Lukas 19 - BIBLIA - traduson antigu in Krioulo

Jesus ku Zakeu

¹ Jesus yentra na Jerikó, i na pasa na prasa.

² I staba la un omi riku ku ta comadu Zakeu, ŝef di kobraduris di mpustu.

³ I na buskaba oja kin ki Jesus, ma, suma i kurtu, i ka pudi ojal, pabia jinti ciu.

⁴ I kuri dianti, i subi na un pe di figu brabu pa i pudi ojal, suma ki tenba ku pasa la.

⁵ Oca ku Jesus ciga na ki lugar, i jubi pa riba, i ojal, i falal: “Zakeu, ria dipresa, pabia aos N misti diskansa na bu kasa.”

⁶ Zakeu ria dipresa, i risibil ku kontentamentu.

⁷ Tudu ki jinti ku mati kumsa na rui, e na fala kuma Jesus bai gasija na kasa di un omi ku ta fasi pekadu.

⁸ Zakeu lanta, i fala Siñor: “Jubi, Siñor, N na da pobris metadi di ña rikesa. Si kontra N ngana algin na kualker kusa, N sta pruntu pa tornal kuatru bias mas.”

⁹ Jesus falal: “Aos salbason bin pa e kasa; e omi tambi i fiju di Abraon.

¹⁰ Fiju di omi bin buska kil ku pirdi, pa salbal.”

Komparason di des mueda

¹¹ Oca ku jinti na sukuta e kusas, i kontinua i da elis utru komparason, pabia e na kudaba kuma renu di Deus na cigaba na ki tempu, suma ku Jesus staba ja pertu di Jerusalen.

¹² I fala asin: “Un omi di bon familia bai pa un tera lunju pa i bai fasidu rei, pa i riba.

¹³ Antis di bai, i coma si des servu, i da kada kin un mueda di uru, i fala elis: ‘Bo bai nogosia tok N bin.’

¹⁴ “Pobu di si tera ka gosta del, e kuji jinti, e manda elis si tras pa konta kuma e ka misti pa ki omi rena riba delis,

¹⁵ ma i fasidu rei, i riba. I manda coma ki servus ki ntregaba diñeru, pa i sibi kantu ku kada kin ngaña na nogos.

¹⁶ Purmeru servu bin, i falal: ‘Siñor, N ngaña des mueda ku kil un ku bu dan.’

¹⁷ I falal: ‘Abo i bon servu, bu fasi ben. Suma bu sedu fiel na kusa pikininu, bu na manda riba di des prasa.’

¹⁸ “Sugundu servu bin, i falal: ‘Siñor, N ngaña sinku mueda ku ki un ku bu dan.’

¹⁹ I falal: ‘Abo tambi bu na manda riba di sinku prasa.’

²⁰ “Utru servu bin i falal: ‘Siñor, ali bu mueda ku N guarda na lensu,

²¹ pabia N ten medu di bo, suma abo i omi di korson risu, bu ta toma kil ku bu ka pui, bu ta kebra kil ku bu ka sumia.’

²² Rei falal: ‘Abo i servu mau; N na julgau ku palabra ku bu fala. Suma ku bu sibi kuma ami i omi di korson risu, N ta toma kil ku N ka pui, N ta kebra kil ku N ka sumia,

²³ pa ke ku bu ka pui ña diñeru na banku? Asin, manera ku N riba, N na risibilba ku juru.’

²⁴ “I rabida i fala kilis ku firmaba la: ‘Bo tomal ki mueda, bo da kil ku tene des.’

²⁵ E falal: ‘Siñor, ma el i tene ja des mueda.’

²⁶ I fala elis: ‘N na konta bos, tudu kil ku tene i na buridu, ma kil ku ka tene, te kil ki tene i na tiradu el.

²⁷ Kil ña inimigus tambi ku ka mistiba pa N sedu se rei, bo tisi elis li, bo mata elis ña dianti.’ ”

Jesus yentra na Jerusalen

²⁸ Jesus kaba fala asin, i bai dianti na kamiñu pa Jerusalen.

²⁹ Oca ki ciga pertu di Betfajé ku Betânia, na kau ku comadu monti di Olivera, i manda dus di si disipulus,

³⁰ i fala elis: “Bo bai na tabanka ku sta bo dianti. Ora ku bo na yentra, bo na oja un burusiñu maradu ku ningin ka sinta riba del inda. Bo dismancal, bo tisi.

³¹ Si algin punta bos ke ku manda bo na dismancal, bo ta falal asin: ‘I Siñor ku pirsisa del.’ ”

³² Kilis ku mandadu e bai, e oja tudu suma ki fala elis.

³³ Oca ke na dismanca buru, si dunus punta elis: “Ke ku bo na dismanca buru pa el?”

³⁴ E ruspundi elis kuma i Siñor ku mistil.

³⁵ E lebal pa Jesus, e pui se ropa riba di buru, e pui Jesus sinta riba del.

³⁶ Suma ki na bai, e na distindi se ropa na kamiñu.

³⁷ Oca ki ciga pertu di riada di monti di Olivera, tudu ki multidon di disipulus kontenti, e kumsa na kanta risu, e na ngaba Deus pa tudu milagris ke oja,

³⁸ e na fala: “Ki Rei ku bin na nomi di Siñor i mersi ngabadu! Pas na seu; gloria na lugar mas altu na seu!”

³⁹ Utru fariseus na metadi di multidon e falal: “Mestre, manda bu disipulus pa e kala.”

⁴⁰ I ruspundi elis, i fala: “N na konta bos, si esis kala, pedras propi na grita.”

Jesus cora pa Jerusalen

⁴¹ Oca ku Jesus ciga pertu, i oja prasa, i cora pa el,

⁴² i fala: “Ai! Si bu sibiba, nin si i aos, ke ku pudi dau pas! Ma gosi i sta sukundidu na bu uju.

⁴³ Dias na bin ku bu inimigus na dau roda, e na tajau ku kusas, e na rokau na tudu ladu,

⁴⁴ e na durbau, ku bu fijus ku sta dentru di bu mura; e ka na disa nin un pedra riba di utru na bo, pabia bu ka rapara tempu ku Deus visitau.”

Jesus na kasa di Deus

⁴⁵ Jesus yentra na kasa di Deus, i kumsa na serka tudu kilis ku na fasi nogos;

⁴⁶ i fala elis: “I sta skritu kuma Deus fala: ‘Ña kasa i kasa di orason’, ma abos bo fasil kau ku ladron ta sukundi nel.”

⁴⁷ Kada dia i ta nsinaba na kasa di Deus. Ŝefis di saserdoti ku pursoris di lei ku ŝefis di pobu e na buskaba matal,

⁴⁸ ma e ka ojaba manera di fasil, pabia tudu pobu fikaba lungu del pa sukuta si palabra.