Lukas 17 - BIBLIA - traduson antigu in Krioulo

Pekadu

¹ Jesus fala si disipulus: “Kusas ku ta pui algin kai na pekadu e ten ku kontisi, ma koitadi di ki algin ku pui elis pa e kontisi.

² I minjor pa ki algin maradu pedra garandi na garganti, i botadu na mar, di ki pa i fasi un de pikininus kai na pekadu.

³ Bo toma sintidu ku bo kabesa. “Si bu ermon peka kontra bo, raprindil. Si i ripindi, bu ta purdal.

⁴ Si i peka kontra bo seti bias na un dia, seti bias i bin pidiu diskulpa, purdal.”

Fe

⁵ Apostolus fala Siñor: “Burinu fe.”

⁶ Siñor fala elis: “Si bo tenba fe, nin ki pikininu suma simentera di mostarda, bo ta fala e po li: ‘Rinka ku rais, bu bai paranta bu kabesa na mar;’ i ta fasi suma ku bo fala.

Diritu di servu

⁷ “Talves un di bos pudi tene un servu ku na labra, o i na bakia limarias. Si i bin di matu gora, bu ta falal: ‘Ciga, bu sinta na mesa’?

⁸ O bu ka na falal: ‘Purparan sia, bu bisti, bu bin sirbin tok N kume N bibi; dipus bu ta kume tambi, bu bibi’?

⁹ Nta bu ta fala ki servu obrigadu suma ki fasi kil ki mandadu? N fia kuma nau.

¹⁰ Asin tambi abos, ora ku bo fasi tudu ku bo mandadu, bo ta fala: ‘No sedu servus ku ka mersi ngabadu, pabia no fasi son kil ku no dibi di fasi.’ ”

Kura di des omi ku tene mpincu

¹¹ Oca Jesus na bai pa Jerusalen, i pasa na metadi di Samaria ku Galileia.

¹² Oca i na yentra na un tabanka, des omi ku teneba mpincu sai pa kontra ku el. E para lunju,

¹³ e grita, e fala: “Jesus, Mestre, ten pena di nos!”

¹⁴ Oca i oja elis i fala: “Bo bai nunde saserdotis pa e jubi bos.” Suma ke na bai na kamiñu, se kurpu san di ki duensa, e bida limpu.

¹⁵ Oca ku un delis oja kuma i staba kuradu, i riba, i ngaba Deus ku vos altu,

¹⁶ i kai na pe di Jesus ku rostu na con, i falal obrigadu. El i seduba di Samaria.

¹⁷ Jesus ruspundi i punta: “I ka seduba des ku kuradu? Nunde ku ki novi sta?

¹⁸ I ka ten nin un son ku riba pa ngaba Deus fora de stranjeru?”

¹⁹ I fala omi: “Lanta, bu bai. Bu fe kurau.”

Renu di Deus na bin di repenti

²⁰ Oca fariseus puntal kal tempu ku renu di Deus na bin, Jesus ruspundi i fala elis: “Renu di Deus ka na bin suma kusa ku bo pudi oja.

²¹ Ningin ka ta fala: ‘Jubi, alil li!’ o: ‘Alal la!’ pabia renu di Deus sta na bo metadi.”

²² I fala si disipulus: “Dia na bin ku bo na misti oja un di dias di Fiju di omi, ma bo ka na ojal.

²³ Jinti na fala bos: ‘Alil li!’ o: ‘Alal la!’ Ka bo bai se tras.

²⁴ Suma ku relampagu ta numia seu di un ladu pa utru, asin ku Fiju di omi na sedu na si dia,

²⁵ ma purmeru i ten ku sufri ciu; jinti de tempu na negal.

²⁶ Suma ki kontisi na dias di Noe, asin ki na sedu tambi na dias di Fiju di omi.

²⁷ Jinti ta kumeba, e bibi, e kasa, e da se fijus kasamenti, te na dia ku Noe yentra na barku; diluviu bin i kaba ku elis tudu.

²⁸ Mesmu manera ki kontisi tambi na dias di Lo. E ta kumeba, e bibi, e kumpra, e bindi, e paranta, e kumpu kasa,

²⁹ ma na dia ku Lo sai na Sodoma, i cubi fugu ku nŝofri di seu; i kaba ku elis tudu.

³⁰ Asin ki na sedu na dia ku Fiju di omi na parsi.

³¹ “Na ki dia, kin ku sta riba di kasa, i tene si kusas dentru di kasa, ka i ria pa toma elis. Mesmu manera, kil ku sta na matu, ka i riba tras.

³² Bo lembra di minjer di Lo.

³³ Kil ku buska salba si vida, i na pirdil. Kil ku pirdi si vida, i na salbal.

³⁴ N na konta bos kuma, na ki noti, i na sta dus ditadu na kama; un son na lebadu, utru na disadu.

³⁵ Dus minjer na pila juntu; un son na lebadu, utru na disadu. [

³⁶ I na sta dus omi na matu; un son na lebadu, utru na disadu.]”

³⁷ Si disipulus ruspundi e puntal: “Nunde, Siñor?” I fala elis: “Nunde ku kusa ku muri sta, la ku jugudes ta junta.”