Lukas 16 - BIBLIA - traduson antigu in Krioulo

Komparason di nkargadu ki ka di fiansa

¹ Jesus fala tambi si disipulus: “I tenba un omi riku ku tene nkargadu, ke bin kontal kuma i na gastal si kusas.

² Patron comal, i puntal: ‘Es i ke ku N na obi di bo? N na fasiu balansu, N tirau na tarbaju.’

³ “Nkargadu punta na si sintidu: ‘Ke ku N na fasi suma ku ña patron na tiran na tarbaju? N ka ten forsa pa koba con; N ten borgoña di pidi simola.

⁴ N sibi ke ku N na fasi, pa ora ku N dispididu na tarbaju, jinti ta risibin na se kasas.’

⁵ Dipus i coma kada un di kilis ku dibi si patron. I punta purmeru: ‘Kantu ku bu dibi ña patron?’

⁶ I ruspundi: ‘Sen tambur di azeiti.’ Nkargadu falal: ‘Toma bu val, bu sinta dipresa, bu skirbi sinkuenta.’

⁷ Dipus i punta ki utru: ‘Abo, kantu ku bu dibi?’ I ruspundil: ‘Sen busa di trigu.’ I falal tambi: ‘Toma bu val, bu skirbi oitenta.’

⁸ “Patron ngaba ki nkargadu malandru suma ki fasi kusa ku jiresa, pabia jinti de mundu li e jiru na trata kusas entri elis mas di ki jinti ku kunsi lus.

⁹ Ami N na konta bos, bo toma rikesa de mundu, bo ranja amigus ku el, pa ora ki kaba, ki amigus ta risibi bos na moradas ku nunka ka na kaba.

¹⁰ Kil ki fiel na kusasiñu, tambi i ta sedu fiel na kusa garandi. Kil ki malandru na kusasiñu, tambi i ta malandru na kusa garandi.

¹¹ Si bo ka ojadu fiel na rikesa de mundu, kin ku na fia pa ntrega bos rikesa di bardadi?

¹² Si na kusa di jinti bo ka sedu fiel, kil ku na sedu di bos, kin ku na da bos el?

¹³ “Nin un tarbajadur ka pudi sirbi dus patron, pabia i ten ku gosta di un, i ka gosta di ki utru; i na sta pruntu pa tarbaja pa un, i na njuti ki utru. Bo ka pudi sirbi Deus, bo sirbi rikesa tambi.”

¹⁴ Utru fariseus ku gostaba di diñeru, oca ke obi tudu e kusa ku Jesus fala, e fasil trosa.

¹⁵ Jesus fala elis: “Abos i kilis ku ta misti mostra sedu bon dianti di jinti, ma Deus i kunsi bo korson, pabia kil ku omi ta garandisi, pa Deus i nujenti.

¹⁶ “Lei di Moisés ku skritura di anunsiaduris e teneba forsa te tempu di Jon. Disna di ki tempu, i Bon Noba di renu di Deus ku na kontadu; tudu jinti na fasi forsa pa yentra nel.

¹⁷ I mas lestu pa seu ku tera pasa, di ki pa un asentu tiradu riba di kualker letra di lei.

¹⁸ “Un omi ku disa si minjer, i kasa ku utru, i sta na adulteriu. Kil ku kasa ku minjer ku si omi nega, i sta na adulteriu tambi.

Omi riku ku Lazaru

¹⁹ “I tenba un omi riku ku ta bisti ropa finu, karu; i ta kume sabi, i ta ronka ben.

²⁰ I tenba tambi un omi koitadi ku comadu Lazaru, ku ta ditandadu na porton di riku. Cagas kubril kurpu.

²¹ I ta mistiba kume restus ku ta sobra di mesa di riku. Kacuris propi ta bai limbil si cagas.

²² “Un dia ki koitadi muri. Anjus lebal lungu di Abraon. Riku tambi muri, i nteradu.

²³ La na lugar di mortus i staba na garandi sufrimentu. I yalsa uju, i oja Lazaru la lunju, juntu ku Abraon.

²⁴ I grita risu, i fala: ‘Pape Abraon, ten pena di mi, bu manda Lazaru pa i moja ponta di dedu na yagu, i freskan lingua, pabia N na kastiga dimas ne fugu li.’

²⁵ “Abraon falal: ‘Fiju, lembra kuma bu risibi tudu ben na bu vida, Lazaru son mal. Gosi el i konsoladu, abo bu sta na kastigu.

²⁶ Fora des, i pudu un kobon garandi, fundu, na metadi di nos ku bos. Nin ku algin di li misti kamba pa bo ladu, i ka ta pudi; tambi ningin di la ka pudi bin pa li.’

²⁷ I falal: ‘Suma i asin, Pape, N rogau pa bu mandal na kasa di ña pape,

²⁸ pabia N tene sinku ermon; pa i bai avisa elis pa ka e bin tambi pa e lugar di kastigu.’

²⁹ “Abraon falal: ‘E tene palabra di Moisés ku di anunsiaduris; pa e seta kila.’

³⁰ I falal: ‘Nau, ña pape Abraon, ma si un algin ku muri lanta i bai pa elis, e ta ripindi.’

³¹ Abraon falal: ‘Si e ka obi palabra di Moisés ku di anunsiaduris, nin ku algin ku muri lanta, e ka na fia.’ ”