Lukas 21 - BIBLIA - traduson antigu in Krioulo

Oferta di viuva

¹ Jesus na jubi, i oja rikus na pui diñeru na kaŝa di oferta di kasa di Deus.

² I oja tambi un viuva koitadi bota na kaŝa si dus mueda pikininu.

³ Jesus fala: “N na konta bos bardadi kuma, e koitadi viuva i da mas di ki tudu utru jinti,

⁴ pabia elis tudu e da oferta pa Deus di kil ke sobra, ma es, na si koitadesa, i da tudu ki teneba pa si sustentu.”

Sinal di fin de tempu

⁵ Utru jinti na falaba di manera ku kasa di Deus fajadu ku pedras bonitu, ku utru ofertas ku dadu pa Deus. Jesus fala elis:

⁶ “E kusas ku bo na oja li, i na ciga dias ki ka na disadu nin un pedra riba di utru, ku ka na batidu.”

⁷ E puntal: “Mestre, kal tempu ku e kusas na bin sedu? Kal sinal ku na mostra kuma i sta ja pertu pa kontisi?”

⁸ I fala elis: “Bo toma sintidu pa ka bo nganadu, pabia manga delis na bin na ña nomi, e na fala: ‘Ami i Kristu;’ e na fala tambi: ‘Tempu pertu.’ Ka bo bai se tras.

⁹ Ora ku bo obi kuma gera ten, jinti na lanta kontra gubernus, ka bo medi. E kusas ten ku kontisi purmeru, ma i ka kuma fin ciga ja.”

¹⁰ Dipus i fala elis: “Nason na lanta kontra utru nason, renu kontra utru renu.

¹¹ Na manga di lugar con na tirmi ku forsa, fomi na ten, duensa na laga. I na ten tambi kusas meduñu ku na bin ojadu, ku garandi sinalis na seu.

¹² “Ma antis de kusas tudu sedu, e na prindi bos, e na pirsigi bos, e na ntrega bos na kasas di juntamentu pa bo julgadu; bo na pudu na kalabus. E na leba bos dianti di reis ku gubernaduris pabia di ña nomi.

¹³ E kusas na kontisi pa bo sedu ña tustumuñas.

¹⁴ Bo pui sintidu pa ka bo jumna bo kuda ku ke ku bo na ruspundi,

¹⁵ pabia N na da bos palabra ku jiresa ku nin un di bo inimigus ka na pudi firma ku bos, nin i ka na pudi bati bos na palabra.

¹⁶ Te bo papes, bo ermons, bo parentis ku amigus e na falsia bos. Utru di bos na matadu.

¹⁷ Tudu jinti na nfastia bos pabia di ña nomi,

¹⁸ ma nin un fiu di kabelu di bo kabesa ka na pirdi.

¹⁹ Bo fika firmi, bo na sedu salbu.

Garandi Sufrimentu

²⁰ “Ora ku bo oja tropas da Jerusalen volta, bo ta sibi kuma ora ciga pa prasa danadu.

²¹ Na ki ora, kilis ku sta na Judeia pa e kuri pa montis. Kilis ku sta na prasa pa e sai. Kilis ku sta na matu, pa ka e yentra na prasa.

²² Ki dia i dia di kastigu; tudu kusas ku sta skritu ten ku kontisi.

²³ Koitadi di preñadas, ku kilis ku na mamanta na ki dias, pabia i na ten garandi kansera na tera; raiba na kai riba de pobu.

²⁴ E na matadu ku spada, e na lebadu prezu pa tudu nasons. Jintius na masa Jerusalen te ora ku se tempu kompleta.

Fiju di omi na bin

²⁵ “I na ten sinal na sol, na lua ku strelas. Na tera nasons na fika forontadu; e ka na sibi ke ke na fasi pabia di baruju di maron na mar.

²⁶ Omis na dismaja ku medu, e na kuda na kusas ku na bin riba di mundu. Puderis ku sta na seu na bulbulidu.

²⁷ Na ki ora e na oja Fiju di omi na bin na un nuven, ku puder, ku garandi gloria.

²⁸ Ora ke kusas kumsa kontisi, bo sikidu, bo yalsa kabesa, pabia bo libramentu pertu.”

Lison di figera

²⁹ Dipus i da elis e komparason: “Bo oja figera ku tudu utru pe.

³⁰ Ora ke na nasi foja, si bo ojal, bo ta sibi kuma cuba pertu.

³¹ Asin tambi abos, si bo oja e kusas na kontisi, bo ta sibi kuma renu di Deus pertu.

³² “N na konta bos bardadi, jinti ku sta bibu gosi e ka na kaba muri antis di tudu e kusas kontisi.

³³ Seu ku tera na pasa, ma ña palabra ka na pasa.

I pirsis bisia

³⁴ “Bo toma sintidu; ka bo diskuda son na wukesa, ku bibidera, ku kudadi de mundu, pa ka ki dia bin paña bos di repenti

³⁵ suma armadilia, pabia i na bin riba di tudu kilis ku sta na tudu parti di mundu.

³⁶ Bo bisia, bo ora sempri, pa bo pudi kapli tudu e kusas ku na bin kontisi, pa bo firma dianti di Fiju di omi.”

³⁷ Jesus ta pasaba dia na nsina jinti na kasa di Deus. Di noti i ta sai, i bai fika na monti di Olivera.

³⁸ Parmaña sedu tudu jinti ta bai kasa di Deus pa obi si palabra.