Lukas 13 - BIBLIA - traduson antigu in Krioulo

Kaida di tori di Siloé

¹ Na ki mesmu tempu, i staba la utru jinti ku na kontaba Jesus di ki jinti di Galileia ku Pilatus jagasi se sangi ku sangi di limarias ke na roniaba ku el.

² Jesus ruspundi, i punta elis: “Bo kuda kuma ki jinti e pekaba mas di ki tudu jinti di Galileia, suma e sufri e kusas?

³ N na fala bos nau; ma abos, si bo ka ripindi, abos tudu bo na muri na mesmu manera.

⁴ O ki disoitu jinti ku tori di Siloé kai riba delis, i mata elis, bo kuda kuma e mas kulpadu di ki tudu jinti ku mora na Jerusalen?

⁵ N na fala bos nau, ma si bo ka ripindi, abos tudu bo na muri na mesmu manera.”

Komparason di figera ku ka padi

⁶ I da elis e komparason: “I ten un omi ku teneba un figera parantadu na si kintal. I bai buska fruta la, i ka oja nada.

⁷ I fala si tarbajadur di kintal: ‘Jubi de! I fasi ja tris anu ku N ta bin buska fruta ne figera, N ka ta oja nada. Kortal. Pa ke ki sta li amonton?’

⁸ I ruspundi i falal: ‘Siñor, disal e anu inda tok N garbata roda del, pa N strumal.

⁹ Si i bin padi, i sta bon. Si i ka padi, bu ta manda kortal.’ ”

Jesus kura un minjer na dia di diskansu

¹⁰ Jesus na nsinaba na dia di diskansu na un kasa di juntamentu.

¹¹ I staba la un minjer ku tenba ja disoitu anu ku spiritu di duensa. I ta yandaba kurvadu; i ka pudiba distindi kurpu diritu.

¹² Oca ku Jesus ojal, i comal pa i bin, i falal: “Minjer, bu sta libri di bu duensa.”

¹³ I pui mon riba del; na ki ora i ndirita, i ngaba Deus.

¹⁴ Ŝef di kasa di juntamentu paña raiba suma ku Jesus kura na dia di diskansu. I fala pobu: “I ten seis dia di tarbaju; bo pudi bin kura na ki dias, ma i ka na dia di diskansu.”

¹⁵ Siñor ruspundi i falal: “Finjiduris! Nta kada un di bos ka ta dismanca si turu o si buru na dia di diskansu pa bai bibintil?

¹⁶ E minjer gora, fiju di Abraon, ku Satanas tene prezu disoitu anu, i ka dibi di largadu na dia di diskansu de kusa ku maral?”

¹⁷ Oca ki fala asin, tudu kilis ku staba kontra e fika ku borgoña. Tudu pobu fika kontenti ku tudu kusas garandi ki fasi.

Komparason di mostarda ku di fermentu

¹⁸ Jesus punta: “Ke ku renu di Deus parsi ku el? Ke ku N na parsintil ku el?

¹⁹ I asin: Un omi toma garan di mostarda, i sumial na orta; planta kirsi tok i sedu pe garandi. Kacus fasi niñu na si ramu.”

²⁰ I torna punta: “Ke ku N na parsinti renu di Deus ku el?

²¹ I parsi asin: Un minjer toma fermentu, i jagasil na tris midida di foriña, tok i orfa tudu.”

Porta pikininu

²² Oca Jesus na baiba pa Jerusalen, i na panti na prasas ku tabankas, i na nsina jinti.

²³ Un algin puntal: “Siñor, kilis ku na salba i puku?” I ruspundil:

²⁴ “Bo fasi forsa pa yentra na porta pikininu, pabia N na konta bos kuma, manga delis na bin buska yentra, e ka na pudi.

²⁵ Ora ku dunu di kasa lanta, i ntranka porta, bo na firma la fora, bo na kumsa konki porta, bo na fala: ‘Siñor, Siñor, yabrinu.’ El i ta ruspundi bos: ‘N ka sibi abos i di nunde.’

²⁶ Bo ta kumsa na fala: ‘No kume, no bibi ku bo; bu ta nsinaba jinti na no ruas.’

²⁷ El i ta ruspundi bos: ‘N konta bos, N ka sibi abos i di nunde. Bo lunjusi di mi, abos tudu ku ta fasi mal.’

²⁸ Bo na cora la, bo na ñeme dinti, ora ku bo oja Abraon, Isak ku Jakó ku tudu anunsiaduris na renu di Deus, abos bo botadu fora.

²⁹ Jinti na bin di saida ku kaida di sol, di norti ku sul, e na sinta na festa na renu di Deus.

³⁰ Na bardadi i ten kilis di kabantada ku na sedu purmeru; utrus ki di purmeru e na sedu di kabantada.”

Jesus miskiña kusa di Jerusalen

³¹ Na ki mesmu tempu utru fariseus ciga, e fala Jesus: “Sai li, bu bai utru kau, pabia Erodis misti matau.”

³² I ruspundi i fala elis: “Bo bai konta ki raposa kuma, ali N na serka dimonius, N na kura jinti aos ku amaña. Na terseru dia N ta kabanta tarbaju.

³³ N ten ku yanda aos ku amaña ku ermon di amaña, pabia i ka bon pa un anunsiadur muri fora di Jerusalen.

³⁴ “Ai, Jerusalen, Jerusalen, ku ta mata anunsiaduris, bu ta da ku pedra kilis ku Deus mandau! Kantu bias ku N misti junta bu fijus suma ku galiña ta junta si pinton bas di si asa, ma bu ka seta!

³⁵ Jubi, bo na fikadu ku bo kasa bandonadu. Na bardadi N na konta bos, bo ka na ojan mas te ki tempu ku bo na fala: ‘Kil ku bin na nomi di Siñor i mersi ngabadu.’ ”