadu Paskua.

² Ŝefis di saserdoti ku pursoris di lei e na buskaba manera di kaba ku Jesus sukundidu, pabia e tenba medu di pobu.

³ Satanas yentra na Judas ku ta comadu Iskariotis, ku seduba un di ki dozi apostolu.

⁴ I bai papia ku ŝefis di saserdoti ku kapitons di guardas di kasa di Deus pa i filanta ku elis manera di ntrega elis Jesus.

⁵ E fika kontenti, e staba pruntu pa dal diñeru.

⁶ Judas seta, i kumsa buska manera di ntrega elis Jesus sin jinti mati.

Ultimu sia di Jesus

⁷ I ciga dia di pon sin fermentu, ke dibi di mata un karnelsiñu di Paskua.

⁸ Jesus manda Pedru ku Jon, i fala elis: “Bo bai purparanu sia di Paskua pa no kumel.”

⁹ E puntal: “Nunde ku bu misti pa no purparal?”

¹⁰ I fala elis: “Ora ku bo yentra na prasa, bo na kontra ku un omi ku na bai ku puti di yagu. Bo pega si tras te na kasa ki yentra.

¹¹ Bo ta fala dunu di kasa: ‘Mestre manda puntau na kal kuartu ki na kume sia di Paskua ku si disipulus.’

¹² I ta mostra bos un sala garandi ku mobilia na purmeru andar. Bo purpara sia la.”

¹³ E bai, e oja kusas tudu suma ku Jesus fala, e purpara sia di Paskua.

¹⁴ Oca ora ciga, i toma si lugar na mesa ku ki dozi apostolu.

¹⁵ I fala elis: “N tarda tene garandi vontadi di kume e sia di Paskua ku bos antis di N sufri,

¹⁶ pabia N na konta bos kuma, N ka na torna kumel mas te dia ki na toma si forma kompletu na renu di Deus.”

¹⁷ I toma kopu, i fala Deus obrigadu, i fala elis: “Bo tomal, bo rapatil entri bos.

¹⁸ N na konta bos kuma, N ka na torna bibi biñu di uva te ora ku renu di Deus bin.”

¹⁹ I toma pon, i fala Deus obrigadu, i kebral, i da elis, i fala: “Es i ña kurpu ku dadu pa bos. Bo fasi es pa ña lembransa.”

²⁰ Di mesmu manera, dipus di sia, i toma kopu, i fala: “E kopu i nobu kontratu seladu ku ña sangi ku darmadu pa bos.

²¹ Ma jubi, kil ku na falsian i junta mon ku mi na mesa.

²² Na bardadi, Fiju di omi na bai suma ki sta markadu pa el, ma koitadi di ki omi ku falsial!”

²³ E kumsa na punta ŋutru kal delis ku na fasi e kusa.

Kin ku mas ten balur

²⁴ Si disipulus tenba un purfia entri elis di kal delis ku na ojadu mas importanti.

²⁵ Jesus fala elis: “Reis di jintius ta manda riba delis; kilis ku ten otridadi riba delis e ta comadu judaduris di pobu,

²⁶ ma ku bos i ka na sedu asin. Pa kontrariu, mas garandi na bo metadi pa i sedu suma mas pikininu, kil ku na guberna suma kil ku na sirbi.

²⁷ Kal ki garandi, kil ku sta na mesa o kil ku na sirbi? I ka kil ku sta na mesa? Ma ami na bo metadi N sedu suma kil ku na sirbi.

²⁸ “Abos i kilis ku fika sempri juntu ku mi na tudu ña probason.

²⁹ N na da bos diritu di guberna, suma ku ña Pape dan e diritu,

³⁰ pa bo kume, bo bibi ku mi na mesa na ña renu; pa bo sinta na tronus pa julga dozi jorson di Israel.”

Pedru avisadu

³¹ Siñor fala tambi: “Simon, Simon, ali Satanas pidi lisensa pa feki bos suma arus,

³² ma N ora pa bo, pa ka bu pirdi fe. Ora ku bu riba mas pa mi, bu ta fortifika bu ermons.”

³³ Pedru falal: “Siñor, N sta pruntu pa bai ku bo kalabus, nin si i pa muri.”

³⁴ Jesus falal: “Pedru, N falau kuma, antis di galu kanta aos di noti, bu na fala tris bias kuma bu ka kunsin.”

Dus spada

³⁵ I torna punta elis: “Oca N manda bos sin kartera, nin saku, nin sapatu, kualker kusa falta bos?” E ruspundil: “Nada ka faltanu.”

³⁶ I fala elis: “Ma gosi, kil ku tene kartera ku saku, pa i leba elis. Kil ku ka tene spada, pa i bindi si kapa, i kumpral,

³⁷ pabia N na konta bos, i pirsis pa i sedu na mi kil ku sta skritu, kuma: ‘I juntadu ku kilis ku na fasi mal.’ Sin, kil ku sta skritu di mi ten ku sedu.”

³⁸ E falal: “Siñor, ali dus spada.” I fala elis: “I justa.”

Jesus ora na Jetsemane

³⁹ Jesus sai, i bai pa monti di Olivera suma ki kustuma. Si disipulus bai ku el.

⁴⁰ Oca ke ciga na ki lugar, i fala elis: “Bo ora pa ka bo kai na tentason.”

⁴¹ I lunjusi delis distansia di un tiru di pedra, i finka juju, i ora,

⁴² i fala: “Ña Pape, si bu misti, bu ta tiran e kopu di sufrimentu, ma i ka pa fasi ña vontadi, ma bu vontadi.”

⁴³ Anju di seu bin pa el na ki ora, i dal forsa.

⁴⁴ Ku garandi kasabi i ora ku mas forsa. Si kalur bida suma pingus garandi di sangi ku na lagua te na con.

⁴⁵ I lanta di orason, i bai pa si disipulus, i oja e na durmi ku kansera di tristesa.

⁴⁶ I punta elis: “Ke ku manda bo na durmi? Bo lanta, bo ora, pa ka bo kai na tentason.”

Jesus prindidu

⁴⁷ Oca i na papia inda, i ciga multidon di jinti. Un di si dozi disipulu, ku comadu Judas, staba dianti delis. I bai pa da Jesus beẑu.

⁴⁸ Jesus puntal: “Judas, bu na falsia Fiju di omi ku un beẑu?”

⁴⁹ Kilis ku staba ku el, oca e oja ke ku na bin sedu, e puntal: “Siñor, no na da elis ku spada?”

⁵⁰ Un delis busi spada, i da kriadu di ŝef di saserdotis ku el, i sapal oreja direita.

⁵¹ Jesus fala elis: “Bo disa, i justa!” I tokal na oreja, i kural.

⁵² Jesus rabida pa ŝefis di saserdoti, ku kapiton di guarda di kasa di Deus, ku garandis ku bai pa prindil, i punta elis: “Bo bin ku spadas ku mandukus pa bin prindin, suma un ladron?

⁵³ N ta staba ku bos tudu dia na kasa di Deus; nunka bo ka pui mon na mi, ma es i bo ora; i sukuru ku ten ja forsa.”

Pedru nega Jesus

⁵⁴ E prindil, e lebal, e yentrandal na kasa di ŝef di saserdotis. Pedru sigil di lunju.

⁵⁵ Oca ku kriadus peganda fugu na metadi di baranda di tras, e sinta tudu, Pedru bai sinta na se metadi.

⁵⁶ Un kriadu di kasa ojal sintadu lungu di fugu, i jubil diritu, i fala: “Es tambi staba juntu ku el.”

⁵⁷ Pedru nega, i falal: “Minjer, nin N ka kunsil.”

⁵⁸ Mas un bokadu utru ojal, i falal: “Abo tambi i un delis.” Pedru falal: “Omi, ami i ka delis.”

⁵⁹ I pasa kuas un ora; utru fala ku sertesa: “Na bardadi, es tambi staba ku el, pabia el tambi i di Galileia.”

⁶⁰ Pedru falal: “Omi, N ka sibi ke ku bu na fala.” Ki ora, oca i na papia inda, galu kanta.

⁶¹ Siñor rabida i jubi Pedru. Pedru lembra di palabra ku Siñor falal: “Antis di galu kanta aos di noti bu na fala tris bias kuma bu ka kunsin.”

⁶² I sai fora, i cora ku garandi tristesa.

Soldadus fasi Jesus trosa

⁶³ Omis ku na guarda Jesus e na fasilba trosa, e na sutal,

⁶⁴ e tapal uju, e na dal bofotada, e falal: “Abo anunsiadur! Diviña kin ku dau!”

⁶⁵ E na kobalba, e na fala manga di utru kusa mau kontra el.

Jesus dianti di Konseliu di judeus

⁶⁶ Oca ku sol mansi, Konseliu junta, ku sedu garandis di pobu, ŝefis di saserdoti ku pursoris di lei; Jesus lebadu se dianti.

⁶⁷ E puntal: “Abo i Kristu? Kontanu.” I ruspundi elis: “Si N fala bos, bo ka na seta.

⁶⁸ Tambi si N punta bos, bo ka na ruspundin.

⁶⁹ Disna di gosi Fiju di omi na sinta na mon direita di Deus ku ten puder.”

⁷⁰ E punta tudu: “Nta abo i Fiju di Deus?” I fala elis: “I abos ku fala kuma N sedu el.”

⁷¹ E punta: “Kal tustumuñu mas ku no misti? Anos propi no obil na si boka!”