Lukas 14 - BIBLIA - traduson antigu in Krioulo

Jesus kura un omi ku tene duensa di incasku

¹ Jesus yentra na kasa di un ŝef di fariseus na dia di diskansu pa kume. Elis e fika e na jubil diritu.

² I staba la si dianti un omi ku kurpu incadu.

³ Jesus punta duturis di lei ku fariseus: “Lei ta pirmiti pa kura na dia di diskansu o nau?”

⁴ E kala. Jesus toma omi, i kural, i mandal pa i bai.

⁵ I punta elis: “Si un di bos tene un buru o un turu ku kai na fonti na dia di diskansu, bu ka na bai tiral na ki ora?”

⁶ E ka pudiba ruspundil nada.

Pruntu pa toma lugar mas bas

⁷ Oca ku Jesus rapara kuma kumbidadus na kuji lugaris di rispitu, i da elis un komparason, i fala:

⁸ “Ora ku algin kumbidau pa kasamenti, ka bu buska lugar di mas rispitu; yar i ten utru kumbidadu di mas katigoria.

⁹ Si kil ku kumbida bos bin i falau: ‘Da es utru ki lugar,’ bu ten ku toma lugar mas bas ku borgoña,

¹⁰ ma ora ku bu kumbidadu, bai sinta na lugar mas bas. Ora ku kil ku kumbidau bin, i ta falau: ‘Amigu, subi mas riba.’ Asin bu ta ten rispitu dianti di tudu kilis ku sta na mesa ku bo.

¹¹ Tudu kil ku yalsa si kabesa, i ta baŝadu. Kil ku baŝa si kabesa, i na yalsadu.”

¹² I fala tambi kil ku kumbidal: “Ora ku bu fasi un jantar o un sia, ka bu kumbida bu amigus, nin bu ermons, nin parentis, nin bu visiñus riku, pa ka e bin torna kumbidau tambi. Asin bu ta risibi bu pagamentu,

¹³ ma ora ku bu fasi festa, kumbida jinti pobri, manku, ku segu.

¹⁴ Asin bu ta sortiadu, pabia elis e ka tene di pagau, ma Deus na pagau ora ki lantanda jinti justu di mortu.”

Komparason di garandi festa

¹⁵ Un di kilis ku staba ku el na mesa obi e kusa, i falal: “Sortiadu i ki algin ku mati festa na renu di Deus.”

¹⁶ Jesus falal: “Un omi fasi garandi festa, i kumbida manga di jinti.

¹⁷ Na ora di festa i manda si kriadu pa i bai fala kumbidadus: ‘Bo bin, pabia tudu sta ja pruntu.’

¹⁸ Kada un kumsa na diskulpa, un son un son. Purmeru fala: ‘N kumpra un terenu, N ten ku bai jubil. N pidiu pa bu diskulpan.’

¹⁹ Utru fala: ‘N kumpra sinku par di turu, N sta na kamiñu pa bai spurmenta elis. N pidiu pa bu diskulpan.’

²⁰ Utru fala: ‘N kumsa kasa nan; e ku manda N ka pudi bai.’

²¹ “Kriadu riba, i konta si patron ke ke fala. Dunu di kasa paña raiba, i fala si kriadu: ‘Sai dipresa na ruas ku bekus di prasa, bu tisi li pobris ku mankus ku segus.’

²² Dipus kriadu falal: ‘Siñor, N fasi kil ku bu fala, ma lugar ten inda.’

²³ Patron fala kriadu: ‘Sai fora di prasa na ruas ku kamiñusiñus, bu obriga elis pa e yentra, pa ña kasa pudi inci.

²⁴ N na konta bos kuma, nin un di ki omis ku kumbidadu ka na kume nada di ña festa.’ ”

I ta kusta pa sedu disipulu di Jesus

²⁵ Un bias garandi multidon na kumpañaba Jesus. I rabida i fala elis:

²⁶ “Si algin na bin pa mi, i ka pui si pape aparti, ku si mame, si minjer, si fijus, si ermons macu ku femia, si kabesa propi, i ka pudi sedu ña disipulu.

²⁷ Kil ku ka lambu si krus pa i bin ña tras, i ka pudi sedu ña disipulu.

²⁸ “Si un di bos misti kumpu kasa garandi, i ten ku sinta purmeru pa fasi konta di kil ki na gasta, pa jubi si i tene diñeru pa kabantal.

²⁹ Si i pui alisersu, i ka pudi kaba, tudu jinti ku ojal e na fasil trosa,

³⁰ e fala: ‘E omi kumsa kumpu kasa, i ka pudi kabantal!’

³¹ “Si un rei na bai geria kontra utru rei, i ten ku sinta purmeru pa jubi si el, ku des mil, i pudi geria ku kil ku na bin kontra el ku vinti mil.

³² Si i ka pudi, i ten ku manda jinti pa pidi pas na mon di ki utru rei nkuantu i sta lunju.

³³ Asin, kualker di bos ku ka disa tudu kusa ki tene, i ka pudi sedu ña disipulu.

Sal ku bida dos

³⁴ “Sal i bon, ma si i pirdi si gustu, ke ku ta pul mas pa i salga?

³⁵ I ka ta bali pa con, nin pa strumu; i son pa bota. Kin ku tene oreja pa obi, pa i sukuta.”