Lukas 18 - BIBLIA - traduson antigu in Krioulo

Komparason di viuva ku juis

¹ Dipus, Jesus da elis un komparason pa mostra elis kuma e dibi di ora sempri, sin disanima.

² I fala: “I tenba na un prasa un juis ku ka medi Deus, i ka mporta ku ningin.

³ Na ki mesmu prasa i staba tambi un viuva ku ta baiba sempri nunde juis, i ta falal: ‘Fasin justisa kontra ña inimigu.’

⁴ Manga di dia omi ka kudil, ma dipus, i fala na si sintidu: ‘Nin ku N ka medi Deus, nin N ka mporta ku ningin,

⁵ ma suma ku e viuva na ŝatian kada dia, N na fasil justisa, pa ka i torna riba pa kansan.’ ”

⁶ Siñor punta elis: “Bo obi ke ku ki juis mau fala?

⁷ Nta Deus tambi ka na fasi justisa pa kilis ki kuji, ku na comal di dia ku di noti? O i na tarda pa kudi elis?

⁸ N fala bos kuma i na fasi elis justisa dipresa. Ma ora ku Fiju di omi bin, i na oja fe na tera me?”

Komparason di fariseu ku kobradur di mpustu

⁹ Jesus da tambi e komparason pa kilis ku fiaba na se kabesa, e oja kuma elis i justu; e njuti utru jinti;

¹⁰ i fala: “Dus omi bai na kasa di Deus pa ora. Un i fariseu, utru i kobradur di mpustu.

¹¹ Fariseu firma na un kau, i na oraba ku si kabesa de manera: ‘O Deus, N ta falau obrigadu, pabia N ka sedu suma utru jinti, ku ta furta, ku ta fasi mal, ku ta kiri minjeris di jinti; nin N ka sedu suma e kobradur di mpustu.

¹² N ta junjuŋa dus bias na semana; N ta dau desimu parti di tudu ku N ta risibi.’

¹³ “Ma kobradur sikidu lunju; nin i ka misti yalsa uju pa seu. I na bati na pitu, i na fala: ‘O Deus, ami N ta yarau; ten pena di mi!’

¹⁴ “N na fala bos kuma e kobradur i bai pa si kasa limpu di si pekadu, ma ki utru nau, pabia kil ku yalsa si kabesa i ta baŝadu; kil ku baŝa si kabesa i ta yalsadu.”

Jesus ku mininus

¹⁵ Utru jinti tambi leba mininus pa Jesus pa i pui si mon riba delis. Si disipulus oja ki kusa, e jusia ku ki jinti,

¹⁶ ma Jesus coma mininus pa el, i fala: “Bo disa mininus bin pa mi. Ka bo tuji elis, pabia Deus ta rena riba di jinti suma elis.

¹⁷ N na konta bos bardadi kuma, kil ku ka seta renu di Deus suma mininu, nunka i ka na yentra nel.”

Un riku ku na buska vida ku ka ta kaba

¹⁸ Un regulu papia ku Jesus, i puntal: “Bon Mestre, ke ku N ten ku fasi pa N yarda vida ku ka ta kaba?”

¹⁹ Jesus puntal: “Ke ku manda bu na coman bon? Ningin i ka bon, fora di un son ki Deus.

²⁰ Bu sibi mandamentus: ‘Ka bu dita ku algin ku bu ka kasa ku el; ka bu mata, ka bu furta, ka bu lantanda falsu tustumuñu, rispita bu pape ku bu mame.’ ”

²¹ I falal: “Disna di ocan rapas N guarda tudu e kusas.”

²² Oca ku Jesus obi es, i falal: “I faltau inda un kusa. Bindi tudu ku bu tene, bu da pobris diñeru, bu ta tene rikesa na seu. Dipus bu ta bin, bu sigin.”

²³ Oca ki obi es, i fika tristi dimas, pabia i teneba manga di rikesa.

²⁴ Jesus oja kuma i fika tristi, i fala: “I kansadu pa kilis ku tene rikesa yentra na renu di Deus,

²⁵ pabia i mas lestu pa un kamelu pasa na koba di guja te pa un riku seta pa Deus rena riba del.”

²⁶ Kilis ku obi e kombersa e puntal: “De manera li, kin ku pudi salba?”

²⁷ Jesus ruspundi i fala elis: “Kil ku omi ka pudi fasi, Deus pudi fasil.”

²⁸ Pedru falal: “Ali no disa tudu pa no sigiu.”

²⁹ Jesus fala elis: “N na konta bos bardadi kuma, i ka ten ningin ku disa kasa, papes, ermons, o minjer, o fijus, pabia di renu di Deus,

³⁰ ku ka na risibi manga di bias mas di ki kila ne mundu li; na tempu ku na bin i na tene vida ku ka ta kaba.”

Jesus torna papia di si mortu

³¹ Jesus coma si dozi disipulu aparti, i fala elis: “Bo oja, no na bai Jerusalen. Tudu ku anunsiaduris skirbi di Fiju di omi i na sedu.

³² I na ntregadu na mon di jintius; e na fasil trosa, e na kobal mal, e na kuspil.

³³ Ora ke kaba sutal, e na matal, ma na terseru dia i na torna lanta.”

³⁴ Disipulus ka ntindi nada ki na fala elis. Sintidu de palabra i sukuru pa elis. E ka paña pe di ke ki misti fala elis.

Segu di Jerikó

³⁵ Oca Jesus pertu ciga Jerikó, i staba un segu sintadu lungu di kamiñu, i na pidi simola.

³⁶ I sinti manga di jinti na pasa, i punta kila i ke.

³⁷ E falal kuma i Jesus di Nazaré ku na pasa.

³⁸ I kumsa na grita, i fala: “Jesus, Fiju di Davi, ten pena di mi!”

³⁹ Kilis ku staba dianti e jusia ku el pa i kala, ma i grita mas risu: “Fiju di Davi, ten pena di mi!”

⁴⁰ Jesus para, i manda tisi omi. Oca ki ciga, Jesus puntal:

⁴¹ “Ke ku bu misti pa N fasiu?” Segu falal: “Siñor, N misti oja.”

⁴² Jesus falal: “Nta oja! Bu fe kurau.”

⁴³ Ki ora i oja, i sigi Jesus, i na ngaba Deus. Tudu jinti oja kil ku sedu, e ngaba Deus tambi.