Lukas 2 - BIBLIA - traduson antigu in Krioulo

Jesus padidu

¹ Na ki tempu Rei Agustu da ordi pa marka kabesa di tudu pobu di si renu.

² E purmeru resensiamentu fasidu oca Siréniu seduba gubernadur di Siria.

³ Kada un bai marka si kabesa na si tabanka propi.

⁴ José tambi i sai di tabanka di Nazaré, na tera di Galileia; i bai pa tera di Judeia, pa tabanka comadu Belen, nunde ku Davi padidu nel, manera ku José seduba di jorson di Davi.

⁵ I bai pa marka si kabesa, ku si minjer Maria ku staba ku bariga.

⁶ Oca e staba la, i ciga tempu di i padi.

⁷ I padi si purmeru fiju, i mbuljal na panus, i ditandal na kaŝa nunde ku limarias ta kume nel, pabia i ka tenba lugar pa elis na kasa di ospris.

Bakiaduris di Belen

⁸ Na ki mesmu reẑion, i tenba utru bakiaduris na matu; e na bisiaba se karnel di noti.

⁹ Anju di Siñor parsi se dianti; gloria di Deus numia elis ku garandi lus. E panta.

¹⁰ Anju fala elis: “Ka bo panta, pabia N tisi bos noba di garandi alegria ku tudu jinti na kontenti ku el.

¹¹ Aos na tabanka di Davi i padidu un Salbadur pa bos, ku sedu Kristu, Siñor.

¹² Es ku na sedu sinal pa bos: bo na oja mininu mbuljadu na panus, ditandadu na kaŝa nunde ku limarias ta kume nel.”

¹³ Na ki ora i parsi ku ki un anju un garandi multidon di tropas di seu; e na ngaba Deus, e kanta:

¹⁴ “Gloria pa Deus na lugar mas altu na seu! Pas na tera pa jinti ki kontenti ku elis.”

¹⁵ Anjus disa elis, e riba pa seu. Bakiaduris papia entri elis, e fala: “No bai te Belen, pa no jubi e kusa ku kontisi, ku Siñor kontanu.”

¹⁶ E bai tudu dipresa, e oja Maria, ku José, ku mininu ku staba ditandadu na ki kaŝa nunde ku limarias ta kume nel.

¹⁷ Dipus de ojal, e kumsa na konta tudu jinti kusa ke kontaduba di ki mininu.

¹⁸ Tudu jinti ku obi e ta dimira di kil ku bakiaduris na kontaba elis.

¹⁹ Maria guarda tudu e kusas na si korson; i na kudaba sempri nel.

²⁰ Bakiaduris riba, e na ngaba Deus, e na dal gloria pa tudu ke obi, ke oja, pabia tudu sedu suma ke kontadu.

Jesus pudu nomi, i lebadu dianti di Deus

²¹ Oca ki kompleta oitu dia ki padidu, tempu ciga pa mininu sirkunsidadu. I pudu nomi di Jesus, nomi ku anju dal oca si mame ka paña bariga inda.

²² Dipus di i ciga tempu di purifikason, konformi lei di Moisés, e lebal pa Jerusalen pa pursental dianti di Siñor,

²³ suma ki sta skritu na lei di Siñor kuma: “Tudu purmeru fiju macu i na ntregadu pa Siñor.”

²⁴ E bai tambi pa da oferta konformi lei di Siñor: dus pumba di kasa o dus pumba di matu.

Simeon ku Ana

²⁵ I tenba un omi na Jerusalen ku comadu Simeon. Ki omi i ta yandaba diritu, i tenba garandi rispitu pa Deus; i na peraba konsolason di Israel. Spiritu Santu staba riba del,

²⁶ i mostralba ja kuma i ka na muri tementi i ka oja Mesias di Siñor.

²⁷ Spiritu gial, i lebal pa kasa di Deus. Oca papes di mininu Jesus lebal pa kasa di Deus pa fasil konformi kustumu di lei,

²⁸ Simeon tomal na si mon, i ngaba Deus, i fala:

²⁹ “Siñor, suma ku bu kumpri bu palabra, bu pudi dispidi ja bu servu ku pas,

³⁰ pabia ña uju oja ja bu salbason

³¹ ku bu purpara dianti di tudu pobu.

³² I lus pa numia jintius, tambi i pa sedu gloria pa bu pobu Israel.”

³³ Mame di mininu ku José e dimira kusas ku na faladu del.

³⁴ Simeon bensua elis, i fala Maria, mame di Jesus: “E mininu i distinadu pa i pui manga di jinti na Israel pa e kai, tambi pa lantanda manga delis. I na sedu sinal ku jinti na fala kontra el,

³⁵ pa pensamentu sukundidu di manga di jinti sai na lus. Un dur na fidi bu korson tambi suma spada ku fidiu.”

³⁶ I tenba tambi un minjer anunsiadur ku comadu Ana, fiju di Fanuel, di jorson di Aser. I teneba ja idadi avansadu. I kasa ocal bajuda, i ten son seti anu ku si omi; kila bin muri.

³⁷ I fika viuva tok i tene kuas oitenta i kuatru anu. I ka ta lunjusi di kasa di Deus, i ta adoraba Deus di noti ku di dia, ku junjun ku orason.

³⁸ Oca ki ciga na ki ora, i gardisi Deus, i fala di mininu pa tudu kilis ku na pera pa Jerusalen libertadu.

E riba pa Nazaré

³⁹ Oca ke kaba fasi tudu ku lei di Siñor manda, e riba pa Galileia, pa se tabanka di Nazaré.

⁴⁰ Mininu kirsi, i bida forti, i jiru ba dimas; fabur di Deus staba riba del.

Jesus na kasa di Deus ocal rapas

⁴¹ Kada anu si papes ta baiba Jerusalen pa festival di Paskua.

⁴² Oca ku Jesus kompleta ja dozi anu, e bai Jerusalen pa festival suma di kustumu.

⁴³ Oca ku dias di festival pasa, e na riba; mininu Jesus fika na Jerusalen; nin si papes ka sibi.

⁴⁴ E kuda kuma i sta juntu ku si kumpañeris di bias. Oca ke yanda un dia ntidu, e kumsa na buskal na metadi di parentis ku kunsidus.

⁴⁵ E ka ojal, e riba pa Jerusalen pa bai buskal.

⁴⁶ Dipus di tris dia e ojal na kasa di Deus, sintadu na metadi di pursoris; i na obi ke ke na fala, i na fasi elis purguntas.

⁴⁷ Tudu jinti ku na obil e dimira si jiresa, ku raspostas ki na da elis.

⁴⁸ Oca ku Maria ku José ojal, e dimira. Si mame puntal: “Ña fiju, ke ku manda bu fasinu asin? Ami ku bu pape no fika fadigadu, no na buskau.”

⁴⁹ I punta elis: “Ke ku manda bo buska-buskan? Bo ka sibi kuma N ten ku sta na kasa di ña Pape?”

⁵⁰ Ma e ka ntindi palabra ki fala elis.

⁵¹ Jesus riba ku elis pa Nazaré, i kontinua na obdisi elis. Si mame fika i na guarda tudu ki kusas na si korson.

⁵² Jesus na kirsiba na jiresa, ku altura; i ngaña fabur di Deus ku di omis.